Read efik ŊWED JOB 34 Bible Online

ŊWED JOB 34 - efik bible

ŊWED JOB 34

¹NDIEN Eihu ɔbɔrɔ onyuŋ ɔdɔhɔ, ete,

²Mbufo mbon eti-ibuot, ekop uyo mi: mbufo mme ɔfiɔk ŋkpɔ owo enyuŋ ekpaŋ utɔŋ enɔ mi.

³Koro utɔŋ odomode ikɔ, nte emi nsiŋ atabide udia.

⁴Yak nnyin imek se inende ke idem nnyin; yak nnyin ifiɔk ŋkpɔ eke ɔfɔnde ke otu nnyin.

⁵Koro Job ɔdɔhɔde, ete, “Ami mmɔfɔn; Abasi omonyuŋ ɔbɔ mi se inende ye ami.

⁶Nte ŋkposu nsu ndian edinen ido mi?

⁷Unan mi omodoro ufiɔn, ndien isop iduhe.” Anie owo ebiet Job?

⁸Enye ɔŋwɔŋ nsahi nte mmɔŋ: Onyuŋ aka akabuana ŋkpɔ ye mme anam-idiɔk, onyuŋ asaŋa nsaŋa ye mme idiɔk owo:

⁹Koro enye ɔdɔhɔde ete, “Idoroke owo udori, ke owo anamde ufan ye Abasi.”

¹⁰Mbufo mbon eti-ibuot, ekop ndien uyo mi. Nsa Abasi, enye idiɔkke. Nsa Abasi Ibom, enye inamke ukwaŋ-ŋkpɔ.

¹¹Koro enye eyeda se owo anamde osio usiene ye owo, onyuŋ anam owo okut nte asaŋade ye ido owo.

¹²Kakpan Abasi ikemeke ndinam idiɔk, Abasi Ibom inyuŋ ikwaŋake ikpe.

¹³Anie owo okonim enye, ete enye akama isɔŋ? Anie onyuŋ otim ererimbot kpukpru?

¹⁴Edieke enye ekerede owo, onyuŋ ataŋde spirit esie ye ibifik esie ɔnɔ idem esie;

¹⁵Ofuri obukidem eyekpa ini kiet: owo onyuŋ afiak ke ntan.

¹⁶Kam nyene ibuot, kop ikɔ emi, nyuŋ kpaŋ utɔŋ ke uyo ikɔ mi.

¹⁷Nte owo eke asuade se inende ŋko edida ubɔŋ? Nte afo onyuŋ ekeme ndinam ikpe otip eti ye ɔkpɔsɔŋ owo?

¹⁸Nte owo edidɔhɔ edidem, ete, Oburobut owo? ɔdɔhɔ ikpɔ owo, ete, Idiɔk?

¹⁹Man ɔdɔhɔ enye emi miteŋeke mbɔŋ enyin, minyuŋ isehe mbon inyene ikan ubuene: koro edi ubɔk esie akanam kpukpru.

²⁰Mmɔ ekpaŋa ke idaha kiet; ke ufɔt okoneyo ke mbio-obio etimere enyuŋ edaŋa: eda mkpɔsɔŋ owo efep, inamke ke ubɔk.

²¹Koro enyin esie esede usuŋ owo, onyuŋ okutde kpukpru ikpat esie.

²²Ekim iduhe, mfut mkpa inyuŋ iduhe, eke mme anam-idiɔk ekemede ndidibe do.

²³Koro enye mikpaha nditiŋ enyin esie ke idem owo anyan ini, ke ini owo akade ikpe ke iso Abasi.

²⁴Enye anuak mkpɔsɔŋ owo mbak-mbak, ndien iduŋɔke, onyuŋ emenere owo efen onim ke itie mmɔ.

²⁵Mmɔdo enye otimde ɔfiɔk se mmɔ enamde, oyut mmɔ akabare onim ke okoneyo, ndien mmɔ enuaha.

²⁶Koro mmɔ ediɔkde, enye ɔtɔ mmɔ ke ɔtɔ eke kpukpru owo ekutde;

²⁷Oto koro mmɔ ekefiakde ekpɔŋ enye, minyuŋ ikereke usuŋ esie baba kiet;

²⁸Ndinam eseme mme ubuene osim enye, ndien enye okop eseme mbon-ukut.

²⁹Ke ini enye ɔnɔde owo ifure, anie ekeme ndinam ikpe otip owo? Ndien adaŋemi enye ofukde iso, anie ekeme ndise enye? Anam ubɔk kiet ye ofuri idut ye owo kiet:

³⁰Man oburobut owo okuda ubɔŋ, okunyuŋ omum mbio-obio ke afia.

³¹Nte owo edidɔhɔ abasi, ndien, ete, Mmada ufen, ndien nnamke idiɔk?

³²Afo teme mi kɔrɔ ye se ŋkutde: edieke ŋkanamde idiɔk, ndinamke aba.

³³Nte enye edisio usiene nte afo esede? koro afo asuade, mmɔdo afo enyenede ndimek, idige ami: dɔhɔ ndien se afo ɔfiɔkde.

³⁴Mbon eti ibuot eyedɔhɔ mi, ye ɔfiɔk ŋkpɔ owo eke okopde uyo mi, ete,

³⁵Job idɔhɔkɔ ke ifiɔk, uyo esie inyuŋ idige ɔniɔŋ.

³⁶Mmoyom nte ekpedomode Job ekure, ebaŋa ibɔrɔ esie ke otu mme idiɔk owo.

³⁷Koro enye ɔkɔrɔde nsɔŋ ibuot ke idiɔk ido esie: akwak ubɔk ke otu nnyin: onyuŋ etiŋ ediwak ikɔ abaŋa Abasi.