Read efik ŊWED MME PSALM 72 Bible Online

ŊWED MME PSALM 72 - efik bible

ŊWED MME PSALM 72

¹Eke Solomon. O ABASI, nɔ edidem mme ikpe fo, nyuŋ nɔ eyen edidem nti ido fo.

²Enye eyebiere ikɔ ikɔt fo nte enende, ye eke mme ubuene fo nte ɔfɔnde.

³Ikpɔ ye ŋkpri obot eyeŋwum ifure enɔ mbio-obio, ke edinen ido.

⁴Enye eyekpe ikpe mbon eke etuhɔde; eyenyaŋa nditɔ unana, onyuŋ anuak owo utuk.

⁵Eyebak fi adaŋa ini nte utin ayamade, ye ke iso ɔfiɔŋ, ke ofuri emana.

⁶Enye eyesuhɔre nte edim ke mbiet eke etemde, nte ŋkeŋe-nkeŋe edim ke ebebit isɔŋ.

⁷Edinen owo eyefiari ke eyo esie; ye ediwak emem ŋko tutu ɔfiɔŋ okure.

⁸Ndien enye eyeda ubɔŋ ɔtɔŋɔde ke inyaŋ kiet tutu osim eken, onyuŋ ɔtɔŋɔde ke akpa tutu osim ke utit isɔŋ.

⁹Mme andiduŋ ikɔt eyenuhɔ ke iso esie; ndien mme asua esie eyedei ntan.

¹⁰Ndidem Tarshish ye eke mme isuo eyetomo utomo: ndidem Sheba ye Seba eyeda enɔ edi.

¹¹Ndien kpukpru ndidem eyenuhɔ enɔ enye: kpukpru mme idut eyenam ŋkpɔ esie.

¹²Koro enye eyenyaŋa ubuene ke ini enye esemede; ye owo ukut, ye owo eke minyeneke andinyaŋa.

¹³Enye eyetua eyen unana ye ubuene mbɔm, onyuŋ anyaŋa ukpɔŋ mme ubuene.

¹⁴Enye eyefak ukpɔŋ mi osio ke ukut ye nnama: onyuŋ ese iyip mmɔ ke ŋkpɔ-uto.

¹⁵Ndien enye (ubuene) eyedu uwem, eyenyuŋ ɔnɔ Enye (edidem) gold Sheba; onyuŋ anam mkpeubɔk ɔnɔ Enye kpukpru ini; eyekɔm Enye ofuri usen.

¹⁶Uwak ibokpot eyedu ke isɔŋ ke nsom ikpɔ obot; mfri esie eyenyeŋe nte Lebanon: ndien mbio-obio eyesehe nte mbiet iŋwaŋ.

¹⁷Enyiŋ esie eyedu ke nsi nsi; enyiŋ esie eyebigi adaŋa ini nte utin ayamade: eyeda enye ediɔŋ idem mmɔ: kpukpru mme idut eyedɔhɔ ete ɔfɔn ye enye.

¹⁸Ekɔm Jehovah Abasi, kpa Abasi Israel, emi ikpɔŋ-ikpɔŋ anamde mme utibe ŋkpɔ.

¹⁹Enyuŋ ekɔm enyiŋ ubɔŋ esie ke nsinsi: yak ubɔŋ esie onyuŋ ɔyɔhɔ ke ofuri ererimbot.

²⁰Amen, ye Amen. Mme akam David eyen Jesse etre (mi).