Read efik ŊWED JOB 42 Bible Online

ŊWED JOB 42 - efik bible

ŊWED JOB 42

¹NDIEN Job ɔbɔrɔ Jehovah, onyuŋ ɔdɔhɔ, ete, Mmɔfiɔk nte ke afo emekeme ndinam kpukpru ŋkpɔ,

²baba uduak kiet inyuŋ ikanke fi ubɔk.

³“Edi anie ndien okofuk item koro mifiɔkke ŋkpɔ?” Mmɔdo ŋketiŋde se mme ntimke ndifiɔk; ŋkpɔ emi edide utibe ekan mi, eke mme-ŋkonyuŋ mfiɔkke.

⁴Mbɔk, kop, ndien ami nyedɔhɔ ikɔ: nyebup fi, ndien sian mi.

⁵Ŋkokop mbaŋa fi nte utɔŋ okopde: edi ke emi enyin mi okut fi.

⁶Mmɔdo nsuade idem mi, nnyuŋ ntiede ke obu ye ntɔŋ ntua mkpɔfiɔk.

⁷Edikem adaŋemi Jehovah eketiŋde ikɔ emi ɔnɔ Job ama, Jehovah onyuŋ ɔdɔhɔ Eliphaz Temanite, ete, Mmayat esit ye afo, ye mme ufan fo mbiba: koro mbufo mikɔdɔhɔke ibaŋa mi nte enende, nte emi owo mi Job ɔkɔdɔhɔde.

⁸Mbufo eda ndien enaŋ itiaba, ye okukim itiaba, ke idem mbufo, ndien eka ke ebiet owo mi Job, ekewa edifɔp uwa ebaŋa idem mbufo; ndien owo mi Job edinam mkpe-ubɔk ɔnɔ mbufo: koro nyekop nnɔ enye: mbak ami ndinɔ mbufo ufen ndisime ido mbufo: koro mbufo mikɔdɔhɔke se inende ibaŋa mi, nte emi owo mi Job.

⁹Ndien Eliphaz Temanite, ye Bildad Shuhite, ye Zophar Naamathite, eka ekenam kpasuk nte emi Jehovah ɔkɔdɔhɔde mmɔ: ndien Jehovah okop ɔnɔ Job.

¹⁰Ndien Jehovah osio Job ke itie mbuot ekɔŋ afiak edi, ke ini enye anamde mkpe-ubɔk ɔnɔ mme ufan esie: Jehovah onyuŋ ɔtɔŋɔ ntak ɔnɔ Job kpukpru se enye ekenyenede utim ikaba.

¹¹Ndien kpukpru nditɔ-ete esie iren, ye kpukpru nditɔ-ete esie iban, ye kpukpru mmɔ eke ekedide mme ɔdiɔŋɔ esie ke akpa, edi edise enye, enyuŋ edia ŋkpɔ ye enye ke ufɔk esie; ndien mmɔ etua enye mbɔm, enyuŋ edɔŋ enye esit, ebaŋa ofuri ukut oro Jehovah akadade etiene enye: kpukpru mmɔ kiet kiet enyuŋ enɔ enye ubak silver kiet, ye mkpanuen o-gold kiet.

¹²Ndien Jehovah ɔdiɔŋ Job ke ukperedem akan eke mbemiso: ndien enye enyene tɔsin ŋkpri ufene duopenaŋ, ye tɔsin camel itiokiet, ye enaŋ iba-iba itie tɔsin, ye tɔsin uman ass.

¹³Enye onyuŋ obon nditɔ-iren itiaba ye nditɔ-iban ita.

¹⁴Ndien enye osio adiaha enyiŋ Jemimah; osio uduŋwan Keziah; onyuŋ osio ɔyɔhɔ uduŋwan ita Keren-happuch.

¹⁵Ndien iban eke eyede nte nditɔ-iban Job iduhe ke ofuri edem oro. Ete mmɔ onyuŋ ɔnɔ mmɔ udeme ke otu nditɔ-ete mmɔ iren.

¹⁶Ndien ke ŋkpɔ emi ebede, Job odu uwem isua ikie ye aba, onyuŋ okut nditɔ esie ye nditɔ nditɔ esie ke ɔyɔhɔ emana inaŋ.

¹⁷Edikem Job akpa usɔŋ, onyuŋ oyuhɔ isua.