Read efik ŊWED JOB 22 Bible Online

ŊWED JOB 22 - efik bible

ŊWED JOB 22

¹NDIEN Eliphaz Temanite ɔbɔrɔ, ete,

²Nte owo ekeme ndidori Abasi udori, koro enyene-ibuot owo odorode idem esie udori?

³Nte enem Abasi Ibom esit koro afo enende? Nte enye okut udori ke afo anamde ido fo efɔn ema?

⁴Nte ndik fo edisin enye anam ikɔ etebe fi? Nte enye ediduk ikpe ye afo?

⁵Nte idiɔk ido fo ikponke? Nte mme ukwaŋ-ŋkpɔ fo inanake utit?

⁶Koro afo ɔkɔbɔde eyen-usɔ ubiɔŋ ke minyeneke ntak, okonyuŋ osiode mbon iferi edisine-ŋkpɔ ke idem efep.

⁷Afo unɔŋɔ owo mba mmɔŋ ɔŋwɔŋ; onyuŋ esin

⁸owo biɔŋ udia. Ndien owo ŋkanubɔk enyene ererimbot: mmɔ eke enyenede ukpono enyuŋ eduŋ ke esit.

⁹Afo ɔdɔŋ mme ebe-akpa eka ubɔk-ubɔk;

¹⁰ndien ubɔk nditɔ-akpa emebuŋɔ. Oro esin afia ekan fi ekuk:

¹¹ndik onyuŋ abuat fi enyeŋe; Ye ekim ŋko eke afo mukemeke ndikut ŋkpɔ; akamba ukwɔ mmɔŋ onyuŋ ofuk fi.

¹²Nte Abasi iduhe ke edikoŋ ikpa-enyɔŋ? Nyuŋ se ibuot ntantafiɔŋ nte mmɔ ekoŋde!

¹³Afo onyuŋ ɔdɔhɔ ete, “Abasi ɔfiɔk nso ŋkpɔ? Nte enye ekeme nditie ke edem ɔkpɔsɔŋ ekim ŋkpe ikpe?

¹⁴Idiɔk enyɔŋ edi ufuhɔŋkpɔ esie, ndien enye ikwe ŋkpɔ; enye onyuŋ asaŋa akanare ikpa-enyɔŋ.”

¹⁵Nte afo edisaŋa ke ŋkani usuŋ emi mme anam-idiɔk ekesaŋade?

¹⁶Emi ekemumde ke mika-ikemke ke ini, itie emi mmɔ edorode akabare edi akpa eke ɔfiɔrɔde:

¹⁷Emi edɔhɔde Abasi, ete, Nyɔŋ kpɔŋ nnyin: ndien Abasi Ibom anam mmimɔ nso ŋkpɔ?

¹⁸Ndien edi enye ɔdɔŋ ŋkpɔ ke ufɔk mmɔ ɔyɔhɔ. Yak uduak mme idiɔk owo ɔkpɔŋ mi anyan usuŋ.

¹⁹Ndinen owo ekut, enyuŋ edat esit: ndien owo eke miduehe isop esak mmɔ, ete,

²⁰“Kakpan ke emesibe mme asua nnyin efep ke isɔŋ, ikaŋ onyuŋ ata inyene mmɔ.”

²¹Tim fiɔk enye, ndien, nyuŋ tie ke emem: ntem ke ufɔn edisim fi.

²²Bɔ enye ibet ke inua: nyuŋ nim ikɔ esie ke esit fo.

²³Afo ama afiak etiene Abasi Ibom, eyediɔŋ ebɔp fi, ama anam idiɔk ido ɔkpɔŋ tent fo anyan usuŋ.

²⁴Nyuŋ bat gold ke ntan, bat gold Ophir ke mme itiat itihere:

²⁵Ndien Abasi Ibom eyedi gold fo, onyuŋ akabare edi idaŋ-idaŋ silver fo.

²⁶Koro afo eyedara Abasi Ibom, ndien, onyuŋ emenere iso fo ese Abasi.

²⁷Afo eyekpe enye ubɔk, ndien enye eyekop uyo fo: afo eyenyuŋ osio mme akaŋa fo.

²⁸Afo eyeduak ŋkpɔ, ndien ŋkpɔ oro eyeda ɔnɔ fi: uŋwana eyenyuŋ ayama ke usuŋ fo.

²⁹Ke ini emende owo eduɔk ke isɔŋ, afo eyedɔhɔ, ete, Emenere enim ke enyɔŋ: ndien eyenyaŋa owo eke ɔfuhɔde.

³⁰Enye eyeyak owo eke eduede isop ɔbɔhɔ: edisana ubɔk fo eyenam enye ɔbɔhɔ.