Read efik ŊWED MME PSALM 88 Bible Online

ŊWED MME PSALM 88 - efik bible

ŊWED MME PSALM 88

¹Ikwɔ. Psalm. Eke nditɔ Korah. Eke etubom mbon ikwɔ. Asaŋa ye Mahalath Leannoth. Maschil Heman Ezrathite. O JEHOVAH ABASI emi anyaŋade mi, nseseme uwemeyo ye okoneyo ke iso fo:

²yak akam mi edi fi ke iso: kpaŋ utɔŋ fo ke eseme mi;

³koro ukpɔŋ mi ɔyɔhɔde ukut: uwem mi omonyuŋ osim ke udi.

⁴Ebat mi esin ke otu mmɔ eke esuhɔrede ke obube: ntie nte owo eke minyeneke odudu.

⁵Ŋwɔrɔ ke ufin, ntie ke otu mme akpa mkpa, nte mme ɔduɔ-obom eke enade ke udi, eke afo mutihi aba: ndien emesibe mmɔ esio fi ke ubɔk.

⁶Afo emesin mi ke edituŋɔ obube, ke ekim ye ke udem.

⁷Iyaresit fo omofuk mi, afo onyuŋ ada kpukpru aya fo efik mi. [Selah.]

⁸Afo anam mme ɔdiɔŋɔ mi ekpɔŋ mi anyan usuŋ; onyuŋ onim mi ke ŋkpɔ mbubiam ye mmɔ: ekuk mi ebaha; ami nnyuŋ ŋkemeke ndiwɔrɔ.

⁹Ukut esin enyin akpa mi; O Jehovah, nseme ŋkot fi kpukpru usen, ntat ubɔk mi nse fi.

¹⁰Nte afo edinam utibe ŋkpɔ ɔnɔ mme akpa-mkpa? Nte mbukpo edidakha ke enyɔŋ etoro fi? [Selah.]

¹¹Nte edibuk mbuk ima fo ke udi?

¹²Ye akpanikɔ fo ke nsobo? Nte edifiɔk mme utibe ŋkpɔ fo ke ekim? ye edinen ido fo ke isɔŋ efre?

¹³Edi ami mmseme nnɔ fi, O Jehovah, ndien akam mi eyedi ke iso fo ke usenubɔk.

¹⁴O Jehovah, nsinam afo emende ukpɔŋ mi ɔduɔk? onyuŋ odipde mi iso fo?

¹⁵Ami ndi ubuene, nnyuŋ nyom ndikpa toto ke uyen mi; mmobiom ndik fo; esit etimere mi.

¹⁶Ikaŋ iyaresit fo omofuk mi; ŋkpɔ ndik fo emesobo mi.

¹⁷Mmɔ ekan mi ekuk nte mmɔŋ kpukpru usen; mmɔ ekan mi ekuk ini kiet.

¹⁸Afo amanam ama mi ye ufan mi ekpɔŋ mi anyan ebiet; mme ɔdiɔŋɔ mi edu ke ebiet ekim.