Read efik ŊWED MME PSALM 89 Bible Online

ŊWED MME PSALM 89 - efik bible

ŊWED MME PSALM 89

¹Maschil Ethan Ezrahite. NYEKWƆ ima Jehovah ke nsinsi: nyeda inua mi mbuk akpanikɔ fo ke ofuri emana.

²Koro ndɔhɔde nte, Ima eyesɔŋɔ ada ke nsinsi: afo eyewuk akpanikɔ fo ke idem heaven.

³Mmodiomi ediomi ye owo emi mmekde, mmɔŋwɔŋɔ nnɔ David owo mi.

⁴Mmomum ubon fo ŋkama ke nsinsi, nnyuŋ nnam ebekpo fo ɔsɔŋɔ ada ke ofuri emana.

⁵Ndien ikpa-enyɔŋ otoro utibe ŋkpɔ fo, O Jehovah, ye akpanikɔ fo ŋko ke esop ndisana owo.

⁶Koro anie ke ikpa-enyɔŋ ekem ye Jehovah? Anie ke otu nditɔ ikpɔ owo ebiet Jehovah?

⁷Abasi ekpenyene uteŋe ke odu ndisana owo; ndik esie okonyuŋ odoro kpukpru owo eke ekande enye ekuk.

⁸O Jehovah, Abasi mme udim, anie ɔsɔŋɔ nte afo, Jehovah?

⁹Akpanikɔ fo onyuŋ akan fi okuk. Afo ke akan iseri inyaŋ: ke ini enye otopde odut, afo osuk mmɔ.

¹⁰Afo amanuak Rahab, nte owo eke akpade afai; ada ɔkpɔsɔŋ ubɔk fo asuan mme asua fo.

¹¹Enyɔŋ edi okuo, isɔŋ onyuŋ edi okuo: ama onyuŋ edi obot ye se iyɔhɔde ke esit, afo onyuŋ onim mmɔ ke itie.

¹²Afo okobot edere ye usuk: Tabor ye Hermon esio mkpo idara enɔ enyiŋ fo.

¹³Afo emenyene ubɔk odudu: ubɔk fo ɔmɔsɔŋ, nnasia fo omokoŋ.

¹⁴Edinen ido ye ikpe edi itie ebekpo fo: ima ye akpanikɔ eyebem fi iso esaŋa.

¹⁵Ɔfɔfɔn ɔnɔ mmɔ eke efiɔkde mkpo idara: O Jehovah, mmɔ eyesaŋa ke uŋwana iso fo.

¹⁶Eyedara enyiŋ fo ofuri usen; edinen ido fo eyenyuŋ emenere mmɔ onim ke enyɔŋ.

¹⁷Koro afo edide ubɔŋ odudu mmɔ: mfɔnido fo eyenyuŋ emenere nduk nnyin ke

¹⁸enyɔŋ. Koro otu-ekɔŋ nnyin enyenede Jehovah; edidem nnyin onyuŋ enyene Edisana Abasi Israel.

¹⁹Ke ini oro afo ɔkɔdɔhɔde ye mbon-ima fo ke ŋkukut, ete, Mmada erinyaŋa ndori owo uko ke idem; mmosio ata owo ke otu mbio-obio mmenere nnim ke enyɔŋ.

²⁰Mmokut David owo mi: mmeyet enye ke edisana aran mi;

²¹emi ita mi edidade ye enye: ubɔk mi eyenyuŋ anam enye ɔsɔŋɔ.

²²Usua idikpakke enye; eyen idiɔk idinyuŋ itukke enye.

²³Ndien ami nyetɔ mme asua esie nduɔk enye ke iso, nnyuŋ nyibi mbon-utɔk esie.

²⁴Edi akpanikɔ mi ye ima mi eyeda ye enye; enyiŋ mi eyenyuŋ emenere nduk esie onim ke enyɔŋ.

