Read efik ŊWED JOB 19 Bible Online

ŊWED JOB 19 - efik bible

ŊWED JOB 19

¹NDIEN Job ɔbɔrɔ, enyuŋ ɔdɔhɔ, ete,

²Adaŋa didie ke mbufo ediyat mi esit, enyuŋ eda uyo mbufo enuak mi mbai-mbai?

³Mbufo emesuene mi utim ikoduop emi: but inamke mbufo koro mbufo etukde mi.

⁴Ndien edieke ŋkeduede ke akpanikɔ, ndudue mi atak ye ami.

⁵Edieke mbufo enimde idem mbufo ke akamba ekan mi ke akpanikɔ, enyuŋ edade esuene mi etɔk mi:

⁶Mbufo efiɔk, ndien, ete ke edi Abasi oyut mi akabare onim, onyuŋ ada iyire esie akan mi okuk.

⁷Sese, nseme mbaŋa nnama, edi ikopke uyo mi: mfiori, ndien ikpe iduhe.

⁸Enye emesiri usuŋ mi, ndien ŋkemeke ndibe, omonyuŋ esin ekim ke ɔkpɔusuŋ mi:

⁹Omosio mi ubɔŋ ke idem efep, onyuŋ ayarare mi anyanya ke ibuot.

¹⁰Enye omosobo mi akanare okuk, ndien mmadaha: omonyuŋ odibere idorenyin mi nte eto.

¹¹Enye onyuŋ anam iyaresit esie asak mi ke idem, onyuŋ abat mi nte owo usua esie kiet.

¹²Mme udim esie esop idem ɔtɔ kiet, enyuŋ enam ɔkpɔ-usuŋ mmɔ ebaŋa mi, enyuŋ enam nna-ekɔŋ ekan tent mi ekuk.

¹³Enye ɔbɔ mi nditɔ-ete mi onim anyan usuŋ, kpa mme ɔdiɔŋɔ mi enyuŋ enim idem mmɔ nte isen owo ye ami.

¹⁴Oruk mi emetre: mme nsaŋa mi emenyuŋ efre mi.

¹⁵Mme andiduŋ ufɔk mi ye ifin-iban mi ebat mi ke esen owo: mmetie nte eyen idut ke enyin mmɔ.

¹⁶Ŋkot ofin mi, edi enye iyereke; mmenyene ndikpe enye ubɔk ke inua mi.

¹⁷Ŋwan mi asua ibifik mi, nditɔ-eka mi enyuŋ esua eseme mi.

¹⁸Idem nsek-nditɔ esuene mi; ndaha ke enyɔŋ, ndien mmɔ etɔk mi.

¹⁹Kpukpru mbon odu mi ese mi ke ŋkpɔ ndek: mmɔ emi mmade emenyuŋ ekabare esua mi.

²⁰Mme ɔkpɔ mi eyire mi ke ikpɔhidem ye obukidem, nnyuŋ mbɔhɔ ye ikpɔh-edet mi ikpɔŋ.

²¹Mbufo, mme ufan mi, etua mi mbɔm, etua mi mbɔm: koro ubɔk Abasi otukde mi.

²²Mbufo enam didie ebine mi nte Abasi? Nsinam obukidem mi miyuhɔke mbufo?

²³Akpakam ewet ndien ikɔ mi! akpakam efik mmɔ esin ke ŋwed!

²⁴Eda nta ŋwed ukwak ye ŋket ekap ikɔ mi esin ke itiat ke nsinsi!

²⁵Ndien ami mmɔfiɔk nte ke Andifak mi odu uwem; ndien ke akpatre enye eyedaha ada ke ntan isɔŋ:

²⁶Ndien ke ikpɔhidem mi ama abiara ama, nyedu ke obukidem mi ŋkut Abasi:

²⁷Emi ndikutde ke idem mi, enyin mi eyenyuŋ ekut enye, idikwe owo efen; ŋkpɔ emi odude mi ke ikpanesit eyemere.

²⁸Koro mbufo edɔhɔde ete, Nnyin idinam didie ikɔbɔ enye? enyuŋ (edɔhɔ, ete ke) ekut mi ntak ikɔ ke idem;

²⁹Mbufo edikhe ofut ebaŋa idem mbufo: koro iyaresit eke odotde idiɔk ido edi ofut; man mbufo efiɔk ete ke ikpe mmɔŋ edi.