Read efik ŊWED JOB 20 Bible Online

ŊWED JOB 20 - efik bible

ŊWED JOB 20

¹NDIEN Zophar Naamathite ɔbɔrɔ, ete,

²Mmɔdo mme ekikere mi enɔde mi ibɔrɔ, oro esin mi ŋwara ŋko;

³Mmenyene ndikop mme nduari eke esuenede mi, ndien spirit eke otode ke eti-ibuot mi eyebɔrɔ ɔnɔ mi.

⁴Nte afo ɔkɔfiɔk emi tutuko, toto nte ekenim owo ke ererimbot,

⁵Ete ke mkpo mme idiɔk owo ibigike, idara oburobut owo onyuŋ odu ini esisit kpɔt?

⁶Idaha esie ama okoŋ nte enyɔŋ, ibuot esie ama onyuŋ osime ikpa-enyɔŋ:

⁷Enye atak ke nsinsi nte ifuɔ esie ndien mmɔ eke ekutde enye edɔhɔ, ete, Enye odu mmɔŋ?

⁸Enye adaha efe nte ndap, ndien mmɔ idikwe enye; enyuŋ ebin enye efep nte ŋkukut ke okoneyo.

⁹Enyin emi okokutde enye idikwe aba enye; ebiet esie idinyuŋ ikwe aba enye.

¹⁰Nditɔ esie eyenyene ndinem mme ubuene esit, ubɔk esie eyenyuŋ eyak inyene esie enɔ.

¹¹Uyen esie ke ɔkɔyɔhɔ enye mme ɔkpɔ, ndien eyesuhɔre ana ye enye ke ntan.

¹²Okposuk edi nte idiɔk ido eniŋede enye ke inua, enye odip enye ke idak edeme esie;

¹³Onim enye, inyuŋ ikpɔŋke, onyuŋ akama enye ke nsiŋ esie:

¹⁴Uyo esie akabare ke idibi esie, edi ifɔt urukikɔt ke idem esie.

¹⁵Enye ekemen inyene esin ke idibi, ndien eyekpɔhi mmɔ osio: Abasi eyesioŋo mmɔ ke idibi esie efep.

¹⁶Enye eyewap ifɔt urukikɔt: edeme ibɔm eyewot enye.

¹⁷Enye idikwe mme idim: mme akpa eke efiɔrɔde aran-ɔkwɔk ye edibari mmɔŋ-eba.

¹⁸Enye eyeyak se akpade utom ke esit, idinyuŋ imenke isin ke idibi: eyeyak ɔnɔ nte ekemde ye inyene esie, idinyuŋ idatke esit.

¹⁹Koro enye okotukde onyuŋ ɔkpɔŋde mme ubuene; ada ŋkanubɔk ɔbɔ ufɔk eke midige enye ɔkɔbɔp:

²⁰Koro enye mikɔfiɔkke nduɔk-odudu ke idibi esie; mikonyuŋ iyakke baba ŋkpɔ kiet eke enye oyomde ɔbɔhɔ:

²¹Baba ŋkpɔ kiet isuhɔke ke enye midiaha: mmɔdo mfɔniso esie midisɔŋɔke ida.

²²Enyin eyenan enye ke ini ŋkpɔ esie ewakde ekan: kpukpru ubɔk mbon-ukut eyesim enye.

²³Ama ekem enye (Abasi) eyedɔŋ ikaŋ iyaresit esie, ete ɔyuhɔ enye idibi, onyuŋ anam edep enye ke idem, nte udia esie.

²⁴Enye eyefehe ke iso ŋkpɔ-ekɔŋ ukwak, utiga okpoho eyetiga enye oyu.

²⁵Enye osio enye (idaŋ), ndien ɔwɔrɔ enye ke idem, edisem ŋkpɔ oro onyuŋ ɔwɔrɔ ke etidot esie: ndik edidoro enye ke idem.

²⁶Ofuri ekim odibe ke ebiet-unim-ŋkpɔ esie: ikaŋ eke owo mibarake eyeta enye: eyesobo se isuhɔde ke tent esie.

²⁷Ikpa-enyɔŋ eyeyarare idiɔk ido esie: isɔŋ eyenyuŋ adaha ke enyɔŋ anam ikɔ ye enye.

²⁸Inyene ufɔk esie eyesuana, eyedaha ke usen iyaresit esie.

²⁹Emi edi ubak emi idiɔk owo ɔbɔde Abasi, ye udeme emi Abasi, Ibom ekenimde ɔnɔ enye.