²⁵Ndien nyesin ubɔk esie ke inyan, ye nnasia esie ke mme akpa-mmɔŋ.

²⁶Enye eyeseme okot mi, ete, Afo edi ete mi ye Abasi mi, ye akwa itiat erinyaŋa mi.

²⁷Ndien ŋko nyenim enye ke akpan, okoŋ akan ndidem isɔŋ.

²⁸Nyenim ima mi ye enye ke nsinsi, ediomi mi eyenyuŋ ɔsɔŋ ada ye enye.

²⁹Nyenyuŋ nnim ubon esie ke nsinsi, ye ebekpo esie nte mme usen heaven.

³⁰Nditɔ esie ema ekpɔŋ ewuhɔ mi, ndien misaŋake ke mme item mi;

³¹ema ebiat mbet mi, ndien minimke ido mi;

³²nyeda ndien eto mmia mmɔ ke mme ukwaŋ-ŋkpɔ mmɔ, nnyuŋ nda ikpa mmia mmɔ ke oburobut ido mmɔ.

³³Edi ndibɔhɔ enye ima mi, ndinyuŋ mbiatke akpanikɔ mi.

³⁴Ndibiatke ediomi mi, ndinyuŋ ŋkpuhɔke se iwɔrɔde mi ke inua.

³⁵Ŋkɔŋwɔŋɔ ŋkpɔ kiet ke edisana ido mi, ndisuhe nsu nnɔ David.

³⁶Ubon esie eyedu ke nsinsi; ebekpo esie eyebigi nte utin ke iso mi.

³⁷Eyesɔŋɔ ada nte ɔfiɔŋ ke nsinsi, ye nte ntiense akpanikɔ ke ikpa-enyɔŋ. [Selah.]

³⁸Edi afo ememen ɔduɔk, omonyuŋ esin: afo ayat esit ye owo fo emi afo eyetde aran.

³⁹Amabiat ediomo owo fo: omonyuŋ asabare anyanya esie ke ntan.

⁴⁰Omobuŋ kpukpru mme ɔkɔ esie; onyuŋ onim mkpɔsɔŋ ebiet esie ke ŋwure.

⁴¹Kpukpru mmɔ eke esaŋade ke usuŋ ebe ebume enye: enye edi se mbɔhiduŋ esie esuenede.

⁴²Afo ememenere ubɔk nnasia mme asua esie onim ke enyɔŋ; amanam kpukpru mme asua esie edat esit.

⁴³Afo ŋko omotip iso ofut esie, unyuŋ uyakke enye ɔsɔŋ ada ke ekɔŋ.

⁴⁴Amanam enye etre ndinyene ubɔŋ esie, onyuŋ ɔduɔk ebekpo esie ke isɔŋ.

⁴⁵Afo amakpaha ini uyen esie: omonyuŋ ada but ofuk enye. [Selah.]

⁴⁶Adaŋa didie, O Jehovah? Nte afo edidibe ke nsinsi?

⁴⁷Nte iyaresit fo edisak nte ikaŋ? Ti nte eyo uwem mi etiede: nsinam afo obotde kpukpru nditɔ owo ke ikpikpu?

⁴⁸Anie owo edidu uwem, idinyuŋ ikwe mkpa? Edinam ukpɔŋ esie ɔbɔhɔ udi ke ubɔk? [Selah.]

⁴⁹Ɔbɔŋ, enye akani ima fo, emi afo ɔkɔŋwɔŋɔde ɔnɔ David owo fo ke akpanikɔ?

⁵⁰O Ɔbɔŋ, ti esuene ikɔt fo; nte mbiomde ofuri ediwak mme idut ke ikpanesit mi;

⁵¹emi mme asua fo edade esuene, O Jehovah; emi mmɔ edade esuene ikpat ukot Messiah fo.

⁵²Mbufo ekɔm Jehovah ke nsinsi. Amen ye Amen.