Read efik ŊWED JOB 32 Bible Online

ŊWED JOB 32 - efik bible

ŊWED JOB 32

¹NDIEN owo mbita emi etre ndibɔrɔ Job: koro enye abatde idem esie ke edinen.

²Ndien esit ayat Elihu eyen Barachel, eyen Buz, emi okotode ke oruk Ram; enye ayat esit ye Job, koro enye onimde idem esie ke edinen akan Abasi.

³Enye onyuŋ ayat esit ye mme ufan esie mbita, koro mmɔ mikwe nte ebɔrɔde, ndien ese Job ke idiɔk.

⁴Ndien Elihu ebet Job tutu enye etiŋ ama: koro mmɔ esɔŋɔde enye.

⁵Ekem adaŋemi Elihu okutde ete ke ibɔrɔ iduhe owo mbita oro ke inua, esit ayat enye.

⁶Ndien Elihu eyen Barachel, eyen Buz, ɔbɔrɔ, onyuŋ ɔdɔhɔ ete, Ami ndi eyenɔwɔŋ, ndien mbufo edi mbiowo: mmɔdo ndikhede, nnyuŋ mfehede ndiwut mbufo ifiɔk mi.

⁷Ndɔhɔ nte, Yak mme usen etiŋ ikɔ, yak ediwak isua enyuŋ eteme owo ifiɔk.

⁸Edi spirit odu owo ke idem: spirit Abasi Ibom onyuŋ asian mmɔ ŋkpɔ.

⁹Idige ikpɔ owo edi ɔniɔŋ: inyuŋ idige mbiowo etim efiɔk ikpe.

¹⁰Mmɔdo ŋkɔdɔhɔde nte, Kop uyo mi: ami ŋko nyewut ifiɔk mi.

¹¹Sese, ŋkebet uyo mbufo: ŋkpaŋ utɔŋ ke asian mbufo, adaŋemi mbufo eduŋɔrede ikɔ (eke etiŋde).

¹²Nnyuŋ nnim mbufo ibuot ke idem, ndien, sese, baba owo kiet eke ekemede ndidop Job inua, nnyuŋ mbɔrɔ ikɔ esie, iduhe ke otu mbufo. Mbak mbufo ekpedɔhɔ ete:

¹³“Nnyin imekut ifiɔk. Ke edi Abasi akan enye, ke idige owo.”

¹⁴Enye iketiŋke ikɔ esie ibaŋa mi; ami ndinyuŋ ndaha ikɔ mbufo mbɔrɔ enye.

¹⁵Idem akpa mmɔ: mmɔ ibɔrɔke aba ikɔ: ebɔ mmɔ uyo efep.

¹⁶Ami nnyuŋ ntie mbet, koro mmɔ midɔhɔke ikɔ, koro mmɔ edade da, minyuŋ ibɔrɔke aba;

¹⁷Ami ŋko nyebɔrɔ udeme mi: ami ŋko nyewut ifiɔk mi.

¹⁸Koro ikɔ ɔyɔhɔde mi ke idem, spirit emi odude mi ke idibi onyuŋ edemere mi.

¹⁹Sese, idibi mi ebiet wine eke mifahakede, ebiet mbufa ikpa, ke oyom ndisiaha.

²⁰Nyetiŋ ikɔ man ibifik aŋwaŋa mi: nyetat mkpɔk-inua mi, nnyuŋ mbɔrɔ.

²¹Yak ŋkukam nteŋe owo enyin, ŋkunyuŋ nnem inua nnɔ owo:

²²andibot mi ikpebigike ndida mi mfep.