Read efik ŊWED MME PSALM 106 Bible Online

ŊWED MME PSALM 106 - efik bible

ŊWED MME PSALM 106

¹MBUFO etoro Jehovah. Oh Mbufo ekɔm Jehovah; koro enye ɔfɔnde;

²koro ima esie ebigide ke nsinsi. Anie ekeme nditaŋ ese Jehovah, nnyuŋ mbuk ofuri itoro esie?

³Ɔfɔfɔn ɔnɔ mmɔ eke ekpemede se inende; (ɔfɔfɔn ɔnɔ) owo eke anamde eti ido kpukpru ini.

⁴O Jehovah, da mfɔnido ikɔt fo ti mi; da erinyaŋa fo tiene mi:

⁵man ŋkut nti ŋkpɔ mbon emi afo emekde, nnyuŋ ndat esit ke idaresit ikɔt fo, nnyuŋ mbure mbure ye udeme fo.

⁶Nnyin imetiene mme ete nnyin inam idiɔk; imanam ukwaŋŋkpɔ, imanam idiɔk.

⁷Mme ete nnyin ke Egypt iketimke ikere mme utibe ŋkpɔ fo; mmɔ itihi uwak ŋkpɔ ima fo; edi esɔŋ ibuot ke inyaŋ, kpa Ididuot Inyaŋ.

⁸Ndien enye anyaŋa mmɔ ke abaŋa enyiŋ esiemɔ; man anam mmɔ efiɔk odudu esie. Enye onyuŋ aduari Ididuot Inyaŋ, ndien Inyaŋ asat:

⁹enye onyuŋ ada mmɔ asaŋa ke udem, kpa nte ke wilderness.

¹⁰Ndien enye anyaŋa mmɔ osio andisua ke ubɔk, onyuŋ afak mmɔ osio ke ubɔk owo utɔk.

¹¹Ndien mmɔŋ ofuk mme asua mmɔ: baba owo mmɔ kiet isuhɔke.

¹²Ndien mmɔ enim ikɔ esie ke akpanikɔ; mmɔ ekwɔ itoro esie.

¹³Mmɔ esɔp ndifre se enye akanamde; mmɔ ibetke item esie.

¹⁴Ndien idiɔk itɔŋ ɔdɔŋ mmɔ ke wilderness; mmɔ enyuŋ edomo Abasi ke desert.

¹⁵Ndien enye ɔnɔ mmɔ se eyomde; edi esin mmɔ ndiɔkidem ke ukpɔŋ.

¹⁶Mmɔ enyuŋ efube ye Moses ke nna, ye Aaron edisana owo Jehovah ŋko.

¹⁷Isɔŋ asiaha emen Dathan, onyuŋ ofuk udim Abiram.

¹⁸Ndien ikaŋ obubere ke otu udim mmɔ; edem-ikaŋ onyuŋ ɔfɔp mme idiɔk owo.

¹⁹Mmɔ enam eyen-enaŋ ke Horab, enyuŋ etuak ibuot enɔ editara mbiet.

²⁰Ntem ke mmɔ eda ubɔŋ mmɔ ekpuhɔ ke se ibietde enaŋ eke atade mbiet.

²¹Mmɔ efre Abasi, andinyaŋa mmɔ, emi akanamde ikpɔ ŋkpɔ ke Egypt;

²²mme utibe ŋkpɔ ke isɔŋ Ham, ye ŋkpɔ ndik ke Ididuot Inyaŋ.

²³Ndien enye ɔdɔhɔ, ete ke imɔ ikposobo mmɔ, ke mikpedige Moses edimek owo esie akada enye ke iso ke ɔtɔ ŋwure, onyuŋ akabare iyaresit esie efep, mbak edisobo mmɔ.

²⁴Mmɔ enyuŋ ese ediye isɔŋ oro ke ndek, inyuŋ inimke uyo esie ke akpanikɔ.

²⁵Ndien mmɔ esuk uyo ke mme tent mmɔ; ikopke uyo Jehovah.

²⁶Ndien enye emenere ubɔk esie abaŋa mmɔ, ete imen mmɔ iduɔk ke wilderness:

²⁷inyuŋ iduɔk ubon mmɔ ke otu mme idut, inyuŋ isuan mmɔ ke ererimbot.

²⁸Ndien mmɔ edian idem-mmɔ ye Baal-peor, enyuŋ eta mme uwa mme akpa-mkpa.

²⁹Ntre ke mmɔ eyat enye esit ke mme idiɔk ido mmɔ: ndien ufen obumere ke otu mmɔ.

³⁰Ndien Phinehas adaha ke enyɔŋ ekpe-ikpe: ntre ke ufen odop.

³¹Ndien ebat oro ke eti ido enɔ enye, ke ofuri emana ke nsinsi.

³²Mmɔ enyuŋ eyat enye esit ke ɔtɔ mmɔŋ Meribah, ndien ɔdiɔk ye Moses abaŋa mmɔ:

³³koro mmɔ eyatde enye esit, ndien enye ɔsɔp inua ɔdɔhɔ ikɔ.

³⁴Mmɔ isoboke mme idut oro Jehovah ɔkɔdɔhɔde mmɔ.

³⁵Edi ebuana ŋkpɔ ye mme idut, enyuŋ ekpep ido mmɔ.

³⁶Enyuŋ enam ŋkpɔ ndem mmɔ: ndien mmɔ ekabare edi mfine ye mmɔ.

³⁷Enyuŋ ewa nditɔ mmɔ iren ye iban enɔ demon,

³⁸enyuŋ eduɔk iyip owo eke miduehe isop, kpa iyip nditɔ mmɔ iren ye iban, emi mmɔ ewade enɔ ndem Canaan: ndien isɔŋ abiara ke iyip.

³⁹Ntre ke mmɔ esabare idem-mmɔ ke ŋkpɔ eke mmɔ ekenamde, enyuŋ enam use ke idiɔk ido mmɔ.

⁴⁰Ndien iyaresit Jehovah obumere ye ikɔt esie, enye onyuŋ asua udeme esie eti-eti.

⁴¹Ndien enye ada mmɔ esin mme idut ke ubɔk; ndien mmɔ eke esuade mmɔ enyuŋ ekara mmɔ.

⁴²Ndien mme asua mmɔ etuk mmɔ; ndien mmɔ esuk idem ke idak ubɔk mmɔ.

⁴³Enye anyaŋa mmɔ ediwak ini, ndien mmɔ esɔŋ ibuot ke uduak mmɔ, ndien etaha ke idiɔk ido mmɔ.

⁴⁴Ndien enye ese ukut mmɔ, ke ini enye okopde eseme mmɔ:

⁴⁵onyuŋ eti ediomi esie ɔnɔ mmɔ, onyuŋ atua mmɔ mbɔm ke uwak ima esie.

⁴⁶Ndien enye esin kpukpru mmɔ oro etaŋde mmɔ efep etua mmɔ mbɔm.

⁴⁷O Jehovah Abasi nnyin, nyaŋa nnyin, nyuŋ taŋ nnyin ke mme idut di bon, man nnyin ikɔm edisana enyiŋ fo, inyuŋ ibure mbure ke itoro fo.

⁴⁸Mbufo etoro Jehovah Abasi Israel, ke nsinsi-nsinsi. Yak ofuri obio enyuŋ edɔhɔ, ete, Amen. Mbufo etoro Jehovah.