Read efik ŊWED MME PSALM 86 Bible Online

ŊWED MME PSALM 86 - efik bible

ŊWED MME PSALM 86

¹Akam David. O JEHOVAH, kpaŋ utɔŋ fo, yere mi; koro ami ndide owo ukut ye ubuene.

²Kama ukpɔŋ mi; koro ami ndide owo ima fo: Oh, afo Abasi mi, nyaŋa owo fo emi ɔbuɔtde idem esie ye afo.

³O Ɔbɔŋ, fɔn ido ye ami: koro nyeseme nnɔ fi ke ofuri usen.

⁴Dat owo fo esit, koro mmemen ukpɔŋ mi nse fi, Ɔbɔŋ.

⁵Koro afo, Ɔbɔŋ, ɔmɔfɔn, omonyuŋ ama ndidahado; omonyuŋ awak ima ye kpukpru mmɔ eke esemede enɔ fi.

⁶Kop akam mi, O Jehovah; nyuŋ kpaŋ utɔŋ ke uyo mkpe ubɔk mi.

⁷Ke usen ukut mi ke ndiseme nnɔ fi, koro afo eyeyere mi.

⁸O Ɔbɔŋ, baba kiet ke otu mme abasi ibietke fi; baba ŋkpɔ kiet inyuŋ ibietke se afo anamde.

⁹Kpukpru mme idut emi afo akanamde eyedi edituak ibuot ke iso fo, Ɔbɔŋ; eyenyuŋ ekpono enyiŋ fo.

¹⁰Koro afo omokpon, omonyuŋ anam mme utibeŋkpɔ: afo ikpɔŋ-ikpɔŋ edi Abasi.

¹¹Teme mi usuŋ fo, O Jehovah; nyesaŋa ke akpanikɔ fo: kɔt esit mi abak enyiŋ fo.

¹²O Ɔbɔŋ Abasi mi, nyetoro fi ke ofuri esit mi, nnyuŋ ŋkpono enyiŋ fo ke nsinsi.

¹³Koro ima fo omokpon ye ami; afo omonyuŋ osio ukpɔŋ mi ke edituŋɔ hell.

¹⁴O Abasi, mbon iseri edaha ke enyɔŋ enam ikɔ ye ami; esop mbon ŋkanubɔk ke eyom ukpɔŋ mi, inyuŋ inimke fi ke iso idem-mmɔ.

¹⁵Edi afo, O Ɔbɔŋ, edi Abasi esit mbɔm ye eke mfɔnido; usɔpke iyaresit, edi awak mfɔn ye akpanikɔ.

¹⁶Oh kabare tiene mi, nyuŋ tua mi mbɔm; nɔ owo fo odudu fo, nyuŋ nyaŋa eyen ofin aŋwan fo.

¹⁷Nam idiɔŋɔ mfɔn ye ami; ndien mme asua mi eyekut, enyuŋ ekop esuene: koro afo, Jehovah, aŋwamde mi, onyuŋ ɔdɔŋde mi esit.