Read efik ŊWED JOB 31 Bible Online

ŊWED JOB 31 - efik bible

ŊWED JOB 31

¹MMODIOMI ediomi ye enyin mi; nnam didie, ndien, ntiŋ enyin eyen-aŋwan ke idem?

²Ndien nso udeme Abasi okpoto ke enyɔŋ? Nso ŋkpɔ ke Abasi Ibom ekpetie ke enyɔŋ ɔnɔ mi ndia?

³Nte nsobo inyeneke mme idiɔk owo?

⁴Nte utibe ufen inyeneke mme anam-ukwaŋ-ŋkpɔ? Nte idige enye okut usuŋ mi, onyuŋ abat kpukpru ikpat mi?

⁵Edieke nsaŋade ye nsu, ukot mi onyuŋ ɔsɔpde ebine ŋkari;

⁶Yak edomo mi ke balance eke enende: yak Abasi onyuŋ ɔfiɔk ete ke mfɔn mma.

⁷Edieke ikpat ukot mi ewahade ekpɔŋ usuŋ, esit mi onyuŋ ebine enyin mi, ndek onyuŋ adiana mi ke ubɔk;

⁸Yak ami ntɔ, ndien owo eŋwen adia, yak enyuŋ edibere nditɔ mi.

⁹Edieke nyakde esit mi etiene ŋwan, nnyuŋ ndibe ke inua-otop mbɔdiduŋ mi:

¹⁰Yak ŋwan mi ɔkɔk ɔnɔ owo eŋwen, owo eŋwen enyuŋ efiɔk enye.

¹¹Koro emi edide oburobut ŋkpɔ; ye idiɔk ido ke eke mme ebierikpe.

¹²Koro emi edide ikaŋ eke atade tutu osobo, okponyuŋ odibere ofuri mbuŋwum mi.

¹³Edieke nsede ikɔ ofin eren mi, mme eke ofin aŋwan mi ke ndek, adaŋemi mmɔ edukde ikpe ye ami;

¹⁴Ndinam didie ndien ke ini Abasi edidahade ke enyɔŋ? ndinyuŋ mbɔrɔ enye didie ke ini obupde?

¹⁵Nte idige andinam mi ke idibi akanam enye? Nte idige kiet okobot nnyin ke itie-eyen?

¹⁶Edieke ŋkesinde mme ubuene ŋkpɔ eke mmɔ eyomde, nnyuŋ nnamde enyin anan ebe-akpa;

¹⁷Nnyuŋ ndiade ŋkeŋe mi ke idem mi ikpɔŋ, ndien eyen-akpa midiaha ke esit:

¹⁸Koro toto uyen mi enye ɔkɔri ye ami nte ete, mmannyuŋ nda enye (ŋwan) usuŋ, toto nte ŋkamamana.

¹⁹Edieke ŋkokutde nte owo atakde ke unana edisine-ŋkpɔ, mme ŋkut mme ubuene nte mifukke ŋkpɔ ke idem:

²⁰Isin esie mikɔmke mi, idet erɔŋ mi mikonyuŋ inamke idem ofiop enye;

²¹Edieke ŋkemenerede ubɔk mi ntuk eyen-akpa, koro ŋkutde mmɔ eke eŋwamde mi ke inua-otop;

²²Yak afara mi oto ke itɔŋ ɔduɔ ke isɔŋ, yak enyuŋ ebuŋ ubɔk mi ke ɔkpɔ efep.

²³Koro nsobo Abasi ekpedide ŋkpɔ ndik mi, ndien oto koro Enye okoŋde, ŋkpekemeke ndida.

²⁴Edieke nnimde gold ke idori-enyin mi, nnyuŋ ndɔhɔ ata eti gold, nte, Afo edi mbuɔtidem mi:

²⁵Edieke ndatde esit, koro inyene mi okponde, koro ubɔk mi okutde ediwak ŋkpɔ ŋko:

²⁶Edieke ŋkesede utin adaŋemi enye ayamade, ye ɔfiɔŋ nte enye asaŋade ataitai;

²⁷Ndien etap esit mi ke ndibe, nnyuŋ ntem ubɔk mi ke inua mi:

²⁸Oro okponyuŋ edi idiɔk ŋkpɔ ke eke mme ebierikpe, koro ŋkposude nsu nnɔ Abasi ke enyɔŋ.

²⁹Edieke nsobo usua mi ekenemde mi esit, mme ŋkadatde esit koro enye okutde idiɔk:

³⁰Edi ŋkayakke inua mi anam idiɔk, nnyuŋ nyomde se idiɔkde ye ukpɔŋ esie.

³¹Edieke mbio tent mi midɔhɔke, ite, Anie ekeme ndisiak owo eke unam esie

³²miyuhɔke? Esen owo idaŋke ke aŋwa, nsio usuŋ mi nnɔ owo isaŋ.

³³Edieke ŋkofukde idiɔk ido mi nte Adam, nnyuŋ ndipde oburobut ido mi ke ikpanesit mi,

³⁴Koro mfehede ererimbot, koro nsahi mme esien onyuŋ anamde mi ndikhe, ndien ndop uyo, ndien ntoho ke inua-otop ŋwɔrɔ.

³⁵Akpakam ŋkut owo eke okpokopde uyo mi; se idiɔŋɔ mi; yak Abasi Ibom eyere mi: yak owo utɔk mi ewet ŋwed.

³⁶Ŋkpadian enye ke afara, ŋkpayara enye ke ibuot nte anyanya;

³⁷Ŋkpetiŋ ibat ikpat ukot mi nnɔ enye; ŋkpasaŋa ŋkpere enye nte ɔbɔŋ.

³⁸Edieke iŋwaŋ mi esemede abaŋa mi, mme furrow esie enyuŋ etuade eyet ŋko;

³⁹Edieke ŋkadiade mbuŋwum esie, ndien mmennɔŋɔ okuk, nnyuŋ nsinde mme andinyene enye eduɔk uwem;

⁴⁰Yak mbarekpe otibe ke ibuot wheat; yak oto onyuŋ otibe ke ibuot barley. Uyo Job omokure.