Read efik ŊWED MME PSALM 102 Bible Online

ŊWED MME PSALM 102 - efik bible

ŊWED MME PSALM 102

¹Akam owo ukut ke ini enye ɔfuhɔde, onyuŋ aŋwaŋde eseme esie ke iso Jehovah. O JEHOVAH, kop akam mi, nyuŋ yak eseme mi osim fi.

²Kudip mi iso fo ke usen emi ntiede ke itie ukut: kpaŋ utɔŋ nɔ mi: ke usen emi nsemede, wara di yere mi.

³Koro usen mi esuanade nte nsuŋikaŋ, mme ɔkpɔ mi enyuŋ efɔbɔ nte ifia ikaŋ.

⁴Ebɔŋ mi esit, esit onyuŋ eyemere nte mbiet: koro mmefre ndidia udia mi.

⁵Uyo eseme mi esin mme ɔkpɔ mi ediana mi ke ikpɔhidem.

⁶Mbiet ikpaŋ ke ikɔt, ntie nte ikurikut ke ŋwure.

⁷Ntaba idap, nnyuŋ ntie nte ntarusuŋ, eke etiede ikpɔŋ ke ɔkɔm ufɔk.

⁸Mme asua mi esuene mi ofuri usen; mmɔ eke edamade idat eŋwɔŋɔ ebaŋa mi.

⁹Koro ntade ntɔŋ nte uyo, nnyuŋ mbuak se ŋŋwɔŋde ye mmɔŋ-eyet,

¹⁰mbaŋa iyaresit fo ye ifuresit fo: koro afo ekemende mi, ndien ɔduɔk mi ke isɔŋ.

¹¹Mme usen mi ebiet ukpɔŋ eke ɔwɔrɔde uniɔŋ; nnyuŋ nyemere nte mbiet.

¹²Edi afo, O Jehovah, eyebigi ke nsinsi, enyin fo eyenyuŋ osim kpukpru emana.

¹³Afo eyedaha ke enyɔŋ atua Zion mbɔm: koro emekem ke ini nte afo ɔfɔnde ido ye enye, kpa ini emi enimde.

¹⁴Koro mme itiat esie enemde ikɔt fo esit, mmɔ enyuŋ etua ntan ŋwure esie mbɔm.

¹⁵Ndien mme idut eyefehe enyiŋ Jehovah, kpukpru ndidem ererimbot eyenyuŋ ebak ubɔŋ fo.

¹⁶Koro Jehovah ɔdiɔŋde Zion; enye ɔmɔbiɔŋɔre ke ubɔŋ esie.

¹⁷Enye amakabare ese akam eyen ubuene, inyuŋ isinke akam mmɔ ke ndek.

¹⁸Eyewet emi enɔ emana ke iso: ndien mbio emi edibotde eyetoro Jehovah.

¹⁹Koro enye etiede ke edisana heaven esie ɔnyuŋɔ; Jehovah etie ke enyɔŋ osuk enyin ese isɔŋ;

²⁰ete ikop mmum owo ŋkpɔkɔbi; inyuŋ isana nditɔ mkpa iyak.

²¹Man etaŋa enyiŋ Jehovah ke Zion, etaŋa itoro esie ke Jerusalem;

²²ke ini mme idut esopde ke ɔtɔ kiet, ye mme obio, man enam ŋkpɔ Jehovah.

²³Enye eyemem enye odudu ke usuŋ: omonyuŋ ɔmuhɔ mme usen mi.

²⁴Nyedɔhɔ nte, O Abasi mi, kumen mi uduɔk ke ufɔt uwem mi: mme isua fo ebigi ke ofuri emana.

²⁵Afo okodori isɔŋ ke itie esie ke eyo oko: ndien enyɔŋ edi se ubɔk fo enamde.

²⁶Mmɔ eyesobo, edi afo eyebigi; ndien kpukpru mmɔ eyetaha nte ɔfɔŋidem; afo eyekpuhɔ mmɔ nte ekura, ndien mmɔ eyekpuhɔ:

²⁷edi afo edi kpasuk enye, ndien isua fo idikurede.

²⁸Nditɔ ikɔt fo eyebigi, ubɔŋ mmɔ eyenyuŋ eseɔŋɔ eda fi ke iso.