Read efik ŊWED MME PSALM 84 Bible Online

ŊWED MME PSALM 84 - efik bible

ŊWED MME PSALM 84

¹Eke etubom mbon ikwɔ. Asaŋa ye Gittith. Psalm nditɔ Korah. MME IDUŊ fo, O Jehovah mme udim, enem didie!

²Okure Jehovah ɔdɔŋ mi ukpɔŋ tutu akpa mba; esit mi ye obukidem mi ekwɔ enɔ Abasi uwem.

³Idem ntarusuŋ omokut ufɔk, akaraŋ Abasi omonyuŋ okut efɔk ke idem esie, eke enye okponimde nditɔ esiemɔ, idem mme itie-uwa fo, O Jehovah mme udim edidem mi, ye Abasi mi.

⁴Ɔfɔfɔn ɔnɔ mmɔ eke eduŋde ufɔk fo: mmɔ eyesuk etoro fi. [Selah.]

⁵Ɔfɔfɔn ɔnɔ owo eke odudu esie odude fi ke idem, ɔkpɔ-usuŋ edu mmɔ ke esit.

⁶Ke esaŋade ke itihere Mmɔŋeyet, enam enye obube mmɔŋ; (itihere) Moreh onyuŋ esine eti ŋkpɔ ke idem.

⁷Mmɔ eda nsɔŋ-idem edediɔŋ eka iso; kpukpru mmɔ ebiɔŋɔre ke iso Abasi ke Zion.

⁸O Jehovah Abasi mme udim, kop akam mi; kpaŋ utɔŋ, O Abasi Jacob. [Selah.]

⁹O Abasi otu-ekɔŋ nnyin, se tiŋ enyiŋ ke iso Messeiah fo.

¹⁰Koro usen kiet ke okure fo ɔmɔfɔn akan tɔsin. Mmemek ndida ke asaŋ-udɔk ke ufɔk Abasi mi, akan ndiduŋ ke mme tent mme oburobut owo.

¹¹Koro Jehovah Abasi edide utin ye otu-ekɔŋ: Jehovah ɔmɔnɔ ufɔn ye ubɔŋ: ama edi mmɔ eke eneŋerede esaŋa, enye isinke mmɔ nti ŋkpɔ.

¹²O Jehovah mme udim, ɔfɔfɔn ɔnɔ owo eke ɔbuɔtde idem esie ye afo.