Read efik ŊWED MME PSALM 33 Bible Online

ŊWED MME PSALM 33 - efik bible

ŊWED MME PSALM 33

¹MBUFO nti owo, edara Jehovah: itoro omodot mmɔ eke enende.

²Mbufo ekɔm Jehovah ke harp: eda psaltery uruk duop ekwɔ enɔ enye.

³Ekwɔ obufa ikwɔ enɔ enye: etim ebre ke mkpo idara.

⁴Koro uyo Jehovah enende; ndien kpukpru se enye anamde edi akpanikɔ.

⁵Enye amama eti ido ye edinen ikpe: ima Jehovah ɔyɔhɔ ke ererimbot.

⁶Ekeda uyo Jehovah enam enyɔŋ; ekeda ibifik inua esie enam kpukpru udim mmɔ.

⁷Enye okubi mmɔŋ inyaŋ anam otu: ada ndituŋɔ mmɔŋ esin ke ebiet unim-ŋkpɔ.

⁸Yak ndik Jehovah anam ofuri ekondo: yak kpukpru mme andiduŋ ererimbot ebak enye.

⁹Koro edi enye ɔkɔdɔhɔ, ndien ɔwɔrɔ: edi enye okowuk, ndien ada.

¹⁰Jehovah asuan uduak mme idut: enye anam mme ekikere mme obio ekpu.

¹¹Uduak Jehovah eyeda ke nsinsi, mme ekikere esit esie ke ofuri emana.

¹²Ɔfɔfɔn ɔnɔ idut eke Jehovah edide Abasi esie, ɔfɔn ɔnɔ obio eke enye emekde ke udeme esiemɔ.

¹³Jehovah etie ke enyɔŋ ese; okut kpukpru nditɔ owo.

¹⁴Enye etie ke ebiet iduŋ esie, ese kpukpru mme andiduŋ ererimbot.

¹⁵Enye ikpɔŋ-ikpɔŋ obot esit mmɔ; etiŋ enyin ke kpukpru se mmɔ enamde.

¹⁶Idige akwa odudu anyaŋa edidem; owo uko ibɔhɔke ke akwa nsɔŋidem.

¹⁷Horse edi ŋkpɔ abiaŋa ke erida mbɔhɔ: idinyuŋ inamke owo ɔbɔhɔ ke akwa odudu esie.

¹⁸Sese, Jehovah etiŋ enyin ke idem mmɔ eke ebakde enye, ye mmɔ eke edoride

¹⁹enyin ke ima esie; ke anyaŋa ukpɔŋ mmɔ osio ke mkpa, onyuŋ onim mmɔ ke uwem ke akaŋ.

²⁰Ukpɔŋ nnyin ebebet Jehovah: enye edi andiŋwam nnyin ye otu-ekɔŋ nnyin.

²¹Koro esit nnyin adarade enye, koro nnyin ibuɔtde idem ke edisana enyiŋ esie.

²²O Jehovah, yak ima fo odoro nnyin ke idem, kpa nte nnyin idoride fi enyin.