Read efik ŊWED MME PSALM 77 Bible Online

ŊWED MME PSALM 77 - efik bible

ŊWED MME PSALM 77

¹Eke etubom mbon ikwɔ, kpa Jeduthun. Psalm Asaph. NYEMENERE uyo mi nnɔ Abasi, nnyuŋ nseme, nyemenere uyo mi nnɔ Abasi; ndien enye eyekpaŋ utɔŋ ɔnɔ mi.

²Ŋkoyom Ɔbɔŋ ke usen ukut mi: ubɔk mi atara ke okoneyo, inyuŋ idoroke ibikpai: ukpɔŋ mi esin ndɔŋesit.

³Nti Abasi, ndien ntua: ntie ŋkere, ndien ukpɔŋ akpa mi. [Selah.]

⁴Afo omum mi enyin, ataba mi idap: nsia oyomo mi, ndien ndɔhɔke ikɔ.

⁵Ŋkere ini eset, kpa mme isua eyo oko.

⁶Nyeti ikwɔ mi ke okoneyo: nyeneme ye esit mi: ukpɔŋ mi onyuŋ otim ɔduɔŋɔ.

⁷Nte Ɔbɔŋ ediduɔk ke nsinsi, ndien mitɔŋɔke aba ntak ifɔn ido?

⁸Nte ima esie amakpa ama ke nsinsi?

⁹Nte uyo esie emetre ke ofuri emana? Nte Abasi emefre ufɔn? Nte enye ada iyaresit okubi mbɔm esie? [Selah.]

¹⁰Ndien ndɔhɔ, nte ke udɔŋɔ mi edi emi, mme isua ubɔk nnasia Ata Edikoŋ.

¹¹Nyetaŋ ese Jehovah: koro nyeti mme utibe ŋkpɔ fo ke eset.

¹²Nyekere kpukpru se afo anamde, nyenyuŋ ŋkere utom fo.

¹³O Abasi, usuŋ fo edi edisana: ewe Abasi okpon nte ata Abasi?

¹⁴Afo Abasi anam utibe ŋkpɔ: omowut odudu fo ke otu mme idut.

¹⁵Afo amada ubɔk nnasia fo afak ikɔt fo, kpa nditɔ Jacob ye eke Joseph. [Selah.]

¹⁶Mmɔŋ okokut fi, O Abasi; mmɔŋ okokut fi; mmɔŋ edikhe, mme udem enyuŋ enyek eti-eti.

¹⁷Mbubit enyɔŋ eŋwaŋa mmɔŋ: ikpa-enyɔŋ ɔnɔ uyom: idaŋ fo ŋko esaŋa.

¹⁸Uyom utuak-enyɔŋ fo okodu ke oyobio: obuma eŋwaŋa ekondo: isɔŋ otimere onyuŋ enyek.

¹⁹Usuŋ fo odu ke inyaŋ, ɔkpɔ-usuŋ fo onyuŋ odu ke ediwak mmɔŋ, inyuŋ ifiɔkke nde ikpat fo.

²⁰Afo eteme ikɔt fo usuŋ nte ufene, ke ubɔk Moses ye Aaron.