Read efik ŊWED MME PSALM 47 Bible Online

ŊWED MME PSALM 47 - efik bible

ŊWED MME PSALM 47

¹Etubom mbon ikwɔ. Psalm eke nditɔ Korah. MBUFO, kpukpru mme idut, ekwak ubɔk; esio mkpo idara enɔ Abasi.

²Koro Jehovah, Ata Edikoŋ, enyenede ndik: enye edi akwa edidem ke ofuri ererimbot.

³Enye eyenam kpukpru owo emem isin enɔ nnyin, onyuŋ ada mme idut edak nnyin ke ikpat.

⁴Enye eyemek udeme nnyin ɔnɔ nnyin, kpa ubɔŋ Jacob emi enye amade. [Selah.]

⁵Abasi ɔmɔdɔk ke mkpo idara, Jehovah, ke uyom ukorowo.

⁶Mbufo ekwɔ enɔ Abasi, ekwɔ; ekwɔ enɔ edidem nnyin, ekwɔ.

⁷Koro Abasi edide edidem ke ofuri ererimbot; mbufo etim ekwɔ.

⁸Abasi edi edidem mme idut: Abasi ɔmɔsuhɔre etie ke edisana ebekpo esie.

⁹Mbɔŋ obio emesop idem, kpa ikɔt Abasi Abraham: koro mme otu-ekɔŋ ererimbot enyenede Abasi: enye okoŋ eti-eti.