Read efik ŊWED MME PSALM 80 Bible Online

ŊWED MME PSALM 80 - efik bible

ŊWED MME PSALM 80

¹Eke etubom mbon ikwɔ. Asaŋa ye mme lily. Ikɔ ntiense. Eke Asaph. Psalm. O ANDIBƆK Israel, emi adade Joseph usuŋ nte otu ufene, kpaŋ utɔŋ; emi etiede ke otu mme cherubim, yama.

²Ke iso Ephraim, ye Benjamin, ye Manasseh, demere uko fo, nyuŋ di nyaŋa mi.

³O Abasi, da nnyin fiak edem, nyuŋ yak iso fo ayama; ndien nnyin iyetie ke ifure.

⁴O Jehovah Abasi mme udim, adaŋa didie ke afo ɔwɔrɔ nsuŋikaŋ asua mkpe-ubɔk ikɔt fo?

⁵Afo ɔnɔ mmɔ uyo mmɔŋeyet; onyuŋ odomo mmɔŋeyet ɔnɔ mmɔ eŋwɔŋ.

⁶Afo esin nnyin idi ŋkpɔ utɔk mbɔhiduŋ nnyin: mme asua nnyin enyuŋ esak nsahi ke idem mmɔ.

⁷O Abasi mme udim, da nnyin fiak, nyuŋ nam iso fo ayama; ndien nnyin iyetie ke ifure.

⁸Afo ama ada vine ke Egypt edi: ebin mme idut efep, onyuŋ ɔtɔ enye.

⁹Aŋwaŋa ebiet ke iso esie, ndien enye omum oruŋ esie, onyuŋ; ɔyɔhɔ ke isɔŋ.

¹⁰Mfut esie ofuk ikpɔ obot, ŋkɔk esie enyuŋ efuk mme cedar Abasi.

¹¹Enye asiaha ŋkɔk esie osim, inyaŋ, nditɔ esie enyuŋ esim akpa mmɔŋ.

¹²Nsinam afo obuŋde enye ɔkɔ, ayak kpukpru mmɔ eke esaŋade ke usuŋ etet enye?

¹³Edi oto ke akai abiat enye, unam ikɔt onyuŋ adia enye.

¹⁴O Abasi mme udim, mbɔk, fiak edem: tie ke enyɔŋ tuk iso, nyuŋ kut, nyuŋ di dise vine fo emi;

¹⁵ye nsehe emi ubɔk nnasia fo ɔkɔtɔde, ye eyen emi afo ɔbɔkde ɔnɔ idem fo.

¹⁶Mmɔ emefɔp enye ke ikaŋ; emekpi enye; nduari iso fo omosobo mmɔ.

¹⁷Da ubɔk fo dori owo nnasia fo ke idem, ye enye owo emi afo ɔbɔkde ɔnɔ idem fo.

¹⁸Ndien nnyin idifiakke edem ikpɔŋ fi: afo eyenam itɔŋ uwem ɔsɔŋɔ nnyin, ndien nnyin iyeseme ikot enyiŋ fo.

¹⁹O Jehovah Abasi mme udim, da nnyin fiak, nam iso fo ayama; ndien nnyin iyedu ke ifure.