Read efik ŊWED MME PSALM 35 Bible Online

ŊWED MME PSALM 35 - efik bible

ŊWED MME PSALM 35

¹Eke David. O JEHOVAH, nam ikɔ ye mmɔ eke enamde ikɔ ye ami: ŋwana ekɔŋ ye mmɔ eke eŋwanade ye ami.

²Da otu-ekɔŋ ekpri ye akamba, nyuŋ daha da di nyaŋa mi.

³Nyuŋ sio eduat, nyuŋ siri usuŋ biɔŋɔ mmɔ eke ebinede mi: dɔhɔ ukpɔŋ mi, ete, “Ami ndi andinyaŋa fi.”

⁴Nam mmɔ eke eyomde ukpɔŋ mi ekut but ye esuene: yak mmɔ eke eduakde idiɔk enɔ mi, efiak edem enyuŋ etimere.

⁵Yak mmɔ etie nte mbio ke iso ofum: yak angel Jehovah onyuŋ onuk mmɔ eka.

⁶Yak usuŋ mmɔ okim onyuŋ ɔfiɔnɔ: yak angel Jehovah onyuŋ ebin mmɔ.

⁷Koro mmɔ edipde obube iyire mmɔ enɔ mi ke inyeneke ntak; mmɔ etibi ukpe enɔ ukpɔŋ mi, ke inyeneke ntak.

⁸Yak nsobo eke enye mifiɔkke osim enye: yak iyire esie emi enye odipde omum enye: yak enye ɔduɔ ke esit osobo.

⁹Ndien ukpɔŋ mi eyedara Jehovah; erinyaŋa esie eyenem mi.

¹⁰Kpukpru mme ɔkpɔ mi eyedɔhɔ, ete, Jehovah, anie ebiet fi, emi osiode owo ukut ke ubɔk owo eke ɔsɔŋde akan enye? (Ke osio) owo ukut ye ubuene ke ubɔk owo eke obumede enye?

¹¹Mbon afai edaha eda nte ntiense; mmɔ ebup mi ŋkpɔ eke mme mfiɔkke.

¹²Mmɔ eda idiɔk esio mi usiene eti, ebɔ ukpɔŋ mi ŋkpɔ.

¹³Edi ama edi ami, ke ini mmɔ edɔŋɔde, nsine ɔfɔŋ-ikpo: nsuk ukpɔŋ mi ke utre-udia; ndien mkpe-ubɔk mi eyefiak oduk mi ke ikpanesit.

¹⁴Ŋkasaŋa nte enye ekpedide ufan mi ye eyen-eka mi: nnuhɔ, ntie mbukpisi nte owo eke atuade eka esiemɔ.

¹⁵Edi iduɔ mi adat mmɔ esit, mmɔ enyuŋ esop idem, mbukpo owo esop idem ebaŋa mi, ndien mfiɔkke: ewai inyuŋ idopke.

¹⁶Ke otu mme oburobut owo eke ebrede mbre udia, mmɔ eta edet ese mi.

¹⁷O Ɔbɔŋ, adaŋa ini didie ke afo editie ese? Sio ukpɔŋ mi ke nsobo eke mmɔ esobode, sio ikpɔk idem mi ke ubɔk mme lion.

¹⁸Nyekɔm fi ke akwa esop: nyetoro fi ke otu ediwak otu owo.

¹⁹Kuyak mme asua mi, mbon nsu, edat esit ebaŋa mi: kuyak mmɔ eke esuade mi ke ikpikpu eyip enyin.

²⁰Koro mmɔ mitiŋke ikɔ emem: edi ekere ikɔ nsu etuk suŋ-suŋ owo ke obio.

²¹Mmɔ eŋwaŋade inua mmɔ ese mi, ke edɔhɔ ete, Aha, aha, enyin nnyin omokut.

²²O Jehovah afo omokut: kudop uyo: O Ɔbɔŋ, kukpɔŋ mi anyan usuŋ.

²³Men idem, nyuŋ demere kpe ikpe mi, O Abasi mi, ye Ɔbɔŋ mi, biere ikɔ mi.

²⁴Kpe ikpe mi ke edinen ido fo, O Jehovah Abasi mi; kunyuŋ uyak mmɔ edat esit ebaŋa mi.

²⁵Kuyak mmɔ edɔhɔ ke esit mmɔ ete, Ah, nnyin iyom ntre: kuyak mmɔ edɔhɔ, ete, “Nnyin imemen enye.”

²⁶Yak mmɔ eke ukut mi adatde mmɔ esit, ekut but ye esuene ini kiet; yak mmɔ eke eburede mbure ebaŋa mi eda but ye ndutime esine ke idem.

²⁷Yak mmɔ eke emade edinen ikɔ mi ekwɔ enyuŋ edara; yak mmɔ enyuŋ edɔhɔ kpukpru ini, ete, Yak ekpono Jehovah, emi amade ifure owo esie.

²⁸Ndien edeme mi eyetiŋ eti ido fo, ye itoro fo, ofuri usen.