Read efik ŊWED JOB 9 Bible Online

ŊWED JOB 9 - efik bible

ŊWED JOB 9

¹NDIEN Job ɔbɔrɔ, ete,

²Ke akpanikɔ, mmɔfiɔk nte ke edi ntre: ndien owo edinam didie akaŋ idem esie ke iso Abasi?

³Edieke owo oyomde ndikpe ikɔ ye enye, owo ikemeke ndibɔrɔ enye kiet ke otu tɔsin. Enye edi ɔfiɔkŋkpɔ ke esit, onyuŋ ɔsɔŋ ke odudu.

⁴Anie ɔsɔŋ ibuot ye enye, ndien okut ifure?

⁵Emi emende ikpɔ obot efep, ndien mmɔ ifiɔkke: emi oyutde mmɔ akabare onim ke iyaresit esie;

⁶Emi enyeŋede ererimbot osio ke ɔtɔ esie efep, mme obubɔk esie enyuŋ ebomo mbai-mbai.

⁷Emi owukde utin, ndien enye isiahake: enye onyuŋ ofuk ntantafiɔŋ.

⁸Emi ɔsuhɔrede ikpa-enyɔŋ ke idem esie ikpɔŋ, onyuŋ edigide ke odut inyaŋ.

⁹Emi akanamde Arcturus, ye Orion, ye mme Pleiades, ye mme ubet edem usuk.

¹⁰Emi anamde ikpɔ ŋkpɔ eke mikemeke ndiyarare, ye mme utibe ŋkpɔ eke ekande ibat.

¹¹Sese, enye ke asaŋa ekpere mi, edi ŋkwe enye: enye asaŋa ebe, edi ndiɔŋɔke enye.

¹²Sese, enye omum: anie edibin enye efep? Anie edidɔhɔ enye, ete, Afo anam nso?

¹³Abasi isioho iyaresit esie ifep, ndien mme aŋwam mbon-iseri enuhɔ enye ke idak.

¹⁴Ami, ndien, ndinam didie mbɔrɔ enye, nnyuŋ mmek ikɔ eke ndɔhɔde enye?

¹⁵Emi mmendibɔrɔke enye, okposuk edi nte mmenyeneke se nduede, edi ŋkpekpe ebierikpe mi ubɔk.

¹⁶Ŋkpokot enye, ndien enye ekpeyere mi, ŋkpesehe nte ke enye okop uyo mi ke akpanikɔ;

¹⁷Koro enye akpanuak mi ke oyobio, okponyuŋ anam unan mi awak ke minyeneke ntak.

¹⁸Enye ikpayakke mi nduɔk ibifik mi, edi akpanam ndot-ndot ŋkpɔ eyuhɔ mi.

¹⁹(Enye ete) “Edieke abaŋade odudu mkpɔsɔŋ, se ami mi! Edieke abaŋade ikpe, anie edidori mi ini?”

²⁰Ŋkpenen, inua mi ɔkpɔdɔhɔ ete, Ndɔdiɔk: ŋkpɔfɔn mma, enye akpanam ikpe otip mi.

²¹Nnyeneke se nduede: ŋkereke idem mi, nse uwem mi ke mbio.

²²Ŋkpɔ kiet ke edi: mmɔdo ndɔhɔde: Enye osobo nti ye mme idiɔk.

²³Ke adaŋemi ikpa owotde ini kiet, enye asak nnam-enyin owo eke miduehe isop.

²⁴Eda ererimbot esin mme idiɔk owo ke ubɔk: enye ofuk mme ebierikpe esie iso; midige enye, edi anie ndien?

²⁵Mme usen mi ŋko esɔp ekan mbon-itɔk: mmɔ emefeŋe, ikwe eti ŋkpɔ.

²⁶Mmɔ esaŋa ebe nte ubom ŋkukop: nte ntrukpom ɔduɔde ke unam.

²⁷Ŋkpɔdɔhɔ nte, Nyefre eseme mi, nyekpuhɔ iso mi, nnyuŋ ŋŋwaŋa enye:

²⁸(Ndien) ndikhe kpukpru ukut mi, mmɔfiɔk nte ke afo udusehe mi ke owo eke miduehe.

²⁹Ikpe eyebiom mi: nnam naŋa didie ŋŋwana ntem ke ikpikpu?

³⁰Ŋkpeyet idem ke mmɔŋ snow ŋkponyuŋ nda soap nnam ubɔk mi esana:

³¹Afo ekpesin mi ndien ke ukpe, ndien edisine-ŋkpɔ mi ekpese mi ke mbubiam.

³²Koro enye midige owo nte ami, eke ŋkpɔbɔrɔde enye, eke nnyin ikpadade ɔtɔ kiet ikpe ikɔ:

³³Ebierikpe inyuŋ isineke ke ufɔt nnyin, eke akpadade ubɔk esie odori nnyin owo mbiba ke idem.

³⁴Yak enye odorore mi eto esie ke idem efep, ndik esie okunyuŋ akpa mi idem.

³⁵Ŋkpɔdɔhɔ, ŋkponyuŋ mfeheke enye: koro mmemfiɔkke ŋkpɔ ke idem mi eke mkpefehede.