Read efik ŊWED MME PSALM 18 Bible Online

ŊWED MME PSALM 18 - efik bible

ŊWED MME PSALM 18

¹Eke etubom mbon ikwɔ. Psalm David, owo Jehovah, emi etiŋde ikɔ ikwɔ emi ɔnɔ Jehovah, ke usen oro Jehovah anyaŋade enye osio kpukpru mme asua esie ke ubɔk, ye ke ubɔk Saul, Ndien enye ɔdɔhɔ ete. MMAMA fi, O Jehovah, odudu mi!

²Jehovah edi akwa itiat mi, ye ufɔk ekɔŋ mi ye andinyaŋa mi; Abasi mi edi akwa itiat mi; nyebuɔt idem mi ye enye; otu-ekɔŋ mi, ye nduk erinyaŋa mi, ye edikoŋ ebiet mi.

³Nyeseme nnɔ Jehovah, emi ekpetorode; ndien eyenyaŋa mi esio mme asua mi ke ubɔk.

⁴Mme uruk mkpa ekan mi ekuk, mme ukwɔ idiɔk-ŋkpɔ esin mi ndikhe.

⁵Mme uruk udi ekan mi ekuk: mme afia mkpa ena mi ke iso.

⁶Nseme nnɔ Jehovah ke nnanenyin mi, nnyuŋ mfiori ŋkot Abasi mi: enye etie ke temple esie okop uyo mi, mfiori mi onyuŋ edi enye ke iso, oduk enye ke utɔŋ.

⁷Ndien isɔŋ aduai onyuŋ enyek; se ikpɔ obot edade ke esit etimere onyuŋ aduai, koro esit ayatde Enye.

⁸Nsuŋikaŋ oto Enye ke ibuo ɔdɔk, ikaŋ onyuŋ ɔwɔrɔ enye ke inua, ata ŋkpɔ;

⁹ebok ikaŋ ebubere ke esit. Ndien enye onuk ikpa-enyɔŋ ɔsuhɔre: ɔkpɔsɔŋ ekim onyuŋ odu enye ke idat ukot.

¹⁰Ndien enye odoro ke cherub, efe, onyuŋ efe ke mba ofum.

¹¹Enye onim ekim ke ebiet udibe esie; tent esie emi akande enye okuk, edi obubit mmɔŋ ye idiɔk ikpa-enyɔŋ.

¹²Uyama emi odude enye ke iso esin idiɔk enyɔŋ esie adaha, edim itiat ye ebok ikaŋ.

¹³Jehovah onyuŋ atuak enyɔŋ; Ata Edikoŋ onyuŋ osioro uyo esie; edim itiat ye ebok ikaŋ.

¹⁴Ndien enye otop idaŋ esie, asuan mmɔ; esin obuma, onyuŋ etimere mmɔ.

¹⁵Ndien mmɔ ekut afua mmɔŋ, se ererimbot eberede ke esit onyuŋ ayarare, ke nduari fo, O Jehovah, ke ibifik emi ofimede ke ibuo fo.

¹⁶Enye etie ke enyɔŋ ɔdɔŋ ekeda mi, odudi mi osio ke akamba mmɔŋ.

¹⁷Enye osio mi ubɔk mkpɔsɔŋ mme asua mi, ye ke ubɔk mmɔ eke etɔhɔde ye ami: koro mmɔ esɔŋde ekan mi.

¹⁸Mmɔ esim mi ke usen ukut mi: edi Jehovah edi iberedem mi;

¹⁹ndien enye ada mi ɔwɔrɔ esin ke akamba ufaŋ eyenyaŋa mi, koro amade mi.

²⁰Jehovah eyenam ye ami nte eti ido mi edide; eyenɔ mi nte ubɔk asanade mi.

²¹Koro mmekpeme usuŋ Jehovah, nnyuŋ ŋkpɔŋke Abasi mi nnam idiɔk.

²²Koro kpukpru mme item esie enade mi ke iso; ndinyuŋ mmenke ewuhɔ esie mfep ke idem mi nduɔk.

²³Nnyuŋ mfɔn mma ye enye, nnyuŋ ŋkpeme idem mi mbak ndinam idiɔk ido mi.

²⁴Ndien Jehovah ɔmɔnɔ mi usiene nte ido mi edide, ye nte ubɔk mi asanade enye ke iso.

