Read efik ŊWED JOB 33 Bible Online

ŊWED JOB 33 - efik bible

ŊWED JOB 33

¹KOP, ndien, uyo mi, O Job, mbɔk, nyuŋ kpaŋ utɔŋ ke kpukpru ikɔ mi:

²Sese, mbɔk, mmatat inua mi: edeme mi ɔdɔhɔ ke nsiŋ mi.

³Uyo mi oto ke edinen esit mi: mkpɔk-inua mi enyuŋ etim etiŋ se mfiɔkde.

⁴Spirit Abasi akanam mi: ibifik Abasi Ibom okonyuŋ onim mi ke uwem.

⁵Edieke afo ekemede ndibɔrɔ mi, tim ikɔ fo ke iso mi, daha da.

⁶Sese, ami ŋkem ye afo ke iso Abasi: ekebot mi ŋko ke mbat.

⁷Sese, ndik mi idinamke fi efehe: mbiomo mi idinyuŋ idobike fi ke idem.

⁸Ŋkɔm afo ɔkɔdɔhɔ ke utɔŋ mi, nnyuŋ ŋkop uyo ikɔ fo, ete:

⁹“Ami ndi edisana: idiɔk ido iduhe: ndeheke; ukwaŋ-ŋkpɔ inyuŋ iduhe mi ke idem.

¹⁰Sese, enye oyom mi ikɔ, abat mi ke usua esie.

¹¹Enye esin ukot mi ke ebuka, onyuŋ ekpeme ofuri usuŋ mi”.

¹²Sese, afo unenke ke ŋkpɔ emi: nyebɔrɔ fi koro Abasi okponde akan owo.

¹³Nsinam afo ɔtɔhɔde ye enye, koro enye mibɔrɔke ibaŋa ŋkpɔ esie baba kiet?

¹⁴Koro Abasi ɔdɔhɔde ini kiet, ye utim ikaba, ndien owo ikereke enye.

¹⁵Ke ndap, ke ŋkukut okoneyo, ke ini ɔkpɔsɔŋ idap ɔduɔde owo ke idem: ke eride idap ke bed;

¹⁶Ndien enye ɔfuhɔre owo utɔŋ, onyuŋ onim item mmɔ idiɔŋɔ,

¹⁷Man enye akabare owo ke idiɔk ido esie efep, onyuŋ odip owo iseri.

¹⁸Enye osio ukpɔŋ esie ke udi efep, onyuŋ onim uwem esie, mbak editak ke ofut.

¹⁹Enyuŋ enɔ enye ufen ke ubiak ke bed esie; eŋwan inyuŋ idopke ke mme ɔkpɔ esie:

²⁰Ndien uwem esie asasua udia; ukpɔŋ esie onyuŋ asua edinen udia.

²¹Obukidem esie eyemere tutu owo ikwe enye; ndien mme ɔkpɔ esie emi mikekwe, eyaŋade.

²²Ukpɔŋ esie onyuŋ ekpere udi; uwem esie onyuŋ ekpere mmɔ eke ewotde owo.

²³Edieke isuŋutom odude ye enye, andisine-ke-ufɔt, kiet ke otu tɔsin, eke owutde owo eti ido esiemɔ:

²⁴Ndien Enye atua enye mbɔm, onyuŋ ɔdɔhɔ ete, Fak enye mbak edisuhɔre ke udi: mmokut ŋkpɔ usio-isop.

²⁵Obukidem esie akabare nsek akan eke eyenɔwɔŋ: enye eyefiak ke mme usen uyen esie:

²⁶Eyekpe Abasi ubɔk, ndien Abasi ɔfɔn ye enye; ndien enye okut iso Abasi ke idara; ndien Enye eyenɔ owo ŋkpɔ eke esaŋade ye eti ido esie.

²⁷Enye ɔkwɔ ɔnɔ owo, onyuŋ ɔdɔhɔ, ete, “Ŋkanam idiɔk, nnyuŋ ŋkwaŋa se inende: ndien isioho usiene ye ami:

²⁸Enye afak ukpɔŋ mi, ete okube oduk ke udi, uwem mi onyuŋ okut uŋwana.”

²⁹Sese, Abasi anam kpukpru ŋkpɔ ye owo utim ikaba mme utim ikata.

³⁰Man osio uwem esie ke udi efep afiak edi, man aŋwaŋa enye ke uŋwana uwem.

³¹Tim kpaŋ utɔŋ, O Job, kop uyo mi; dop uyo, ndien ami nyemana ntiŋ ikɔ.

³²Afo ama enyene ikɔ bɔrɔ mi: dɔhɔ, koro erise fi ke edinen adatde mi esit.

³³Midige ntre, afo kop uyo mi: dop, ndien nyeteme fi mbufiɔk.