Read efik ŊWED JOB 36 Bible Online

ŊWED JOB 36 - efik bible

ŊWED JOB 36

¹NDIEN Elihu amana etiŋ, ete,

²Bet mi esisit, ndien nyesian fi; koro ikɔ eke abaŋade Abasi osuk.

³Nyeda ifiɔk mi ke anyan ebiet ndi, nnyuŋ nnim andibot mi ke edinen.

⁴Koro ke akpanikɔ uyo mi idige nsu: owo eke otimde ndifiɔk ŋkpɔ odu ye afo.

⁵Sese, Abasi edi ɔkpɔsɔŋ, inyuŋ isinke ŋkpɔ ke ndek: enye ɔsɔŋ ke odudu esit.

⁶Enye inimke mme idiɔk owo uwem: edi ɔnɔ suŋ suŋ owo se inende.

⁷Enye idorokede nti owo enyin esiemɔ ifep: enye odu ye ndidem ŋko ke ebekpo; ayak mmɔ etie ke nsinsi, ndien mmɔ eforo.

⁸Ndien ema ekɔbi mmɔ ke ŋkpɔkɔbi, ema enyuŋ ebɔp mmɔ ke uruk nnan-enyin;

⁹Ntem ke enye owut mmɔ se mmɔ ekenamde, ye idiɔk ido mmɔ emi esɔŋde ubɔk enam.

¹⁰Enye onyuŋ aŋwaŋade mmɔ utɔŋ ɔnɔ item, onyuŋ ɔdɔhɔ mmɔ, ete efiak edem ekpɔŋ ukwaŋ-ŋkpɔ.

¹¹Edieke mmɔ ekopde, enyuŋ enamde, mmɔ ema uwem mmɔ ke ufɔn, ye mme isua mmɔ inem inem.

¹²Edi edieke mmɔ mikopke, ofut emen mmɔ efep, ndien mmɔ ekpaŋa ke ndisime.

¹³Ndien mmɔ eke edide oburobut ke esit ekɔt iyaresit: mmɔ inyuŋ isemeke ke ini enye ɔbɔpde mmɔ.

¹⁴Mmɔ ekpaŋa ke uyen, uwem mmɔ onyuŋ odu ye mbon use.

¹⁵Enye osio owo ukut ke ukut esie efep, onyuŋ aŋwaŋade mmɔ utɔŋ ke nnaneyin.

¹⁶Enye eyesio fi ŋko ke inua utuk oduk ke oyoŋ ebiet, eke baba se ifahade miduhe; ndien ikpɔŋ ɔyɔhɔ ke ŋkpɔ eke enimde ke okpokoro fo.

¹⁷Ndien ikpe idiɔk owo ɔyuhɔ fi: ikpe ye ufen emum kiet eken.

¹⁸Koro iyaresit odude, kpeme mbak enye ada ufen ebin fi efep: ndien kuyak akamba inyene ufak abiaŋa fi.

¹⁹Nte enye edikere inyene fo? Enye ikereke edifɔn gold, inyuŋ ikereke ofuri ukeme odudu.

²⁰Kuyom okoneyo emi mme idut etode ke ebiet mmɔ edɔk.

²¹Kpeme idem fo, mbak edikabare ke idiɔk ido: koro afo emekde emi akan ukut.

²²Sese, Abasi ke okoŋ ke odudu esie: anie eteme nte enye?

²³Anie owo eteme enye usuŋ esie? Anie onyuŋ ekeme ndidɔhɔ, ete,

²⁴Afo amanam idiɔk? Tim ti ndikpono utom esie emi owo ekwɔde.

²⁵Kpukpru owo emekut enye: owo emekeme nditie nsan nsan nse enye.

²⁶Sese, Abasi omokpon, nnyin inyuŋ ifiɔkke enye: ibat isua esie inyeneke eriduŋɔre.

²⁷Koro enye okotde ntɔi mmɔŋ: mmɔ edep nte edim ke ntuhube esie,

²⁸Emi mbubit enyɔŋ ekeŋde, etɔi ediwak owo ke idem.

²⁹Ndien ŋko nte owo emekeme nditim mfiɔk usuŋ nte eneŋerede ikpa enyɔŋ, uyom tent esie.

³⁰Sese, enye ada uŋwana esie ebri enye ke enyɔŋ, onyuŋ ɔfiɔk isɔŋ akwa mmɔŋ.

³¹Koro enye adade mmɔ ekpe ikpe ye mme idut: ɔnɔ ata ediwak udua.

³²Enye ada uŋwana ofuk ubɔk esie mbiba: ndien eteme enye nte owo eke ɔtɔde (owo).

³³Uyom esie asian owo abaŋa enye: asian ufene ŋko, ete ke enye asaŋa ekpere.