Read efik ŊWED MME PSALM 37 Bible Online

ŊWED MME PSALM 37 - efik bible

ŊWED MME PSALM 37

¹Eke David. KUYAT esit ubaŋa mme oburobut owo; kufibe ufup ye mme anam-idiɔk.

²Koro eyewara ndisibe mmɔ nte mbiet, mmɔ eyenyuŋ ekeŋe nte awawa ikɔŋ.

³Buɔt idem ye Jehovah, nyuŋ nam se ifɔnde; duŋ ke isɔŋ, nyuŋ dia akpanikɔ.

⁴Yak Jehovah onyuŋ adat fi esit; ndien enye eyenɔ fi se esit fo oyomde.

⁵Kpat usuŋ fo nɔ Jehovah, nyuŋ buɔt idem fo ye enye, ndien enye eyenam.

⁶Ndien enye eyeda eti ido fo ɔwɔrɔ nte uŋwana, ye ikpe fo nte ufɔt uwemeyo.

⁷Dop uyo nɔ Jehovah, nyuŋ bet enye, kuyat esit ubaŋa owo eke okutde unen ke usuŋ esie, ubaŋa owo eke anamde idiɔk uduak.

⁸Tre ifuresit, nyuŋ kpɔŋ ifiopesit: kuyat esit kunyuŋ unam idiɔk baba.

⁹Koro eyekpok mme idiɔk owo efep: edi mmɔ eke ebetde Jehovah eyeda isɔŋ enyene.

¹⁰Koro osuk esisit idiɔk owo ididuhe: ndien ke afo etiŋde enyin ke ebiet esie, enye ididuhe.

¹¹Edi mbon nsukidem eyeda isɔŋ enyene; ediwak emem eyenyuŋ enem mmɔ esit.

¹²Idiɔk owo aduak idiɔk uduak abaŋa eti owo, onyuŋ ata edet ese enye.

¹³Ɔbɔŋ asak enye, koro enye okutde ete ke usen esie ɔmɔŋ edi.

¹⁴Mme idiɔk owo esio ofut, enyuŋ ekɔk utiga mmɔ, ete iduɔk eyen ukut ye ubuene, inyuŋ iwot mbon esit kiet.

¹⁵Ofut mmɔ eyeduk mmɔ esit, ndien utiga mmɔ eyebuŋɔ.

¹⁶Ekpri ŋkpɔ eti owo ɔfɔn akan inyene ediwak mme idiɔk owo.

¹⁷Koro ubɔk mme idiɔk owo eyebuŋɔ: edi Jehovah omum nti owo akama.

¹⁸Jehovah ɔmɔfiɔk mme usen nti owo: ndien udeme mmɔ eyedu ke nsinsi.

¹⁹But idinamke mmɔ ke idiɔk ini: edi eyeyuhɔ ke ini akaŋ.

²⁰Koro eyesobo mme idiɔk owo, mme asua Jehovah eyenyuŋ ebiet ikpɔŋ nditɔ erɔŋ: mmɔ emesuana, emesuana nte nsuŋikaŋ.

²¹Idiɔk owo ɔbɔbuɔt, ndien isioho: edi eti owo atua owo mbɔm, onyuŋ ɔnɔ ŋkpɔ.

²²Koro mmɔ eke enye ɔdiɔŋde eda isɔŋ enyene: edi eyesibe mmɔ eke enye osuŋide efep.

²³Jehovah otim onim ikpat (eti) owo, onyuŋ amama usuŋ esie.

²⁴Koro enye eyeduɔ, edi idinyanakede ina: koro Jehovah omumde enye ubɔk akama.

²⁵Ŋkedi eyenɔwɔŋ, ndien ndi ebiowo ŋko; Akanam ŋkwe nte ekpɔŋde eti owo, nte ubon esie enyuŋ esaŋade inɔk.

²⁶Kpu-kpru ini enye atua owo mbɔm, onyuŋ ɔnɔ ke ebuɔt; ndien ɔfɔn ɔnɔ ubon esie.

²⁷Wɔŋɔre kpɔŋ idiɔk, nyuŋ nam eti; ndien duŋ ke nsinsi.

²⁸Koro Jehovah amade edinen ikpe, ndien ikpɔŋke mbon-ima esie; eyekpeme mmɔ ke nsinsi: edi eyesibe ubon mme idiɔk owo efep.

²⁹Nti owo eyeda isɔŋ enyene, enyuŋ eduŋ ke esit ke nsinsi.

³⁰Inua eti owo etiŋ ifiɔk, edeme esie onyuŋ ɔdɔhɔ se inende.

³¹Mbet Abasi esie edu enye ke esit; ikpat esie idiwahake.

³²Idiɔk owo etie ekpeme eti, onyuŋ oyom enye ndiwot.

³³Jehovah idiyakke enye ikpɔŋ ke ubɔk esie, idinyuŋ inamke ikɔ otip enye ke ini ekpede ikpe esie.

³⁴Bet Jehovah, nyuŋ nim ido esie, ndien enye eyemenere fi onim ke enyɔŋ, man ada isɔŋ enyene.

³⁵Ŋkokut idiɔk owo enyene-ndik, onyuŋ asuan idem esie nte awawa eto, eyen isɔŋ.

³⁶Ekem enye adaha, ndien, sese, enye iduhe: ndien nyom enye, edi idige aba nte ekutde enye.

³⁷Tiŋ enyin ke owo eke ɔfɔnde ama, nyuŋ se edinen owo: koro (eti) utit anade ɔnɔ owo emem.

³⁸Eyenyuŋ esobo mme idiɔk owo ɔtɔ kiet: eyesibe (eti) utit mme idiɔk owo efep.

³⁹Ndien edi Jehovah anyaŋa nti owo: enye edi odudu mmɔ ke ini ukut.

⁴⁰Jehovah omonyuŋ ɔbɔ mmɔ ubɔk, onyuŋ anam mmɔ ebɔhɔ: enye eyenam mmɔ ebɔhɔ mme idiɔk owo, eyenyuŋ anyaŋa mmɔ, koro mmɔ ebuɔtde idem mmɔ ye enye.