Read efik ŊWED JOB 8 Bible Online

ŊWED JOB 8 - efik bible

ŊWED JOB 8

¹NDIEN Bildad Shuhite ɔbɔrɔ, ete, Adaŋa didie ke afo edidɔhɔ mmɔ emi ŋkpɔ,

²ikɔ inua fo edinyuŋ edi oyobio? Nte Abasi akwaŋa ikpe?

³Nte Ata Ɔkpɔsɔŋ akwaŋa se inende?

⁴Edieke nditɔ fo ekenamde idiɔk ye enye, ntre ke enye ama ayak mmɔ ɔnɔ idiɔk ido mmɔ ke ubɔk.

⁵Edieke afo oyomde, Abasi onyuŋ ekpede Ata Ɔkpɔsɔŋ ubɔk:

⁶Edieke afo edide edisana ye edinen, enye iditreke ndikpeme fi, ndien, eyenyuŋ onim edinen iduŋ fo ke ifure;

⁷Ntre ke akpa itie fo ekpekpri, edi ukperedem fo eyekpon eti.

⁸Kam bup, ndien, emana oko, nyuŋ nim ibuot ke se mme ete mmɔ ekeyararede:

⁹Koro nnyin idide eke mkpɔŋ, ndien mifiɔkke ŋkpɔ, koro mme usen nnyin ke isɔŋ edide ukpɔŋ.

¹⁰Nte mmɔ iditemeke fi, idinyuŋ idɔhɔke fi? Nte mmɔ idinyuŋ isioŋoke ikɔ ke esit mmɔ itiŋ?

¹¹Nte ŋkukop edikɔri ke mbat miduhe?

¹²Nte nnyanyaŋa isantem edikpon ke mmɔŋ miduhe? Ke ini enye osuk edide awawa, mika-ikpeŋeke enye, enye awara asat akan kpukpru ikɔŋ.

¹³Kpa ntre ŋko ke usuŋ kpukpru mmɔ eke efrede Abasi etie; ndien idorenyin oburobut owo atak:

¹⁴Emi esibede iberedem esie efep; ndien ŋkpɔ mbuɔtidem esie edi ufɔk utue.

¹⁵Enye ebebere ke ufɔk esie, edi (ufɔk) ididaha ada, onyuŋ omum enye akama, edi enye idibigike.

¹⁶Eyo esin enye esehe, nsehe esie onyuŋ otibe ke ofuri iŋwaŋ esie.

¹⁷Enye omum ŋkam esie ke ibombom, ese ufɔk itiat.

¹⁸Ke ini ediberede enye ke ebiet esie efep, enye (ebiet) eyekaŋ enye, ete, Ŋkanam ŋkwe fi.

¹⁹Sese, oro edi idaresit emi otode ke usuŋ esie, ndien eŋwen esuk etibe ke isɔŋ.

²⁰Sese, Abasi idimenke owo eke ɔfɔnde ama iduɔk: idinyuŋ imumke mme idiɔk owo ubɔk;

²¹Tutu enye ɔyɔhɔ fi imam ke inua, onyuŋ ɔyɔhɔ fi mkpo idara ke mkpɔk-inua.

²²Mbon-usua fo eyesine but; ndien tent mme anam idiɔk ididuhe aba.