Read efik ŊWED MME PSALM 69 Bible Online

ŊWED MME PSALM 69 - efik bible

ŊWED MME PSALM 69

¹Eke etubom mbon ikwɔ. Asaŋa ye mme lily. Eke David. O ABASI, nyaŋa mi; koro mmɔŋ odukde tutu osim ukpɔŋ mi.

²Mmɔbuhɔ ke okpuk, emi owo mikemeke ndida ke esit: mmoduk udem mmɔŋ, mme idim emenyuŋ efuk mi.

³Eseme mi esin mi ŋkpa mba: itɔŋ amasat mi: enyin okim mi ke ini mbetde Abasi mi.

⁴Mmɔ eke esuade mi ke ikpikpu ewak ekan idet ibuot mi: nsu nsu mme asua mi emi eyomde ndisobo mi, esɔŋɔ: ndien mmenyene ndiyak se mmeŋkobumeke.

⁵O Abasi, afo ɔmɔfiɔk ndisime ido mi; mme ukwaŋa-ŋkpɔ mi inyuŋ idibeke fi.

⁶Kuyak mmɔ eke ebetde fi ekut but ebaŋa mi, O Ɔbɔŋ Jehovah mme udim. O Abasi Israel, kuyak mmɔ eke eyomde fi edi ŋkpɔ esuene ebaŋa mi.

⁷Koro mmokut but mbaŋa fi; esuene omofuk mi iso.

⁸Mmakabare nte esen owo ye nditɔ-ete mi, ye nte eyen idut ke otu nditɔ-eka mi.

⁹Koro ufup ufɔk fo adiade mi; esuene mmɔ eke esuenede fi onyuŋ ɔduɔ mi ke idem.

¹⁰Ndien ntua eyet ŋwot ukpɔŋ mi ke utre-udia,

¹¹oro onyuŋ akabare edi se edade esuene mi. Nnyuŋ nda ɔfɔŋ-ikpo nsine ke idem mi; nnyuŋ ŋkabare ndi ufiet mmɔ.

¹²Mmɔ eke etiede ke inua-otop etiŋ ebaŋa mi; nnyuŋ ndi se mbon mmin ekwɔde.

¹³Edi ama edi ami, mkpe-ubɔk mi osim fi, O Jehovah, ke ini ufɔn, O Abasi, ke ediwak ima fo; yere mi ke akpanikɔ erinyaŋa fo.

¹⁴Sio mi ke okpuk, kunyuŋ uyak mi mbuhɔ: yak enyaŋa mi ebɔ mme asua mi, enyuŋ esio mi ke edituŋɔ mmɔŋ.

¹⁵Kuyak mme akpa-mmɔŋ efuk mi: kunyuŋ uyak udem emen mi; obube okunyuŋ okubi inua esie abaha mi.

¹⁶Yere mi, O Jehovah; koro ima fo ɔfɔnde kabare se mi ke akamba ufɔn fo.

¹⁷Kunyuŋ udip owo fo iso fo; koro ntiede ke itie-ukut: wara di yere mi.

¹⁸Di kpere ukpɔŋ mi, nyuŋ fak enye: nyaŋa mi mbak mme asua mi.

¹⁹Afo ɔmɔfiɔk esuene mi, ye but mi ye esari mi: kpukpru mme asua mi edu fi ke iso. Esuene ɔmɔbuŋ mi esit;

²⁰udɔŋɔ anam mi: mmonyuŋ ntie mbet owo eke atuade mi mbɔm, edi iduhe; nnyuŋ mbet mme ɔdɔŋ esit, edi ŋkwe.

²¹Ndien mmɔ enɔ etidot ke udia mi; enyuŋ enɔ mi vinegar ŋŋwɔŋ ke nsatitɔŋ mi.

²²Yak okpokoro mmɔ ana mmɔ ke iso nte afia: onyuŋ edi mfine mmɔ eke etiede ke ifure.

²³Nam enyin okim mmɔ, man ekukut ŋkpɔ; nyuŋ nam isin enyek mmɔ kpukpru ini.

²⁴Ŋwaŋa iyaresit fo duɔk mmɔ ke idem, nyuŋ nam ifiopesit fo osim mmɔ.

²⁵Yak ebiet mmɔ etie ndon, owo okunyuŋ odu ke ataya mmɔ.

²⁶Koro mmɔ ekɔbɔde owo eke afo amiade; enyuŋ ebukde ubiak mmɔ eke afo okimde.

²⁷Dori idiɔk ido ke idiɔk ido mmɔ: kunyuŋ uyak mmɔ eduk ke utebe-ikpe fo.

²⁸Yak esɔhi mmɔ ke ŋwed uwem efep, ekunyuŋ ewet mmɔ esin ke otu mbon utebe-ikpe.

²⁹Ndien ami ndi eyen ubuene ye mfuhɔ: yak erinyaŋa fo, O Abasi, emenere mi onim ke enyɔŋ.

³⁰Nyetoro enyiŋ Abasi ke ikwɔ, nnyuŋ ŋkpono enye ke ekɔm.

³¹Ndien emi eyenem Jehovah akan ayara, akan abak enaŋ, eke enyenede nduk ye ikpat.

³²Mbon nsukidem ekut enyuŋ edaresit: ndien yak esit mbufo emi eyomde Abasi, akam odu uwem.

³³Koro Jehovah okopde ɔnɔ mme ubuene, ndien isinke mbon ŋkpɔkɔbi esie ke ndek.

³⁴Yak enyɔŋ ye isɔŋ etoro enye, yak inyaŋ ye kpukpru se isaŋade ke esit.

³⁵Koro Abasi edinyaŋade Zion, edinyuŋ ɔbɔpde mme obio Judah, ndien mmɔ eyeduŋ do enyuŋ eda mmɔ enyene.

³⁶Ndien ubon ikɔt esie eyedia enye; mmɔ eke emade enyiŋ esie eyenyuŋ eduŋ ke esit.