Read efik ŊWED MME PSALM 78 Bible Online

ŊWED MME PSALM 78 - efik bible

ŊWED MME PSALM 78

¹Maschil eke Asaph. O MBUFO ikɔt mi, ekop mbet mi: ekpaŋ utɔŋ mbufo ke ikɔ inua mi.

²Nyeda parable ntat inua mi; nyetop ŋke eke etode ke eset:

³eke nnyin ikokopde inyuŋ ifiɔkde, mme ete nnyin emenyuŋ etiŋ enɔ nnyin.

⁴Nnyin ididipke nditɔ mmɔ, edi isian emana eŋwen itoro Jehovah, ye odudu esie, ye mme utibe ŋkpɔ esie emi enye akanamde.

⁵Ndien enye okowuk ewuhɔ ke Jacob, onyuŋ onim mbet ke Israel, eke enye eketemede mme ete nnyin, ete mmɔ eda eteme nditɔ mmɔ.

⁶Kpaŋ emana iso ekpefiɔk, kpaŋ nditɔ ekpemana, edaha ke enyɔŋ enyuŋ etiŋ enɔ nditɔ mmɔ.

⁷Kpaŋ mmɔ ekpebuɔt idem-mmɔ ye Abasi, ekunyuŋ efre se Abasi anamde, edi enim mbet esie:

⁸ndien ekutie nte mme ete mmɔ, emana nsɔŋ-ibuot ye emiom, emana eke mi-timke esit mmɔ; ndien spirit mmɔ isɔŋɔke ida ye Abasi.

⁹Nditɔ Ephraim, emi ekamade ŋkpɔ ekɔŋ, enyuŋ etopde utiga, ekpa edem ke usen ekɔŋ.

¹⁰Mmɔ inimke ediomi Abasi; edi esin ndisaŋa ke mbet esie.

¹¹Mmɔ enyuŋ efre se enye akanamde, ye mme utibe ŋkpɔ esie emi enye okowutde mmɔ.

¹²Enye akanam mme utibe ŋkpɔ ke iso mme ete mmɔ, ke idut Egypt, ke isɔŋ Zoan.

¹³Enye abahare inyaŋ, onyuŋ ada mmɔ ebe; onyuŋ okubi mmɔŋ nte ibombom.

¹⁴Onyuŋ ada obubit enyɔŋ eteme mmɔ usuŋ ke uwemeyo, onyuŋ ada edisak ikaŋ eteme mmɔ ke ofuri okoneyo.

¹⁵Enye asiak mme itiat ke wilderness, osio mmɔŋ nte inyaŋ ibom ɔnɔ mmɔ eŋwɔŋ.

¹⁶Enye onyuŋ osio idim ke akwa itiat, onyuŋ anam mmɔŋ ɔsuhɔre nte akpa.

¹⁷Edi mmɔ edediɔŋ ediɔk ye enye, enyuŋ esɔŋ ibuot ye Ata Edikoŋ ke wilderness.

¹⁸Mmɔ enyuŋ edomo Abasi ke esit mmɔ, enyuŋ ebeŋe udia ke eke itɔŋ mmɔ.

¹⁹Ndien mmɔ enam ikɔ ye Abasi, ete, Nte Abasi emekeme ndibri okpokoro ke wilderness?

²⁰Sese, enye okoyibi akwa itiat, ndien mmɔŋ ɔwɔrɔ, idim onyuŋ esirere; mme enye omonyuŋ ekeme ndinɔ uyo? Nte enye editim unam ɔnɔ ikɔt esie?

²¹Oro esin Jehovah okop, onyuŋ ayat esit: ikaŋ onyuŋ obubere ke Jacob, iyaresit onyuŋ ɔdɔk anam Israel ŋko;

²²koro mmɔ minimke uyo Abasi ke akpanikɔ, minyuŋ ibuɔtke idem-mmɔ ke erinyaŋa esie;

²³Ndien enye owuk ikpa-enyɔŋ ke enyɔŋ, onyuŋ eberere mme itim heaven,

²⁴Onyuŋ anam manna edep ɔnɔ mmɔ edia, onyuŋ ɔnɔ mmɔ ibokpot heaven.

