Read efik ŊWED MME PSALM 116 Bible Online

ŊWED MME PSALM 116 - efik bible

ŊWED MME PSALM 116

¹MMAMA koro Jehovah okopde uyo mi, ye mkpe ubɔk mi Koro enye akpaŋade utɔŋ esie ɔnɔ mi,

²mmɔdɔ nyeseme nnɔ enye ke ofuri uwem mi.

³Mme uruk mkpa ekekan mi ekuk; mme ubiak obio ekpo enyuŋ esim mi: ŋkut ukut ye nnanenyiŋ.

⁴Ndien nsemeŋkot enyiŋ Jehovah, nte, Mbɔk, Jehovah, nyaŋa ukpɔŋ mi.

⁵Jehovah ɔfɔn ido, onyuŋ enen; Abasi nnyin onyuŋ enyene esit mbɔm.

⁶Jehovah ekpeme mme ɔkɔi: ami ŋkɔsuhɔre, ndien enye anyaŋa mi.

⁷O ukpɔŋ mi, kabare fiak ke ebiet nduɔk-odudu fo; koro Jehovah amatat ubɔk ɔnɔ fi ŋkpɔ.

⁸Koro afo okosiode ukpɔŋ mi ke mkpa, ye enyin mi ke mmɔ ŋeyet, ye ukot mi ke iduɔ.

⁹Nyesaŋa ke iso Jehovah ke isɔŋ mme andidu uwem.

¹⁰Ami ŋkonim ke akpanikɔ; koro ndɔhɔde (ntem): mmetie ke ata itie ukut.

¹¹Ami ŋkɔdɔhɔ ke ndik mi, nte, “Kpukpru owo edi mme osunsu.”

¹²Ndinam didie nnɔ Jehovah usiene kpukpru mfɔnido emi enye ɔfɔnde ye ami?

¹³Nyemen cup erinyaŋa, nnyuŋ nseme ŋkot enyiŋ Jehovah.

¹⁴Nyesio mme akaŋa mi nnɔ Jehovah kpa ke iso ofuri ikɔt esie.

¹⁵Mkpa mbon ima Jehovah edi ŋkpɔ-uto ke enyin esie.

¹⁶Mbɔk, O Jehovah, ami ndi owo fo; eyen ofin aŋwan fo: afo amatat mi uruk.

¹⁷Nyewa uwa ekɔm nnɔ fi, nnyuŋ nseme ŋkot enyiŋ Jehovah.

¹⁸Nyesio mme akaŋa mi nnɔ Jehovah, kpa ke iso ofuri ikɔt esie,

¹⁹ke esit okure ufɔk Jehovah, ke ufɔt fo, O Jerusalem. Mbufo etoro Jehovah.