Read efik ŊWED JOB 30 Bible Online

ŊWED JOB 30 - efik bible

ŊWED JOB 30

¹NDIEN ke emi mmɔ esak mi nsahi, kpa mbon emi edide nditɔwɔŋ ye ami, emi ŋkpesinde ndida mme ete mmɔ nnim ye mme ebua ŋkpri ufene mi.

²Odudu ubɔk mmɔ onyuŋ ɔfɔn mi nso ŋko? usɔŋ atak ye mmɔ.

³Idem ɔdiɔk mmɔ ke unana ye biɔŋ: mmɔ eta edisat isɔŋ emi edide ikpikpu ye desert tutuko.

⁴Mmɔ edibere mallow ke ikɔt: oruŋ broom onyuŋ edi uyo mmɔ.

⁵Ebin mmɔ ke otu owo efep: efiori mmɔ ke edem nte inɔ;

⁶Mmɔ eduŋ ke ebedeŋ ndik: ndudu isɔŋ ye ikpɔ itiat:

⁷Mmɔ efiori ke ikɔt; edɔŋɔ ke ikɔt akpap.

⁸Nditɔ ndisime, ye nditɔ owo eke minyeneke enyin, ke ebin mmɔ ke isɔŋ efep.

⁹Ndien ke emi ami ndi ikwɔ mmɔ, nnyuŋ ŋkabare ndi ufiet mmɔ.

¹⁰Mmɔ ese mi ke mbubiam, ekpɔŋ mi anyan usuŋ, inyuŋ itreke ndifiari mi etap ke iso.

¹¹Koro enye amatat uruk mi onyuŋ otuk mi, mmɔdo mmɔ eyak uruk inua ke iso mi.

¹²Nditɔ unam edaha da mi ke ubɔk nnasia enuk ukot mi efep; enyuŋ ediɔŋ usuŋ nsobo mmɔ ese mi.

¹³Mmɔ ebiat usuŋ mi enam nsobo mi aka iso, owo eke aŋwamde mmɔ iduhe.

¹⁴Mmɔ ebuŋɔ edi nte akamba ibibene ɔduɔde; ekpot edi nte ŋwure.

¹⁵Ŋkpɔ ndik akabare esim mi: ebin ubɔŋ mi nte ofum: ifure mi onyuŋ asuana nte obubit enyɔŋ.

¹⁶Ndien ke emi ukpɔŋ mi atara mi ke idem: mme usen ukut emum mi.

¹⁷Okoneyo otibi mme ɔkpɔ mi osio mi ke idem efep; ndien mmɔ eke etade mi iduɔkke odudu.

¹⁸Akamba odudu esie (udɔŋɔ) esin enye akabare edi edisine-ŋkpɔ mi: efik mi nte itɔŋ ɔfɔŋ idem mi.

¹⁹Enye emen mi ɔduɔk ke mbat, mmonyuŋ ŋkabare mbiet ntɔŋ ye ntan.

²⁰Nseme ŋkot fi, ndien afo uyereke mi: ndaha nda, ndien afo etiŋ mi enyin ke idem.

²¹Afo amakabare ɔsɔŋ ido ye ami: ada ɔkpɔsɔŋ ubɔk fo ɔkɔbɔ mi.

²²Afo emenere mi ɔnɔ ofum, odori mi ke esit, ndien oyobio asuan mi.

²³Koro mmɔfiɔk nte ke afo edida mi aka mkpa, ye ke ufɔk emi mme andidu uwem esopde.

²⁴Nte owo eke odude ke ŋwure inyanke ubɔk? owo etie ke itie ukut, nte isemeke eseme ibaŋa oro?

²⁵Nte ntuaha eyet mbaŋa owo eke iso ɔdiɔkde enye? Nte esit mi iduhɔ ibaŋa mme ubuene?

²⁶koro ndoride enyin ke nti ŋkpɔ, ndien idiɔk edi: mbet uŋwana, ndien ekim edi.

²⁷Nsia oyomo mi, inyuŋ itreke: ini ukut okosim mi.

²⁸Nsasaŋa ke mfuhɔ, ndien utin iduhe, ndaha ke enyɔŋ, ntua ke akwa esop.

²⁹Ŋkabare ndi eyen-eka jackal, nnyuŋ ndi nsaŋa mme ostrich.

³⁰Ikpɔhidem mi ebire, onyuŋ ɔfɔrɔre mi ke idem: mme ɔkpɔ mi enyuŋ esak ke ufiop.

³¹Harp mi omonyuŋ akabare edi eseme; ifiom mi omonyuŋ akabare edi uyo mme atua-eyet.