Read efik ŊWED MME PSALM 107 Bible Online

ŊWED MME PSALM 107 - efik bible

ŊWED MME PSALM 107

¹MBUFO ekɔm Jehovah, koro enye ɔfɔŋde; koro ima esie ebigide ke nsinsi.

²Yak mme mmɔ emi Jehovah afakde edɔhɔ ntem, kpa mme mmɔ emi enye afakde osio mme asua ke ubɔk;

³onyuŋ ataŋ mmɔ ke mme idut, ke edem usiaha-utin ye ke edem usop, ye ke edere, ye ke inyaŋ, edi.

⁴Mmɔ ediyo ke wilderness, ye ke usuŋ desert; ikwe obio iduŋ.

⁵Biɔŋ ɔdɔŋ mmɔ, itɔŋ onyuŋ asat mmɔ, ukpɔŋ akpa mmɔ ke idem.

⁶Ndien mmɔ eseme enɔ Jehovah ke nnaanenyin mmɔ; enye osio mmɔ ke itie ukut mmɔ.

⁷Ndien enye ada mmɔ asaŋa ke edinen usuŋ, man eka obio iduŋ.

⁸Yak owo ekɔm Jehovah ke ima esie, ye ke mme utibe ŋkpɔ emi enye anamde ye nditɔ owo.

⁹Koro enye ɔyuhɔde ukpɔŋ udɔŋ, onyuŋ ada eti ŋkpɔ ɔnɔ ukpɔŋ ɔbiɔŋ ɔyuhɔ.

¹⁰Eduŋ ke ekim ye mfut mkpa, eda ukut ye ukwak ebɔp mmɔ;

¹¹koro mmɔ enenide uyo Jehovah, enyuŋ esede item Ata Edikoŋ ke ndek:

¹²ndien enye ada ukut ɔsuhɔre mmɔ esit onim; mmɔ eduɔŋɔ ke isɔŋ, ndien owo eke anyaŋade iduhe.

¹³Ndien mmɔ eseme enɔ Jehovah ke nnan-enyin mmɔ; enye anyaŋa mmɔ osio ke itie ukut mmɔ.

¹⁴Osio mmɔ ke ekim ye mfut mkpa, onyuŋ obuŋ ŋkpɔkɔbi mmɔ.

¹⁵Yak mmɔ ekɔm Jehovah ke ima esie, ye ke mme utibe ŋkpɔ emi enye anamde ye nditɔ owo.

¹⁶Koro enye anuakde mme itim okpoho, onyuŋ osibe ukwak-usin-usuŋ mbai-mbai.

¹⁷Ndisime owo ekut ukut ebaŋa usuŋ ukwaŋ-ŋkpɔ mmɔ ye mme idiɔk ido mmɔ.

¹⁸Ukpɔŋ mmɔ asua kpukpru oruk udia; ndien mmɔ edisim ke inua-otop mkpa.

¹⁹Ndien mmɔ eseme enɔ Jehovah ke nnan-enyin mmɔ; enye anyaŋa mmɔ osio ke itie ukut mmɔ. Enye ɔdɔŋ ikɔ esie utom,

²⁰onyuŋ anam udɔŋɔ okure mmɔ, ndien ayak mmɔ ebɔhɔ mme nsobo mmɔ.

²¹Yak owo ekɔm Jehovah ke ima esie, ye ke mme utibe ŋkpɔ emi enye anamde ye nditɔ owo.

²²Yak mmɔ enyuŋ ewa mme uwa ekɔm, enyuŋ etaŋa mme ese esie ke ikwɔ.

²³Mmɔ eduk ke ubom mbakara esuhɔre ke inyaŋ, enam utom ke akwa mmɔŋ:

²⁴mmɔ oro ekut se Jehovah anamde, ye ŋkpɔ ndyɔ esie ke inyaŋ ibom.

²⁵Ndien enye ɔdɔhɔ, ndien oyobio edemere, onyuŋ emenere odut esie.

²⁶Mmɔ edɔk ke enyɔŋ, esuhɔre ke udem: ukpɔŋ atara mmɔ ke nnaenyin.

²⁷Mmɔ eyok enyuŋ efum nte owo mmin, ofuri ifiɔk mmɔ onyuŋ atak.

²⁸Ndien ke ini mmɔ esemede enɔ Jehovah ke nnanenyin mmɔ, enye osio mmɔ ke itie ukut mmɔ.

²⁹Enye anam oyobio odobo, ndien odut mmɔ odop uyo.

³⁰Ndien mmɔ edat esit koro mmɔ enade suŋ; ndien enye ada mmɔ edi ke esuk emi mmɔ eyomde.

³¹Yak owo ekɔm Jehovah ke ima esie, ye ke mme utibe ŋkpɔ emi enye anamde ye nditɔ owo.

³²Yak mmɔ enyuŋ ekpono enye ke esop mbio-obio, enyuŋ etoro enye ke odu mbiowo.

³³Enye anam mme akpa-mmɔŋ ekabare edi wilderness, anam mme idim ekabare edi edisat isɔŋ;

³⁴onyuŋ anam eti isɔŋ akabare edi inuŋ-inuŋ, ke abaŋa mme idiɔk ido mmɔ emi eduŋde ke esit.

³⁵Enye anam wilderness edi mkpɔdiɔhɔ-mmɔŋ, anam edisat isɔŋ akabare edi idim mmɔŋ.

³⁶Onyuŋ anam mbio ɔbiɔŋ eduŋ do, mmɔ enyuŋ ediɔŋ obio iduŋ;

³⁷Enyuŋ esuan mkpasip ke iŋwaŋ, enyuŋ etɔ iŋwaŋ-vine, ndien mmɔ esioŋo mbuŋwum ŋkpɔ.

³⁸Enye onyuŋ ɔdiɔŋ mmɔ ŋko, ndien mmɔ ewak eti-eti; inyuŋ iyakke ufene mmɔ ekabare ekpri.

³⁹Ekem mmɔ ekabare ekpri enyuŋ esuhɔre ke ufik, ye utuk, ye afanikɔŋ.

⁴⁰Enye aŋwaŋa but ofuk mbɔŋ, onyuŋ anam mmɔ ediyo ke ikpikpu ebiet, emi ɔkpɔ-usuŋ miduhe ke esit.

⁴¹Onyuŋ osio mme ubuene ke nnanenyin, emenere onim ke enyɔŋ, onyuŋ anam ufɔk etie nte otu erɔŋ.

⁴²Ndinen owo eyekut enyuŋ edara; ofuri idiɔk ido eyenyuŋ okibi inua esie.

⁴³Owo ekededi eke enyenede ibuot eyetiŋ enyin ke ŋkpɔ emi, eyenyuŋ ekere ima Jehovah.