²⁵Owo ata uyo angel, enye ɔnɔ udia esɔk mmɔ eyuhɔ.

²⁶Anam ofum ikɔrabak abara ke ikpa-enyɔŋ: onyuŋ ada odudu esie anam ofum usuk edi.

²⁷Ndien enye anam unam edep ɔnɔ mmɔ nte ntɔŋ, ye inuen mba nte ntan inyaŋ:

²⁸onyuŋ ɔduɔk ke esit nna mmɔ, akan mme tent mmɔ okuk.

²⁹Ndien mmɔ eta, enyuŋ eyuhɔ eti-eti: ntem ke enye ada se itɔŋ ɔdɔŋde mmɔ ɔsɔk mmɔ.

³⁰Mmɔ ikabakede ikpɔŋ udɔŋ mmɔ; udia osuk ododu mmɔ ke inua,

³¹ndien iyaresit Abasi ɔdɔk etiene mmɔ onyuŋ owot mmɔ eke ekponde ke otu mmɔ, onyuŋ emen mkparawa Israel ɔduɔk ke isɔŋ.

³²Kpukpru ŋkpɔ emi ikpanke mmɔ ndimana ndiɔk, idem mme utibe ŋkpɔ esie inyuŋ isinke mmɔ enim ke akpanikɔ.

³³Ndien enye ama usen mmɔ ke ikpikpu, ye mme isua mmɔ ke ndik.

³⁴Ke ini enye owotde mmɔ, mmɔ eyom enye ndien;

³⁵ndien mmɔ ekabare, enyuŋ ebak eyom Abasi, enyuŋ eti ete ke Abasi edi akwa itiat mmɔ ke onyuŋ edi Abasi Ata Edikoŋ anyaŋa mmɔ.

³⁶Ndien mmɔ ebiaŋa enye ke inua mmɔ, enyuŋ esu nsu enɔ enye ke edeme mmɔ.

³⁷Ndien esit mmɔ isɔŋɔke ida ye enye; mmɔ inyuŋ inamke akpanikɔ ke ediomi esie.

³⁸Ndien enye enyene-mbɔm osio isop idiɔk ido mmɔ, inyuŋ isoboke mmɔ: Edi awak ndikabare ŋkpɔŋ iyaresit esie, inyuŋ idemekede ofuri ifuresit esie.

³⁹Ndien enye eti ete ke mmɔ edi obukidem, ibifik eke adahade, ndien ifiakke aba.

⁴⁰Adaŋa didie ke mmɔ ekemiom enye ke wilderness, enyuŋ eyat enye esit ke desert!

⁴¹Enyuŋ etɔŋɔ ntak edomo Abasi, enyuŋ esuene Edisana Abasi Israel.

⁴²Mmɔ itihi ubɔk esie, usen eke enye afakde mmɔ osio mme asua ke ubɔk.

⁴³Emi okonimde mme idiɔŋɔ esie ke Egypt, ye mme utibe ŋkpɔ esie ke isɔŋ Zoan.

⁴⁴Okonyuŋ akabarede akpa mmɔŋ mmɔ edi iyip; ndien mmɔ ikemeke ndiŋwɔŋ mme idim mmɔ.

⁴⁵Enye ɔdɔŋ nduyip ŋkpɔ utom ke otu mmɔ, ndien eta mmɔ; onyuŋ ɔdɔŋ ikwɔt eke ebiatde mmɔ.

⁴⁶Onyuŋ ada mbuŋwum mmɔ ɔnɔ idiaŋ, onyuŋ ada se mmɔ ekpade utom, ɔnɔ ŋkukuŋkpɔyɔriyɔ.

⁴⁷Enye ada itiat edim abiat mme vine mmɔ, onyuŋ abiat mme sycomore mmɔ ke tuep.

