Read efik ŊWED JOB 2 Bible Online

ŊWED JOB 2 - efik bible

ŊWED JOB 2

¹EDIKEM ke usen kiet nditɔ Abasi eda idem mmɔ ediwut Jehovah, ndien Satan onyuŋ edi ke otu mmɔ, ndiwut Jehovah idem esie.

²Ndien Jehovah ɔdɔhɔ Satan, ete, Afo oto mmɔŋ? Ndien Satan ɔbɔrɔ Jehovah, onyuŋ ɔdɔhɔ, ete, Nto ndiyɔrɔ ke ererimbot, ye ke ndiyo ke esit.

³Ndien Jehovah ɔdɔhɔ satan, ete, Nte afo omotim ese owo mi Job? Koro owo eke ebietde enye miduhe ke ererimbot, ɔfɔn ama, onyuŋ enen, onyuŋ abak Abasi, onyuŋ afara ke idiɔk; enye onyuŋ osuk omum mfɔn-mma esie akama; ndien afo ama esin mi nsobo enye ke minyeneke ntak.

⁴Ndien satan ɔbɔrɔ Jehovah, ete, Ikpa ke ibuot ikpa, ye kpukpru se owo enyenede ke owo edinɔ ke ibuot uwem esie.

⁵Edi kam nyan ubɔk fo tuk ɔkpɔ esie, ye obukidem esie: enye iditreke ndikpɔŋ fi aŋwanaŋwa.

⁶Ndien Jehovah ɔdɔhɔ Satan, ete, Sese, enye odu fi ke ubɔk; edi kpeme uwem esie ikpɔŋ-ikpɔŋ.

⁷Ndien Satan adaha ke iso Jehovah, aka akada idiɔk oyo otim Job, ɔtɔŋɔde ke ikpat-ukot esie, tutu osim ke etiŋ-ibuot esie.

⁸Ndien enye ada mkpasip usiɔŋ akwat idem esie; onyuŋ ɔsuhɔre etie ke ntɔŋ.

⁹Ndien ŋwan esie ɔdɔhɔ enye, ete, Nte afo osuk omum mfɔnmma fo akama?

¹⁰Kpɔŋ Abasi, ndien kpa mkpa. Ndien enye ɔdɔhɔ ŋwan, ete, Afo ɔdɔhɔ nte ndisime ŋwan ɔdɔhɔde; nte nnyin ibɔ Abasi eti ŋkpɔ, ndien idibɔhɔ idiɔk ŋkpɔ ŋko? Ke ofuri ŋkpɔ emi Job inamke idiɔk ke mkpɔk-inua esie.

¹¹Edikem adaŋemi mme ufan Job ita ekopde kpukpru idiɔk ŋkpɔ oro ekesimde enye, mmɔ eto ke ebiet mmɔ edi; Eliphaz Temanite, ye Bildad Shuhite, ye Zophar Naamathite: ndien mmɔ ediomi kiet ye kiet, ete idi iditua ye enye, inyuŋ idɔŋ enye esit.

¹²Ndien mmɔ eda nsan-nsan emenere enyin mmɔ, edi idiɔŋɔke enye, ndien mmɔ emenere uyo mmɔ etua eyet; ndien kpukpru mmɔ ewak ekura mmɔ, enyuŋ eduɔk ntan ke ibuot mmɔ, ese enyɔŋ.

¹³Ntre ke mmɔ esuhɔre etie ye enye ke isɔŋ, ke usen itiaba ye ke okoneyo itiaba, baba owo kiet inyuŋ idɔhɔke enye ikɔ: koro mmɔ ekutde nte ndutuhɔ esie okponde eti-eti.