Read efik ŊWED JOB 14 Bible Online

ŊWED JOB 14 - efik bible

ŊWED JOB 14

¹OWO eke ŋwan amande ɔmuhɔ usen, onyuŋ ɔyuhɔ ukut:

²Owo asiaha nte ikɔŋ, ndien esibe enye efep, enye efehe ebe nte ukpɔŋ, inyuŋ ibigike.

³Nte afo onyuŋ etiŋ enyin ke oruk owo emi ŋko, onyuŋ ada mi oduk ke ikpe ye afo?

⁴Edisana ŋkpɔ akpakam oto ke ŋkpɔ ndek; baba kiet itoho.

⁵Sia ema edori mme usen esie, ibat mme ɔfiɔŋ esie odu ye afo, afo ama onim adaŋa esie eke enye mikemeke ndibe;

⁶Kabare, kuse aba enye, man enye odop, tutu enye adia usen esie nte owo eke anamde utom ke okuk.

⁷Koro idorenyin anade ɔnɔ eto: ema ekpi enye eduɔk, enye eyetɔŋɔ ntak esehe, nsehe esie idinyuŋ itreke;

⁸Okposuk edi nte oruŋ esie akabarede edi akani ke ntan isɔŋ, etak esie onyuŋ akpade ke ntan;

⁹Utebe mmɔŋ eyesin enye afiari, onyuŋ asiak ŋkɔk nte nsek eto.

¹⁰Edi owo akpa, ndien asuana, owo onime, ndien odu mmɔŋ?

¹¹Mmɔŋ okure ke mkpɔdiɔhɔ-mmɔŋ, idim onyuŋ etek tutu asat:

¹²Kpa ntre ke owo ɔsuhɔre ana ke isɔŋ, inyuŋ idahake ke enyɔŋ: mmɔ idemekede tutu ikpa-enyɔŋ okure, idinyuŋ ituakke mmɔ ke idap mmɔ.

¹³Afo akpakam odip mi ke obio ekpo, onyuŋ onim mi ke ndibe ebiet, tutu iyaresit fo ebe, onyuŋ odori mi ini, ndien eti mi!

¹⁴Ke owo akpade, nte enye ediset? nyebet ke ofuri ini utom mi, tutu erikpuhɔre itie mi edi.

¹⁵Afo okpokot, ndien ami ŋkpeyere fi, utom ubɔk fo ɔkpɔdɔŋ fi.

¹⁶Koro ke emi ke afo abat ikpat isaŋ mi: nte afo utiŋke enyin ke mme idiɔk ido mi?

¹⁷Ema esin mme ukwaŋ-ŋkpɔ mi ke ekpat enim seal, afo omonyuŋ esin ndudue mi okim.

¹⁸Edi akamba obot ɔsuhɔre onyuŋ ebehere, akwa itia onyuŋ adaha ke itie esie:

¹⁹Mmɔŋ ɔsɔhi mme itiat efep, ɔtɔ mmɔŋ emen ntan-isɔŋ efep: kpa ntre ke afo osobo idorenyin owo.

²⁰Afo ɔkɔnɔ enye ke nsinsi, ndien enye adaha, ɔkpuhɔ enye iso, onyuŋ ɔdɔŋ enye aka.

²¹Nditɔ esie eforo, ndien enye ifiɔkke; mmɔ enyuŋ ekabare ekpri, ndien enye itimke ikut mmɔ:

²²Edi obuk esie okop ubiak ke idem esie, ukpɔŋ esie onyuŋ atua ke idem esie.