Read efik ŊWED JOB 40 Bible Online

ŊWED JOB 40 - efik bible

ŊWED JOB 40

¹NDIEN Jehovah ɔbɔrɔ Job, onyuŋ ɔdɔhɔ ete, Nte andiduat editɔhɔ ye Abasi Ibom?

²Nte andisua nnɔ Abasi edibɔrɔ?

³Ndien Job ɔbɔrɔ Jehovah, enyuŋ ɔdɔhɔ ete,

⁴Sese, mmedehe; ndibɔrɔ fi didie? nda ubɔk mi ŋkubi inua mi.

⁵Ŋkɔdɔhɔ ikɔ ini kiet, edi ndibɔrɔke aba: ye utim ikaba, edi nditɔŋɔke aba ntak nnam.

⁶Ndien Jehovah etie ke oyobio ɔbɔrɔ Job, ete,

⁷Bɔbɔ ndien mbɔbɔ ke isin fo nte eren-owo: nyebup fi, ndien sian mi.

⁸Nte afo ediwuhɔre ikpe mi? anam ikpe otip mi, man etebe fi?

⁹Nte afo emenyene ubɔk ebiet eke Abasi? Nte emekeme ndituak enyɔŋ ke uyo eke ebietde esie?

¹⁰Bana idem fo ndien ke ubɔŋ ye ubom; nyuŋ sine mbana ye uyai ke idem.

¹¹Ŋwaŋa iyaresit fo suan: se kpukpru se ikoŋde koŋ, nyuŋ men enye duɔk ke isɔŋ.

¹²Se kpukpru se ikoŋde koŋ, nyuŋ suhɔre enye nim; nyuŋ digi mme idiɔk owo ke itie mmɔ.

¹³Dip mmɔ ke ntan ɔtɔ kiet; nyuŋ fuk iso mmɔ ke ndibe.

¹⁴Ami ŋko nyetoro fi: koro ubɔk nnasia fo anyaŋade fi.

¹⁵Sese ŋko behemoth emi ŋkanamde, ye afo: enye ata ikɔŋ nte enaŋ.

¹⁶Sese, ndien, odudu esie odu enye ke isin, nsɔŋidem esie onyuŋ odu ke osip idibi esie.

¹⁷Enye onuk isim esie nte cedar: osip ifuhi esie edi mfafiaha.

¹⁸Mme ɔkpɔ esie edi akwa okpoho; mme ɔkpɔ esie ebiet ukwak.

¹⁹Enye edi akpan usuŋ Abasi: andinam, enye ɔnɔ enye ofut esie,

²⁰Koro ikpɔ obot edade mbuŋwum esɔk enye, ndien kpukpru mme unam ikɔt ebre mbre do.

²¹Enye ana ke idak lotus, ke mfuhɔ nnyanyaŋa, ye ke edep.

²²Lotus ofuk enye ke mfuhɔ esie: mme willow ke mben idim ekan enye ekuk.

²³Sese, akpa ɔyɔyɔhɔ emen ikɔt, enye ifeheke itɔk; enyene uko okposuk edi nte Jordan obumerede osime enye inua.

²⁴Nte afo emekeme ndimum enye ke ini enye okutde? mme emekeme nditibi enye ibuo nsin uruk?