Read efik ŊWED JOB 15 Bible Online

ŊWED JOB 15 - efik bible

ŊWED JOB 15

¹NDIEN Eliphaz Temanite ɔbɔrɔ, onyuŋ ɔdɔhɔ, ete,

²Nte enyene-ibuot owo ada ikpikpu ifiɔk ɔbɔrɔ; onyuŋ ada ofum ikɔrabak ɔyɔhɔ ke esit esie?

³Eneni ke ikɔ eke mifɔnke ke baba ŋkpɔ kiet, ye ke uyo eke enye mikemeke ndidori owo udori ke esit?

⁴Ŋkɔm afo ememen uteŋe Abasi ɔduɔk: onyuŋ ɔsuhɔre akam ke iso Abasi anam ekpri.

⁵Koro inua fo obukde idiɔk ido fo, afo onyuŋ emek edeme mbon ŋkari.

⁶Inua fo anam ikpe otip fi, idige ami, kpa mkpɔk-inua fo enyuŋ etiŋ ebaŋa fi.

⁷Nte afo edi akpa owo eke akamanade? Nte ekebem iso ebot fi ekpɔŋ ikpɔ obot?

⁸Nte afo omokop ke odu Abasi? onyuŋ ada ifiɔk onim ke idem fo?

⁹Afo ɔfiɔk nso eke nnyin mifiɔkke? Otim okut nso ŋkpɔ eke miduhe ye nnyin?

¹⁰Mbon iwat ye ŋkani iren, emi esɔŋde ekan usɔ, edu ke otu nnyin.

¹¹Nte afo abat ndɔŋesit Abasi ke ekpri akan fi, ye ikɔ eke etiŋde suŋ-suŋ enɔ fi?

¹²Esit fo ada fi aka mmɔŋ? Enyin fo enyuŋ efumi nso,

¹³Eke esinde fi akabare esit fo asua Abasi, onyuŋ ayakde oruk ikɔ ntem ɔwɔrɔ ke inua fo?

¹⁴Owo edi nso eke enye akpasanade? Owo eke ŋwan amande onyuŋ edi nso eke enye ekpenende?

¹⁵Sese, Enye ibuɔtke idem esie ye edisana ikɔt esiemɔ, mme heaven inyuŋ isanake ke enyin esiemɔ:

¹⁶Ŋwaŋwa ediso se idehede inyuŋ ibiarade, kpa owo emi ɔŋwɔŋde idiɔk ido nte mmɔŋ!

¹⁷Nyeteme fi, kop uyo mi: ndien nyetiŋ ŋkpɔ eke ŋkokutde;

¹⁸Eke mme enyene-ibuot owo ekebɔde mme ete mmɔ etiŋ, inyuŋ idipke:

¹⁹Emi ekenɔde mmɔ isɔŋ ke idem mmɔ ikpɔŋ, ndien baba esen owo kiet isaŋake ke otu mmɔ ibe:

²⁰Adaŋa ini nte idiɔk owo odude uwem enye okut ukut, ibat isua onyuŋ odibe owo utuk.

²¹Uyom ndik odu enye ke utɔŋ: ke ini emem ke andisobo edisim enye.

²²Enye isehe ke akpanikɔ, ite ke imɔ idito ke ekim inyɔŋ idi, ndien emesio enye enim enɔ ofut.

²³Enye ɔyɔrɔ oyom udia, ete, Enye? Ɔmɔfiɔk ete ke usen ekim ekpere imɔ ke ubɔk.

²⁴Ndutuhɔ ye nnaneyin esin enye edikhe: mmɔ ekɔnɔ enye nte edidem eke otimde ŋkpɔ ɔnɔ ekɔŋ.

²⁵Koro enye emenerede ubɔk esie aŋwana ye Abasi, onyuŋ anam uko ye Ata Ɔkpɔsɔŋ;

²⁶Ada ɔkpɔsɔŋ itɔŋ, ada edidobi ekop otu-ekɔŋ esie obumere Enye.

²⁷Koro enye ofukde iso esie ke ikpɔŋ, onyun anam isin esie okpon isek:

²⁸Ndien enye oduŋ obio eke ewurede; oduŋ ufɔk eke baba owo miduŋke, eke ekenimde ete edi ibom-bom.

²⁹Enye idinyeneke inyene, ubɔŋ esie idinyuŋ isɔŋɔke ida, ndien se enye enyenede iditɔtke ke isɔŋ.

³⁰Enye iditoho ke ekim ifiak idi; edemikaŋ anam nsehe esie asat, ibifik inua esie onyuŋ emen enye efep.

³¹Yak enye okubuɔt idem esie ke idiɔk, eyebiaŋa enye: koro idiɔk eyedi utip esie.

³²Ke mika-ikemke ke usen esie, eyesu, ŋkɔk esie idinyuŋ idige awawa.

³³Eyekeŋ ŋkim-ŋkim mfri esie nte vine, onyuŋ ɔduɔk ikɔŋ esie nte olive.

³⁴Koro esop mme oburobut owo eyebiara, ikaŋ eyenyuŋ ata mme tent inyene ukanedem.

³⁵Ke eyomo ibak, ke eman idiɔk ido, ndien idibi mmɔ osuk ototim abiaŋa.