²⁵Afo eyenyene ima ye mbon ima fo; onyuŋ ɔfɔn ama ye owo eke ɔfɔnde ama;

²⁶eyenim idem fo ke edisana ye owo eke asanade; onyuŋ akwaŋa iso ye mmɔ eke ekwaŋade.

²⁷Koro afo eyenyaŋa mbon ukut, eyenyuŋ ɔsuhɔre mmɔ eke enyin mmɔ okoŋde.

²⁸Koro afo eyedomo utuen-ikaŋ mi: Jehovah Abasi mi eyeŋwaŋa ekim mi.

²⁹Koro afo eyenam mi mbumere udim-ekɔŋ: Abasi mi onyuŋ anam mi mfrɔ

³⁰ŋkaŋa ibibene. Abasi! usuŋ esie ɔfɔn ama; ema edomo uyo Jehovah; enye edi otu-ekɔŋ kpukpru mmɔ eke ebuɔtde idem mmɔ ye enye.

³¹Koro anie edi Abasi, ke mibɔhɔke Jehovah? anie onyuŋ edi akwa itiat ke mibɔhɔke Abasi nnyin?

³²Ke edi Abasi ɔbɔbɔ mi odudu ke isin, onyuŋ anam usuŋ mi ɔfɔn ama.

³³Enye onim ukot mi nte ukot edop, onyuŋ odori mi ke edikoŋ ebiet mi.

³⁴Enye eteme ubɔk mi ndiŋwana ekɔŋ, ubɔk mi onyuŋ onuk utiga okpoho.

³⁵Afo omonyuŋ ɔnɔ mi otu-ekɔŋ erinyaŋa fo: ubɔk nnasia fo onyuŋ omum mi akama, mmem-ido fo onyuŋ ofori mi.

³⁶Afo aŋwaŋa mi ikpat ukot ke idak, ndien itɔŋ ukot iditeŋke mi.

³⁷Nyebine mme asua mi, nnyuŋ nsim mmɔ: ndinyuŋ mfiakke edem tutu nsobo mmɔ fap.

³⁸Nyeyibi mmɔ, ndien mmɔ idikemeke ndidaha ke enyɔŋ: eyenyuŋ eduɔŋɔ ena mi ke idak ikpat.

³⁹Afo omonyuŋ ada odudu ekɔŋ ɔbɔbɔ mi ke idem: eyenuk mmɔ eke eyomde mi ikɔ esin mi ke idak.

⁴⁰Afo omonyuŋ ada itɔŋ mme asua mi ɔnɔ mi; ndien nyesobo mmɔ eke esuade mi.

⁴¹Mmɔ eyeseme, edi owo eke anyaŋade iduhe; ekot Jehovah, edi enye iyereke mmɔ.

⁴²Ndien nyenuak mmɔ emem nte obu ke iso ofum: nyeduɔk mmɔ nte mbat efak.

⁴³Afo eyenyaŋa mi osio ke utɔk mbio-obio; eyenim mi ke etubom mme idut; mbio emi mmemfiɔkke eyenam ŋkpɔ mi.

⁴⁴Ke ini mmɔ ekopde ke utɔŋ, mmɔ eyenam uyo mi: nditɔ idut eyenem inua enɔ mi.

⁴⁵Nditɔ idut eyeyemere, enyuŋ enyek idem ke ebiet-udibe mmɔ.

⁴⁶Jehovah ododu uwem: yak enyuŋ etoro akwa itiat mi; Abasi erinyaŋa mi eyenyuŋ okoŋ.

⁴⁷Ke edi Abasi osio usiene ɔnɔ mi, onyuŋ ɔsuhɔre mme idut onim mi ke idak.

⁴⁸Edi enye osio mi mme asua mi ke ubɔk: afo eyenyuŋ emenere mi ke enyɔŋ akan mmɔ eke eyomde mi ikɔ: onyuŋ anam mi mbɔhɔ owo afai.

⁴⁹Mmɔdo nyekɔm fi ke otu mme idut, O Jehovah! nnyuŋ ŋkwɔ nnɔ enyiŋ fo.

⁵⁰Edi enye ɔnɔ ɔbɔŋ esie akwa erinyaŋa, onyuŋ ɔfɔn ido ye Messiah esie, kpa David, ye ubon esie ke nsinsi.