Read efik ŊWED MME PSALM 68 Bible Online

ŊWED MME PSALM 68 - efik bible

ŊWED MME PSALM 68

¹Eke etubom mbon ikwɔ. Psalm David. Ikwɔ. ABASI eyedaha ada, mme asua esie eyesuana: mbon-utɔk esie eyenyuŋ efeŋe ke iso esie.

²Afo eyesuan mmɔ kpa nte nsuŋikaŋ asuanade: kpa nte mbukpa ɔkwɔk atarade ke iso ikaŋ, eyesobo mme idiɔk owo ke iso Abasi.

³Ndien nti owo eyedara; mmɔ eyesio mkpo ke iso Abasi: enyuŋ ebre ke idaresit.

⁴Mbufo ekwɔ enɔ Abasi, etoro enyiŋ esie. Ediɔŋ usuŋ enɔ enye emi odorode (chariot) asaŋa ke wilderness: enyiŋ esie edi Jah, mbufo enyuŋ ebem enye iso ebre.

⁵Abasi edi ete nditɔ-akpa, ye ebierikpe mme ebe-akpa, ke edisana iduŋ esie.

⁶Abasi anam ikpɔŋ owo eduŋ ke ufɔk: osio mbon ŋkpɔkɔbi ɔnɔ inyene: edi mbon nsɔŋibuot ikpɔŋ eduŋ ke nsat isɔŋ.

⁷O Abasi, ke ini afo ekebemde ikɔt fo iso ɔwɔrɔ, ke ini afo asaŋade ke wilderness. [Selah.]

⁸Isɔŋ enyek, ikpa-enyɔŋ ŋko ɔtɔi ke iso Abasi: Sinai oro (enyek) ke iso Abasi, Abasi Israel.

⁹Afo Abasi anam edim enɔ-ima edep: ama edi udeme fo, ke ini enye ɔkpɔtde, afo ɔsɔŋ enye idem.

¹⁰Esop ikɔt fo eduŋ ke esit: O Abasi, afo eyeda ufɔn fo otim ŋkpɔ ɔnɔ mme ubuene.

¹¹Ɔbɔŋ ɔnɔ uyo: ibat emi ekwɔrɔde edi akamba udim.

¹²Ndidem mbon-ekɔŋ eyefeŋe, eyefeŋe, ndien ŋwan eke osukde ke ufɔk eyebahare mbume.

¹³Ke ini mbufo enade suŋ ke esit mme ebiet ufene, (mbufo eyebiet) mba ibiom eke ɔduɔkde idaŋ, ntaŋ esie onyuŋ ɔduɔk uto-uto mmɔŋ okuk.

¹⁴Ke ini Ata Ɔkpɔsɔŋ asuande ndidem ke esit, snow ofuk Salmon.

¹⁵Obot a-Bashan edi obot Abasi; obot a-Bashan enyene ediwak nsom.

¹⁶Mbufo ikpɔ obot, mbufo nsom, enam didie etie ekpeme obot emi Abasi amade ndiduŋ ke esit; ŋkɔm Jehovah eyetie do ke nsinsi.

¹⁷Mme chariot Abasi edi tɔsin edip, ye utɔŋɔ ntak tɔsin tɔsin:

¹⁸Ɔbɔŋ odu ke otu mmɔ; Sinai odu ke edisanan ebiet. Afo ɔkɔdɔk ke enyɔŋ, ataŋ mbuot ekɔŋ ɔnyɔŋ: ɔbɔ enɔ ke otu owo; ye ke otu mbon nsɔŋ-ibot ŋko-ŋko, man afo oduŋ do, O Jehovah Abasi.

¹⁹Ekɔm Ɔbɔŋ kpukpru usen; owo ada mbiomo odori nnyin ke idem, Abasi edi erinyaŋa nnyin. [Selah.]

²⁰Abasi edi Abasi emi anyaŋade nnyin; ndien ubɔhɔ mkpa enyene Jehovah Ɔbɔŋ.

²¹Edi Abasi edisuan ibuot mme asua esie, kpa idet-idet mkpɔkpɔrɔ enye emi asaŋade ke mme idiɔk ido esie.

²²Ɔbɔŋ ɔdɔhɔ ete, Nyeda (mmɔ) ke Bashan mfiak ndi: nyeda (mmɔ) ke udem inyaŋ mfiak ndi:

²³man afo anuak mmɔ esin ukot fo ke iyip, man edeme ebua fo ada udeme esie ke mme asua.

²⁴Mmɔ ekekut mme isaŋ fo, O Abasi, kpa isaŋ Abasi ye eke edidem mi ke edisana ebiet.

²⁵Mme ɔkwɔ-ikwɔ ebem iso, mme ebre-ndido etiene, ke otu nditɔ iban emi emiade ekɔmɔ.

²⁶Mbufo ekɔm Abasi ke otu mbon-esop, mbufo emi etode ke idim Israel, etoro Ɔbɔŋ.

²⁷Benjamin eyenɔŋwɔŋ, andikara mmɔ, odu do mbɔŋ Judah, ye udim mmɔ, ye mbɔŋ Zebulun, ye mbɔŋ Naphtali.

²⁸Abasi fo omowuk odudu fo: sɔŋ idem, O Abasi, emi anamde ŋkpɔ emi ɔnɔ nnyin.

²⁹Ndidem eyeda enɔ esɔk fi, ebaŋa temple fo ke enyɔŋ Jerusalem.

³⁰Duat unam nnyanyaŋa, ye udim mkpɔsɔŋ ayara enaŋ, ke otu nditɔ enaŋ mme idut, emi edade mbak silver edinuhɔ: enye amasuan mme idut eke emade ekɔŋ.

³¹Mbɔŋ eyeto ke Egypt edi, Ethiopia eyesɔp edi edinɔ Abasi ubɔk esie.

³²Mbufo, mme idut ererimbot, ekwɔ enɔ Abasi; O, mbufo ekwɔ enɔ Ɔbɔŋ. [Selah.]

³³Ekwɔ enɔ Enye emi odoroke ke akani enyɔŋ eset; sese, Enye ke osioro uyo, ɔkpɔsɔŋ uyo.

³⁴Mbufo enɔ Abasi odudu: ubom esie odoro Israel; odudu esie onyuŋ odu ke ikpa-enyɔŋ.

³⁵O Abasi, afo emenyene ndik ke edisana ebiet fo: ke edi Abasi Israel ɔnɔ ikɔt esie nsɔŋ-idem ye odudu. Ekɔm Abasi.