Read efik ŊWED JOB 1 Bible Online

ŊWED JOB 1 - efik bible

ŊWED JOB 1

¹OWO kiet, ekere Job, okodu ke isɔŋ Uz: ndien owo oro ɔfɔn ama, onyuŋ enen, onyuŋ abak Abasi, onyuŋ afara ke idiɔk.

²Ndien nditɔ-iren itiaba ye nditɔ-iban ita ekemana enɔ enye.

³Inyene esie onyuŋ edi tɔsin ŋkpri ufene itiaba, ye tɔsin camel ita, ye enaŋ iba-iba ke itie ikie ition, ye uman ass ikie ition, ye ata ediwak ikɔt; ndien owo oro okpon akan kpukpru nditɔ edem usiaha-utin.

⁴Ndien nditɔ-iren esie ekam eka ekedia ŋkpɔ ke ufɔk mmɔ kiet kiet ke usen esie; mmɔ enyuŋ edɔŋ ekekot nditɔ-eka iban mmɔ, ete edidia ŋkpɔ, enyuŋ eŋwɔŋ ye mmimɔ.

⁵Edikem ke mme usen udia oro ekanarede ema, Job akam ɔdɔŋ ekekot mmɔ edi, ndien anam mmɔ esana, ndien ke eyo esierede, enye adaha ke enyɔŋ awa edifɔp uwa ke adaŋa ibat kpukpru mmɔ: koro Job ɔdɔhɔde, ete, Mme nditɔ mi ekenam idiɔk enyuŋ ekpɔŋ Abasi ke esit mmɔ. Ntem ke Job akam esinam kpukpru ini.

⁶Edikem ke usen kiet nditɔ Abasi eda idem mmɔ ediwut Jehovah, Satan onyuŋ edi ke otu mmɔ ŋko.

⁷Ndien Jehovah ɔdɔhɔ Satan, ete, Afo oto mmɔŋ? Ndien Satan ɔbɔrɔ Jehovah, ete, Nto ndiyɔrɔ ke ererimbot, ye ke ndiyo ke esit.

⁸Ndien Jehovah ɔdɔhɔ Satan, ete, Nte afo emetim ese owo mi Job? koro owo eke ebietde enye miduhe ke ererimbot, ɔfɔn ama, onyuŋ enen, onyuŋ abak Abasi, onyuŋ afara ke idiɔk.

⁹Ndien Satan ɔbɔrɔ Jehovah, ete, Nte Job abak Abasi ke ikpikpu?

¹⁰Nte afo usinke ɔkɔ ukan enye, ye ufɔk esie, ye kpukpru se enye enyenede, ukuk? Afo ɔmɔdiɔŋ se ubɔk esie anamde, inyene esie omonyuŋ ɔtɔt ke isɔŋ?

¹¹Edi kam nyan ubɔk fo, tuk kpukpru se enye enyenede; enye iditreke ndikpɔŋ fi aŋwa-aŋwa.

¹²Ndien Jehovah ɔdɔhɔ Satan, ete, Sese, kpukpru se inyenede enye odu fi ke ubɔk; edi kunyan ubɔk fo utuk enye ke idem esie. Ndien Satan adaha ke iso Jehovah ɔwɔrɔ.

¹³Edikem ke usen kiet, nditɔ-iren esie ye nditɔ-iban esie edia ŋkpɔ enyuŋ eŋwɔŋ wine ke ufɔk akpan mmɔ:

¹⁴ndien isuŋutom kiet edi ke ɔtɔ Job, ɔdɔhɔ ete, Mme enaŋ ekefuŋ isɔŋ, mme ass enyuŋ eta mbiet ekpere mmɔ;

¹⁵ndien nditɔ Sabea edibuat, enyuŋ emum mmɔ; enyuŋ ewot mkparawa fo ke iso ofut; ndien suk ami ikpɔŋ-ikpɔŋ mbɔhɔ nditiŋ nnɔ fi.

¹⁶Ke adaŋemi enye emi osuk ɔdɔhɔde, owo efen oduk edidɔhɔ ete, Ikaŋ abasi omoto ke enyɔŋ ɔduɔ edifɔp ŋkpri ufene, ye mkparawa fo, onyuŋ ata mmɔ; ndien suk ami ikpɔŋ-ikpɔŋ mbɔhɔ nditiŋ nnɔ fi.

¹⁷Ke adaŋemi enye osuk ɔdɔhɔde, owo efen oduk edidɔhɔ, ete, Mme Chaldean etim idem esin ke mbak ita, ndien ebumere etaŋ mme camel enyɔŋ, enyuŋ ewot mkparawa fo ke iso ofut: ndien suk ami ikpɔŋ-ikpɔŋ mbɔhɔ nditiŋ nnɔ fi.

¹⁸Ke adaŋemi enye osuk ɔdɔhɔde, owo efen oto edi ŋko edidɔhɔ, ete, Nditɔ-iren fo ye nditɔ-iban fo ekedia ŋkpɔ, enyuŋ eŋwɔŋ wine ke ufɔk akpan mmɔ;

¹⁹ndien, sese, akamba oyobio oto ke edem wilderness, onyuŋ eberi inuk ufɔk oro mbinaŋ, ndien ufɔk ɔduɔ nditɔ oro ke idem owot; ndien suk ami ikpɔŋ-ikpɔŋ mbɔhɔ nditiŋ nnɔ fi.

²⁰Ndien Job adaha ke enyɔŋ, awai ekura esie, onyuŋ okporo ibuot esie, ndien ɔduɔ ke isɔŋ, atuak ibuot.

²¹Enye onyuŋ ɔdɔhɔ ete: Ŋkoto iferi ke idibi eka mi ŋwɔrɔ, nyenyuŋ mfiak do iferi: edi Jehovah ɔkɔnɔ, Jehovah onyuŋ ɔbɔ; ekɔm enyiŋ Jehovah.

²²Ke ofuri ŋkpɔ emi Job inamke idiɔk, inyuŋ idorike Abasi se minenke.