Read efik ŊWED MME PSALM 105 Bible Online

ŊWED MME PSALM 105 - efik bible

ŊWED MME PSALM 105

¹O MBUFO ekɔm Jehovah; ekot enyiŋ esie: etaŋa ese esie ke otu mme idut.

²Ekwɔ enɔ enye, ebre enɔ enye: ekere kpukpru mme utibe ŋkpɔ esie.

³Mbufo ebure ke edisana enyiŋ esie: esit eyedat mmɔ eke eyomde Jehovah.

⁴Mbufo ebine Jehovah ye odudu esie: eyom iso esie kpukpru ini.

⁵Eti mme utibe ŋkpɔ esie emi enye anamde; ŋkpɔ-ndyɔ esie, ye mme ikpe inua esie;

⁶mbufo ubon Abraham owo esie, nditɔ Jacob emi enye ekemekde.

⁷Enye edi Jehovah Abasi nnyin: mme ikpe esie edu ke ofuri ererimbot.

⁸Enye eti ediomi esie ke nsinsi, ikɔ emi enye owukde ke tɔsin emana.

⁹Emi enye okodiomide ye Abraham, ye uŋwɔŋɔ emi enye ɔkɔŋwɔŋɔde ɔnɔ Isaac;

¹⁰onyuŋ anam enye ɔsɔŋɔ ada ɔnɔ Jacob ke ewuhɔ, ɔnɔ Israel ke nsinsi ediomi; ete,

¹¹Nyenɔ fi isɔŋ Canaan, udeme emi edomode enɔ mbufo.

¹²Ke ini eke ekemede ndibat mmɔ; edi esisit, ye mme isen owo ke esit.

¹³Ndien mmɔ ekpɔŋ idut kiet, esaŋa eka idut efen; enyuŋ edaha ke obio kiet eka mbio efen:

¹⁴enye iyakke owo baba kiet otuk mmɔ, edi asua ɔnɔ ndidem abaŋa mmɔ; ete,

¹⁵Mbufo ekutuk mbon emi nyetde aran nnim ke idem mi, ekunyuŋ enam mme prophet mi idiɔk.

¹⁶Ndien enye okot akaŋ esin ke isɔŋ; obuŋ ofuri esaŋ udia.

¹⁷Enye ɔdɔŋ owo, ete ebem mmɔ iso, Joseph anyama ke ofin:

¹⁸ebiak enye ukot ke ebuka: ukpɔŋ esie esine ke ukwak:

¹⁹tutu ekem ke ini emi ikɔ esie edide: uyo Jehovah odomo enye.

²⁰Edidem ɔdɔŋ ekekpɔhɔre enye: andikara obio ɔdɔŋ ekesana enye eyak.

²¹Onim enye ke etubom ufɔk esie, ye ke andikara ofuri inyene esie:

²²Ete enye ɔbɔp ikpɔ owo imɔ, nte amade, onyuŋ ekpep mbiowo imɔ ifiɔk.

²³Ntre ke Israel aka ke Egypt; Jacob onyuŋ oduŋ ke isɔŋ Ham.

²⁴Ndien enye anam ikɔt esiemɔ etɔt eti-eti; onyuŋ anam mmɔ esɔŋɔ ekan mme asua mmɔ.

²⁵Enye akabare esit mmɔ esua ikɔt esie, enyuŋ enam ŋkari etuk ifin esie.

²⁶Enye ɔdɔŋ Moses owo esie utom; ye Aaron emi enye ekemekde.

²⁷Mmɔ enim ikpɔ mme idiɔŋɔ esie ke otu mmɔ, ye ŋkpɔ ndyɔ ke isɔŋ ham.

²⁸Enye ɔdɔŋ ekim utom, onyuŋ anam okim; ndien mmɔ isɔŋke ibuot ke ikɔ esie.

²⁹Enye akabare mmɔŋ mmɔ edi iyip, onyuŋ owot iyak mmɔ.

³⁰Ikwɔt ɔnyɔk ke isɔŋ mmɔ, ke ubet ndidem mmɔ.

³¹Enye ɔdɔhɔ, ndien nduyip ŋkpɔ edi, ye idaŋ ke ofuri adaŋa mmɔ.

³²Enye ɔnɔ mmɔ itiat ke edim, ye edemikaŋ ke isɔŋ mmɔ;

³³onyuŋ abiat vine mmɔ ye fig mmɔ, onyuŋ obuŋ mme eto adaŋa mmɔ.

³⁴Enye ɔdɔhɔ, ndien ŋkukuŋkpɔyɔriyɔ edi, idiaŋ eke minyeneke ibat,

³⁵Ndien eta kpukpru ikɔŋ ke iŋwaŋ mmɔ, enyuŋ eta mfri isɔŋ mmɔ.

³⁶Ndien enye owot kpukpru mme akpan ke isɔŋ mmɔakpa mfri odudu mmɔ.

³⁷Ndien ada mmɔ ɔwɔrɔ ke silver ye gold: baba mfum-mfum owo kiet inyuŋ iduhe ke otu mme esien mmɔ.

³⁸Esit adat Egypt ke ini mmɔ ewɔŋɔde; koro uteŋe mmɔ odorode mmɔ ke idem.

³⁹Enye ebri obubit enyɔŋ ke ufuhɔ-ŋkpɔ; ye ikaŋ eke ayamade ke okoneyo.

⁴⁰Mmɔ ebeŋe, ndien enye ada nduduɔk edi, onyuŋ ɔnɔ mmɔ udia heaven eyuhɔ.

⁴¹Enye asiak itiat, ndien mmɔŋ otop ɔwɔrɔ; ndien asaŋa ke edisat ebiet nte akpa.

⁴²Koro enye etide edisana uyo esie, ye Abraham owo esie;

⁴³onyuŋ ada ikɔt esie ɔwɔrɔ ke mbre, ye edimek mbio esie ke mkpo idara:

⁴⁴onyuŋ ɔnɔ mmɔ isɔŋ mme idut; ndien mmɔ eda utom mme obio enyene:

⁴⁵kpaŋ mmɔ ekpenim mme ewuhɔ esie, enyuŋ ekpe, mbet esie. Mbufo etoro Jehovah.