Read efik ŊWED JOB 29 Bible Online

ŊWED JOB 29 - efik bible

ŊWED JOB 29

¹JOB onyuŋ amana etiŋ ikɔ esie, ete, Ŋkpakam ntie nte ke mme ɔfiɔŋ oko,

²ke mme usen oro Abasi ekekpemede mi:

³Ke ini utuenikaŋ esie ayamade mi ke ibuot, nnyuŋ nda uŋwana esie nsaŋa ke ekim.

⁴Kpa nte ŋkedide ke nsɔŋidem uyen mi, ke ini odu Abasi odude ke tent mi;

⁵Ke ini Abasi Ibom odude kaŋa ye ami, nditɔ mi enyuŋ ekande mi ekuk;

⁶Ke adaŋemi nyetde ikpat mi ke mmɔŋ-eba; ikpɔ itiat eke ekperede mi enyuŋ eŋwaŋa akpa aran.

⁷Ke adaŋemi, ŋwɔrɔde ŋka inua-otop ke obio, nnim ŋkpɔ-itie mi ke aŋwa:

⁸Mkparawa ekut mi, ndien eka ekedibe, ŋkani owo enyuŋ edaha ke enyɔŋ eda:

⁹Mbɔŋ efara ke ikɔ, enyuŋ edian ubɔk ke inua mmɔ.

¹⁰Ikpɔ owo edop uyo, edeme mmɔ onyuŋ adiana mmɔ ke nsiŋ.

¹¹Adaŋemi utɔŋ okopde, enye ɔkɔm mi: enyin onyuŋ okut, ndien edi ntiense mi:

¹²Koro ŋkanyaŋade eyen ubuene eke esemede, ye eyen akpa, ye owo eke owo miŋwamke.

¹³Ekɔm owo eke oyomde nditak osim mi; ami nnyuŋ ndat ebe-akpa esit.

¹⁴Nsine edinen ido ke idem, ndien enye ofuk mi: eti ido mi ebiet ekura ye anyanya.

¹⁵Ndi enyin mbon nnan, ami nnyuŋ ndi ukot mbuŋɔ.

¹⁶Ndi ete mme ubuene: nnyuŋ ntim nduŋɔre ikɔ owo eke mmemfiɔkke;

¹⁷Nnyuŋ mbuŋ idiɔk owo edet; nnyuŋ nsio enye se enye omumde mfep ke edet.

¹⁸Ndien ndɔhɔ nte, Nyekpa ke ufɔk mi, nnyuŋ mbigi usen emi ewakde nte ntan.

¹⁹Oruŋ mi asiaha tutu osim akpa, mbara onyuŋ ana ke ŋkɔk mi.

²⁰Ubɔŋ mi eyedi obufa ye ami; utiga mi eyenyuŋ okop idem ke ubɔk mi.

²¹Mmɔ ekop uyo mi, enyuŋ ebet, enyuŋ edop uyo enɔ item mi.

²²Ke ndɔhɔde mma, mmɔ idɔhɔke aba: uyo mi onyuŋ ɔtɔi mmɔ ke idem.

²³Mmɔ enyuŋ ebet mi nte edim: enyuŋ eŋwaŋade inua mmɔ enɔ ukperedem edim,

²⁴Ŋkpa mmɔ eke minimke ke akpanikɔ imam; mmɔ inyuŋ inamke uŋwana iso mi okpuk.

²⁵Ami mmek usuŋ mmɔ, nnyuŋ ntie nte etubom, nnyuŋ nduŋ nte edidem ke otu udim, ye nte owo eke ɔdɔŋde mme atuaeyet esit.