Read efik ŊWED JOB 28 Bible Online

ŊWED JOB 28 - efik bible

ŊWED JOB 28

¹KORO silver enyenede itie eke ekutde enye, gold onyuŋ enyene ebiet eke ediɔŋde enye:

²Esioŋo ukwak ke ntan; itiat onyuŋ aŋwaŋa okuk.

³Owo onim utit ɔnɔ ekim, onyuŋ otim ɔduŋɔre ama, oyom itiat ekim ye eke mfut mkpa.

⁴Enye otibi ukpe ɔkpɔŋ ebiet emi owo oduŋde; ukot efre mmɔ: mmɔ ekɔnɔ ufufum ekpɔŋ ebiet owo anyan usuŋ.

⁵Ama edi isɔŋ, udia oto ke esit; ndien eyut se idude ke esit ekabare nte ikaŋ.

⁶Mme itiat esie edi ebiet sapphire; enye onyuŋ enyene ntan o-gold:

⁷Usuŋ emi ke mbukpo ifiɔkke: enyin utere akanam inyuŋ ikwe enye:

⁸Nditɔ mme idiɔk unam idigike enye, lion inyuŋ isaŋake ke esit ibe.

⁹Enye anyan ubɔk otuk itiat a-fransi, odibere ikpɔ obot ke oruŋ oyut akabare onim.

¹⁰Enye otibi akpa ke ikpɔ itiat; enyin esie enyuŋ ekut kpukpru ŋkpɔ uto.

¹¹Enye ɔbɔp mme akpa mmɔŋ, ete ekudut; onyuŋ osioŋo se idibede onim ke uŋwana.

¹²Edi ama edi eti ibuot, ekut enye ke ebiet ewe? Ebiet asian onyuŋ odu mmɔŋ?

¹³Owo ifiɔkke ekɔm-urua esie, inyuŋ ikwe enye ke isɔŋ mme odu-uwem.

¹⁴Udem ete, Iduhe mi ke idem: inyaŋ ibom onyuŋ ɔdɔhɔ, ete, Iduhe ye ami.

¹⁵Inɔŋɔ gold ibɔ enye, inyuŋ idomoke silver ke ekɔm-urua esie:

¹⁶Idomoke enye ye gold Ophir, ke ɔsɔŋ-urua onyx ye eke sapphire.

¹⁷Ibatke enye ikem ye gold ye glass: inyuŋ idaha ŋkpɔ eti gold ikpuhɔ enye.

¹⁸Itiŋke ibaŋa coral ye crystal: ndien ndinyene eti ibuot ɔfɔn akan pearl.

¹⁹Ibatde topaz Ethiopia ikem ye enye; idomoke enye ke edisana gold.

²⁰Eti ibuot ndien oto mmɔŋ? Ndien enye ebiet asian?

²¹Ŋkɔm enye omodibe enyin kpukpru mme odu-uwem; enyuŋ efuk enye ebak mme inuen enyɔŋ.

²²Nsobo ye mkpa edɔhɔ ete, Nnyin imokop etop esie ke utɔŋ nnyin.

²³Abasi omotim okut usuŋ esie, omonyuŋ ɔfiɔk ebiet esie.

²⁴Koro enye esede mme utit ererimbot, onyuŋ okutde ŋkpɔ ke idak ofuri ikpa-enyɔŋ:

²⁵Ke anam ŋkpɔ-udomo ofum; onyuŋ odomo mmɔŋ esin ke ŋkpɔ-udomo.

²⁶Ke ini owukde ewuhɔ ɔnɔ edim; ye usuŋ obuma ke enyɔŋ atuakde:

²⁷Ndien enye okut, onyuŋ etiŋ enye; otim enye onim, onyuŋ ɔduŋɔre enye ŋko.

²⁸Ndien Enye ɔdɔhɔ owo, ete, Sese, ndibak Ɔbɔŋ edi eti ibuot, ndinyuŋ ŋkabare ŋkpɔŋ idiɔk edi asian.