Read efik ŊWED JOB 3 Bible Online

ŊWED JOB 3 - efik bible

ŊWED JOB 3

¹KE ŋkpɔ emi ebede, Job atat inua esie, onyuŋ osuŋi usen esie.

²Ndien Job ɔbɔrɔ, onyuŋ ɔdɔhɔ, ete,

³Uwemeyo oro ŋkamanade ke esit akpakam atak, ye okoneyo oro ɔkɔdɔhɔde ete, Ke eyomo eyen-eren.

⁴Usen oro! yak enye okim; Abasi ke enyɔŋ okuyom enye, uŋwana okunyuŋ asiaha ke esit.

⁵Yak ekim ye mfut mkpa etɔŋɔ ntak eda enye; yak idiɔk enyɔŋ oduŋ ke esit: yak akpakop ndik usen esin enye edige.

⁶Okoneyo oro! yak ɔkpɔsɔŋ ekim ada enye, enye okudat esit ke otu mme usen isua, okuduk ke otu ibat mme ɔfiɔŋ.

⁷Sese, okoneyo oro! yak enye edi ada, mkpo idara okuduk ke esit.

⁸Yak mmɔ eke esuŋide usen esuŋi enye, emi efiɔkde ndidemere leviathan.

⁹Yak ntantafiɔŋ mfuŋmfuŋ mbubreyo esie ekim; yak enye etie ebet uŋwana, ndien okukut; kunyuŋ uyak enye okut mkpɔk-enyin usiere.

¹⁰Koro enye mikesirike usuŋ idibi inɔ mi, mikonyuŋ idipke mi ukut ke enyin.

¹¹Nsinam mme ŋkpaha ke ini ŋkotode ke itie eyen? Nsinam mmennimeke ke ini ŋkotode ke idibi?

¹²Anam didie edɔŋ iba ekekama mi? Anam didie eba iba ŋko emi ŋkewapde?

¹³Koro ke ini oro ke ŋkpana, nnyuŋ ndu ke ifure, ŋkpede idap, nnyuŋ nduɔk odudu,

¹⁴Ye ndidem, ye mme ɔnɔ-item ererimbot, emi ekediɔŋde ŋwure enɔ idem mmɔ;

¹⁵Ye mbɔŋ ŋko emi ekenyenede gold, emi ekedade silver eyɔhɔ ufɔk mmɔ:

¹⁶Ŋkpoduhe uwem ŋko nte edidibe ukeŋ eyen, nte nsek nditɔ emi akanam mikwe uŋwana.

¹⁷Do ke mme idiɔk-owo etre afanikɔŋ; do ke mme akpa-mba enyuŋ eduɔk odudu:

¹⁸Mbon ŋkpɔkɔbi etie suŋ ɔtɔ kiet; ikopke uyo owo eke efikde mmɔ;

¹⁹Ekpri ye akamba enyuŋ edu do ŋko; ofin onyuŋ ɔbɔhɔ ete esie.

²⁰Nsinam enye adade uŋwana ɔnɔ mbon ukut, ada uwem ɔnɔ mbio eke esit odorode mmɔ:

²¹Eke mkpa ɔdɔŋde mmɔ, edi mkpa iduhe; eke enyuŋ etibide isɔŋ eyom enye ekan edidibe inyene;

²²Eke edatde esit akamba idaresit, enek unek ke mmɔ ekutde udi?

²³(Nsinam enye adade uwem) ɔnɔ owo eke usuŋ esie odibede, eke Abasi ama onyuŋ esin ɔkɔ abaha enye akan okuk?

²⁴Koro mmum mi edide kpa nte udia mi, eseme mi onyuŋ ɔbuŋɔ ɔwɔrɔ nte mmɔŋ.

²⁵Koro ŋkefehede ndik, ndien enye omosim mi, se ndikhede omonyuŋ etiene mi.

²⁶Nnyeneke ifure, nnyuŋ nnyeneke nduɔkodudu, nnyuŋ nnaŋa suŋ; edi ukut osuk ededi.