Read efik ŊWED MME PSALM 141 Bible Online

ŊWED MME PSALM 141 - efik bible

ŊWED MME PSALM 141

¹Psalm David. O JEHOVAH, mmeseme nnɔ fi wara di tiene mi; kpaŋ utɔŋ ke uyo mi, ke ini nsemede ŋkot fi.

²Yak akam mi ada ke iso fo nte incense; yak umenere ubɔk mi etie nte uwa mbubreyo.

³O Jehovah, nim mbon-ukpeme nɔ inua mi; kpeme usuŋ mkpɔk-inua mi.

⁴Kuyak esit mi akabare ebine idiɔk ikɔ; kuyak etiene mme anam-oburɔbut anam idiɔk; kunyuŋ uyak mi ndia edinem udia mmɔ.

⁵Yak owo eti ido amia mi ke ima, onyuŋ asua ɔnɔ mi: aran ibuot ke ibuot mi idisinke, koro osuk edide: ndien nyebɔŋ akam mbaŋa mme idiɔk ŋkpɔ mmɔ.

⁶Emeduɔk mme ebierikpe mmɔ esin ke otu ikpɔ itiat: ndien mmɔ ekop ikɔ mi, koro mmɔ enemde.

⁷Kpa nte owo ofuŋde onyuŋ asiakde isɔŋ, kpa ntre ke mme ɔkpɔ nnyin esuana ke inua udi.

⁸Koro enyin mi esede fi, O Jehovah Ɔbɔŋ: mmɔbuɔt idem-mi ye afo: kuŋwaŋa ukpɔŋ mi uduɔk.

⁹Kpeme mi mbak ubɔk afia emi mmɔ ekɔkde enɔ mi, ye mfine mme anam oburɔbut ido.

¹⁰Nam mme idiɔk owo eduɔŋɔ ke mukanda idem-mmɔ ini kiet, tutu ami mbɔhɔ.