Read efik ŊWED MME PSALM 109 Bible Online

ŊWED MME PSALM 109 - efik bible

ŊWED MME PSALM 109

¹Eke etubom mbon ikwɔ. Psalm David. O ABASI itoro mi, kudop uyo;

²koro mmɔ emetat inua idiɔk ye inua nsu ebaŋa mi: mmɔ eda edeme nsu eduhɔ ebaŋa mi.

³Mmɔ enyuŋ eda ikɔ usua ekan mi ekuk; enyuŋ eŋwana ekɔŋ ye ami ke minyeneke ntak.

⁴Mmɔ esua mi ke usiene ima mi, edi ami nsuk nnam mkpeubɔk.

⁵Mmɔ enyuŋ edori mi idiɔk ke usiene eti, ye usua ke ibuot ima mi.

⁶Nim idiɔk owo ke etubom esie, nim owo usua ke ubɔk nnasia esie.

⁷Ke ini emi ekpede ikpe esie, yak ikpe otip enye: yak akam esie onyuŋ etie nte idiɔk ido.

⁸Nam usen esie emuhɔ; yak owo efen ada itie esie.

⁹Nam nditɔ esie edi nditɔ-akpa, nam ŋwan esie edi ebe-akpa.

¹⁰Nam nditɔ esie eyɔrɔ, enyuŋ esaŋa inɔk, enyuŋ eyom ŋkpɔ ke otu ŋwure (ufɔk) mmɔ.

¹¹Yak ɔnɔ ebuɔt omum kpukpru se enye enyenede; yak isen owo enyuŋ ebume kpukpru se enye akpade utom ke esit.

¹²Yak enye okunyene owo eke edinyenede ima ye enye: yak owo eke edituade nditɔ-akpa esie mbɔm okunyuŋ odu.

¹³Yak esibe ubon esie efep; yak esɔhi enyiŋ mmɔ ke emana iso efep.

¹⁴Yak Jehovah eti idiɔk ido mme ete esie; yak ekunyuŋ esɔhi idiɔk-ŋkpɔ eka esie efep.

¹⁵Yak mmɔ edu ke iso Jehovah kpukpru ini, yak enye onyuŋ osibe enyiŋ mmɔ ke isɔŋ efep.

¹⁶Koro enye mitihi ndinyene ima, edi ɔkɔbɔ owo ukut ye ubuene, ye owo eke esit esie anuahade, ete iwot enye.

¹⁷Ndien enye akama isuŋi, ndien isuŋi omosim enye: enye inyuŋ imaŋa ekɔm, ndien ekɔm ɔmɔkpɔŋ enye anyan ebiet.

¹⁸Enye onyuŋ esine isuŋi ke idem nte ekura esie, ndien isuŋi oduk enye idibi nte mmɔŋ, onyuŋ oduk mme ɔkpɔ esie nte aran.

¹⁹Yak enye (isuŋi) etie ye enye nte ɔfɔŋ idem eke ofukde enye, ye nte mbɔbɔ isin eke enye ɔbɔbɔde kpukpru ini.

²⁰Emi edi utip emi Jehovah ɔnɔde mmɔ eke esuade mi, enyuŋ edɔhɔde idiɔk ebaŋa ukpɔŋ mi.

²¹Edi afo, O Jehovah Ɔbɔŋ, nam ye ami baŋa enyiŋ fo: nyaŋa mi, koro ima fo ɔfɔnde.

²²Koro ami ndide owo ukut ye ubuene, esit mi onyuŋ ada unan ke idem mi

²³Mmadaha nte ukpɔŋ ke ini enye ɔwɔrɔde uniɔŋ, ekpɔri mi efep nte ŋkukuŋkpɔyɔriyɔ.

²⁴Utre-udia esin edɔŋ efum mi; obukidem mi onyuŋ anana ikpɔŋ.

²⁵Ndien ami ndi ŋkpɔ esuene mmɔ: mmɔ ese mi eyip ibuot.

²⁶Bɔ mi ubɔk, O Jehovah Abasi mi: nyaŋa mi nte ekemde ye ima fo:

²⁷ndien mmɔ eyefiɔk ete ke ubɔk fo edi emi; afo, O Jehovah, amanam emi.

²⁸Mmɔ eyesuŋi, edi afo eyediɔŋ: mmɔ edaha eda, ndien eyekut but; ndien esit eyedat owo fo.

²⁹Esuene eyesine mme asua mi ke idem, mmɔ eyenyuŋ eda but mmɔ nte ekura, efuk idem.

³⁰Nyekɔm Jehovah eti-eti ke inua mi; nnyuŋ ntoro enye ke otu uwak owo.

³¹Koro enye eyeda eyen ubuene ke ubɔk nnasia, ete inyaŋa enye ibɔ mmɔ eke ekpede ikpe ye ukpɔŋ esie.