Read efik ŊWED JOB 4 Bible Online

ŊWED JOB 4 - efik bible

ŊWED JOB 4

¹NDIEN Eliphaz Temanite ɔbɔrɔ, ete,

²Owo ama odomo ndineme ye afo, nte ediyat fi esit? Edi anie ekeme ndifara ke ikɔ?

³Sese, afo eketeme ediwak owo, onyuŋ anam mmemmmem ubɔk esɔŋɔ.

⁴Ikɔ fo ekemenere owo eke oyomde ndiduɔ, afo okonyuŋ anam mfummfum edɔŋ esɔŋɔ.

⁵Edi ke emi enye omosim fi, ndien esit ayat fi; enye otuk idem fo, ndien esit ɔduɔ fi.

⁶Nte uteŋe emi afo eteŋede Abasi idige mbuɔtidem fo?

⁷Nte nti ido fo inyuŋ idige idorienyin fo? Mbɔk, ti, anie owo eke miduehe isop akatak? Ndien ke ebiet ewe ke ekesobo edinen owo?

⁸Kpa nte ŋkokutde, mmɔ eke efuŋde idiɔk-ŋkpɔ enyuŋ etɔde ibak, edɔk suk oro.

⁹Ibifik Abasi osobo mmɔ, oyobio iyaresit esie onyuŋ asuan mmɔ.

¹⁰Ŋkuni lion, ye uyo afai lion, ye ndet akparawa lion emebuŋɔ.

¹¹Ɔkpɔsɔŋ lion asaŋa oyo ke unana udia, nditɔ uman lion enyuŋ esuana.

¹²Ndien ŋko ikɔ okosim mi ke ndibe, utɔŋ mi onyuŋ ada enye nte odu.

¹³Ke ekikere emi etode ke ŋkukut ke okoneyo, ke ŋkpɔsɔŋ idap ɔduɔde owo ke idem.

¹⁴Ndik anam mi ye unyekidem, onyuŋ anam kpukpru mme ɔkpɔ mi edikhe.

¹⁵Ndien ekpo kiet asaŋa mi ke iso ebe; idet onyuŋ eneŋere ada mi ke idem:

¹⁶Enye atuak ada, edi ndiɔŋɔke nte etiede: mbiet ŋkpɔ odu mi ke enyin, ndien ŋkop suŋ-suŋ uyo, ete, Nte owo edinen akan Abasi?

¹⁷Nte owo edisana akan Andibot enye?

¹⁸Sese, enye ibuɔtke idem ye ikɔt esiemɔ; enye onyuŋ odori mme angel esie ndudue.

¹⁹Ŋwaŋwa ediso mme oduŋ ufɔk mbat, emi edorode ke ntan! Enuak mmɔ kpa nte ɔfɔŋekpo!

²⁰Etetim mmɔ, ɔtɔŋɔde ke usenubɔk tutu ke mbubreyo: mmɔ etak ke nsinsi, owo baba kiet inyuŋ ikereke.

²¹Nte imenke uforo mmɔ ifep ye mmɔ? mmɔ ekpa mkpa, ndien enana eti ibuot.