Read efik ŊWED JOB 10 Bible Online

ŊWED JOB 10 - efik bible

ŊWED JOB 10

¹UWEM mi efek ukpɔŋ mi, nyeyak idem mi nnɔ eseme mi; nyedɔhɔ ikɔ ke iyaresit mi.

²Nyedɔhɔ Abasi, nte, Kunam ikpe obiom mi; sian mi se afo ɔtɔhɔde ye ami abaŋa.

³Nte ɔfɔn fi ndifik, nnyuŋ mmen utom ubɔk fo nduɔk, nnyuŋ ŋwaŋa uduak mme idiɔk owo?

⁴Nte afo emenyene enyin obukidem?

⁵Nte afo okut ŋkpɔ nte owo okutde? Nte mme usen fo etie nte mme usen owo? Nte isua fo ebiet usen owo?

⁶Koro afo oyomde idiɔk ido mi onyuŋ ɔduŋɔde ukwaŋ-ŋkpɔ mi?

⁷Okposuk edi nte afo ɔfiɔkde ete ke nnyeneke se nduede, baba owo kiet eke osiode ke ubɔk fo inyuŋ iduhe.

⁸Edi ubɔk fo okotim obot mi, onyuŋ anam ofuri idem mi akan okuk; ndien afo oyom ndisobo mi.

⁹Mbɔk, ti ete ke afo akanam mi nte mbat-eso, ndien ɔmɔŋ anam mi mfiak ke ntan!

¹⁰Nte afo ukaŋwaŋake mi nte mmɔŋ-eba, unyuŋ unam mi mbari nte edibari mmɔŋeba?

¹¹Unyuŋ usine mi ikpɔk ye obuk? unyuŋ uda ɔkpɔ ye osip udɔk mi?

¹²Afo amada uwem ye ima ɔfɔn mi, ntim-ŋkama fo onyuŋ ekpeme ibifik mi.

¹³Edi afo omodip ŋkpɔ emi ke esit fo: mmɔfiɔk nte ke (uduak) emi odu ye afo.

¹⁴Ŋkpedue, afo ekpekpeme mi, ukponyuŋ uyakke mi mbɔhɔ ufen mi.

¹⁵Ŋkpanam idiɔk, ɔdɔdiɔk ɔnɔ mi: ŋkponyuŋ nnen, ŋkpekemeke ndimenere ibuot mi: koro esuene ɔyɔhɔde mi, nnyuŋ ŋkut ukut mi.

¹⁶Ŋkpemenere enye, afo ekpebine mi nte lion, okponyuŋ ɔtɔŋɔ ntak ada mme utibe ŋkpɔ fo etiene mi.

¹⁷Afo okpokot ntiense fo edi ke iso mi, okponyuŋ ɔdɔdiɔŋ ayat esit ye ami aka iso; udim etiene udim eyom mi.

¹⁸Anam didie, ndien, afo okosio mi ke itie-eyen? Ŋkpakpa, enyin ikponyuŋ ikwe mi.

¹⁹Ŋkpetie kpa nte ŋkpɔ eke mmenduhe, ekpesio mi ke idibi ebiom eka udi.

²⁰Nte mme usen mi idige esisit? Yak Enye etre; yak Enye ɔkpɔŋ mi, man ŋŋwaŋa iso mi esisit;

²¹Ke mme ŋkaŋkaha kaŋa ke ɔtɔ eke mmendifiakke, ke isɔŋ ekim ye eke mfut mkpa,

²²Ke isɔŋ emi okimde ɔkpɔsɔŋ ekim; eke mfut mkpa ye ndutime; emi uwemeyo etiede nte ekim.