⁴⁸Enye onyuŋ ayak enaŋ mmɔ ɔnɔ edim itiat, onyuŋ ayak ufene mmɔ ɔnɔ ikaŋ obuma.

⁴⁹Enye ɔdɔŋ ikaŋ iyaresit esie etiene mmɔ, ye ifuresit, ye ikpahesit, ye ndutuhɔ; ke ɔdɔŋ mme idiɔk angel utom ke ɔtɔ mmɔ.

⁵⁰Enye asiak usuŋ ɔnɔ iyaresit esie, inimke ukpɔŋ mmɔ, ite ekukpa, edi ayak uwem mmɔ ɔnɔ idiɔk udɔŋɔ;

⁵¹onyuŋ ɔtɔ kpukpru mme akpan ke Egypt; akpa nditɔ odudu mmɔ ke mme tent Ham.

⁵²Ndien enye ada ikɔt esie usuŋ nte ufene, onyuŋ akama mmɔ nte otu erɔŋ ke wilderness.

⁵³Enye onyuŋ ada mmɔ aka iso ke ifure, ndien mmɔ idikheke: ndien inyaŋ ofuk mme asua mmɔ.

⁵⁴Ndien enye ada mmɔ edi ke edisana adaŋa esie, kpa obot emi ubɔk nnasia esie ekedepde.

⁵⁵Ndien enye ebin mme idut ke iso mmɔ efep, onyuŋ ada uruk edeme udeme ɔnɔ mmɔ, ndien anam mme esien Israel eduŋ ke mme tent mmɔ.

⁵⁶Edi mmɔ edomo Abasi Ata Edikoŋ, enyuŋ eyat enye esit, inyuŋ inimke mbet esie.

⁵⁷Enyuŋ efiak edem, enyuŋ enam abiaŋa nte mme ete mmɔ: mmɔ ekabare nte emik utiga.

⁵⁸Enyuŋ eyat enye esit ke edikoŋ ebiet mmɔ, enyuŋ esin enye ofibe ufup ke edisɔi mbiet mmɔ.

⁵⁹Abasi okop, ndien ofuresit; onyuŋ asua Israel eti-eti:

⁶⁰ndien ɔwɔrɔ iduŋ Shiloh, kpa tent emi enye okowukde ke otu owo.

⁶¹Ndien enye ada odudu esie ɔnɔ, ete etaŋ enyɔŋ, onyuŋ esin uyai esie ke ubɔk usua.

⁶²Onyuŋ ayak ikɔt esiemɔ ɔnɔ ofut; onyuŋ ayat esit ye mbon udeme esiemɔ.

⁶³Ikaŋ ata mkparawa mmɔ; ndien mmɔ itoroke nditɔ-iban mmɔ.

⁶⁴Mme oku mmɔ eduɔŋɔ ke ofut; ndien mme ebe-akpa mmɔ ituaŋake.

⁶⁵Ndien Ɔbɔŋ edemere nte owo eke edede idap, nte owo uko adatde esit ke wine.

⁶⁶Ndien enye ɔtɔ mme asua mmɔ, anam mmɔ efiak edem: onyuŋ ɔnɔ mmɔ nsinsi esuene.

⁶⁷Ndien enye esin tent Joseph, inyuŋ imekke esien Ephraim:

⁶⁸edi emek esien Judah, kpa obot Zion emi enye amade.

⁶⁹Ndien enye ɔbɔp edisana ebiet esie nte edikoŋ ufɔk, kpa nte ererimbot emi enye onimde ke itie ke nsinsi.

⁷⁰Onyuŋ emek David owo esie, onyuŋ ada enye ke nna ufene efep:

⁷¹ada enye ke ukama mme uman erɔŋ emi enɔde mmɔŋ-eba, efep edi, ete enye ɔbɔk Jacob ikɔt esie, ye Israel udeme esie.

⁷²Ndien enye ada ofuri esit esie ɔbɔk mmɔ; eyenyuŋ akama mmɔ ke usɔ ubɔk esie.