Read efik ŊWED MME PSALM 136 Bible Online

ŊWED MME PSALM 136 - efik bible

ŊWED MME PSALM 136

¹OH MBUFO ekɔm Jehovah; koro enye ɔfɔnde: koro ima esie odude ke nsinsi.

²Oh mbufo ekɔm Abasi mme abasi: koro ima esie odude ke nsinsi.

³O mbufo ekɔm Ɔbɔŋ mbɔŋ: koro ima esie odude ke nsinsi.

⁴Enye emi anamde mme utibe ŋkpɔ ke idem esie ikpɔŋ: koro ima esie odude ke nsinsi.

⁵Enye emi akanamde enyɔŋ ke ifiɔk: koro ima esie odude ke nsinsi.

⁶Enye emi ekebride isɔŋ ke enyɔŋ mmɔŋ: koro ima esie odude ke nsinsi.

⁷Enye emi akanamde ikpɔ mme uŋwana: koro ima esie odude ke nsinsi:

⁸Kpa utin, ete akara uwemeyo: koro ima esie odude ke nsinsi:

⁹Ye ɔfiɔŋ ye ntantafiɔŋ, ete ekara okoneyo: koro ima esie odude ke nsinsi:

¹⁰(Ekɔm) enye emi akasuande Egypt ke mme akpan mmɔ; koro ima esie odude ke nsinsi.

¹¹Ndien osioŋo Israel ke otu mmɔ: koro ima esie odude ke nsinsi.

¹²Ke ɔkpɔsɔŋ ita, ye ke edimenere ubɔk: koro ima esie odude ke nsinsi.

¹³Enye emi akabaharede Ididuot Inyaŋ esin ke mbak: koro ima esie odude ke nsinsi:

¹⁴Onyuŋ anamde Israel esaŋa enye ke ufɔt ebe: koro ima esie odude ke nsinsi.

¹⁵Onyuŋ emen Pharaoh ye mbon-ekɔŋ esie ɔduɔk ke Ididuot Inyaŋ: koro ima esie odude ke nsinsi.

¹⁶(Ekɔm) enye emi akadade ikɔt esie usuŋ ke wilderness: koro ima esie odude ke nsinsi.

¹⁷Enye emi akasuande ikpɔ ndidem: koro ima esie odude ke nsinsi.

¹⁸Onyuŋ owotde mkpɔsɔŋ ndidem: koro ima esie odude ke nsinsi.

¹⁹Sihon edidem mme Amorite: koro ima esie odude ke nsinsi:

²⁰Ye Og edidem Bashan: koro ima esie odude ke nsinsi:

²¹Onyuŋ ada isɔŋ mmɔ ɔnɔ ke udeme: koro ima esie odude ke nsinsi:

²²Udeme Israel owo esie: koro ima esie odude ke nsinsi.

²³Emi eketide nnyin ke itie ukut nnyin: koro ima esie odude ke nsinsi.

²⁴Onyuŋ afabarede nnyin osio mme asua nnyin ke ubɔk: koro ima esie odude ke nsinsi.

²⁵Enye ɔnɔnɔ ofuri obukidem udia: koro ima esie odude ke nsinsi.

²⁶Oh mbufo ekɔm Abasi enyɔŋ: koro ima esie odude ke nsinsi.