Read efik ŊWED MME PSALM 9 Bible Online

ŊWED MME PSALM 9 - efik bible

ŊWED MME PSALM 9

¹Eke etubom mbon ikwɔ. Abaŋa Muth-labben. Psalm David. NYEKƆM Jehovah ke ofuri esit mi; nyebuk kpukpru mme utibe ŋkpɔ fo.

²Afo eyenam esit mi ebre onyuŋ adara: nyekwɔ enyiŋ fo, O Ata Edikoŋ.

³Ke ini mme asua mi efiakde edem, mmɔ eyeduɔŋɔ enyuŋ esobo ke iso fo.

⁴Koro afo ekpede ikpe mi ye ikɔ mi; afo etie ke ebekpo ekpe nte enede.

⁵Afo amaduari mme idut, omosobo mme idiɔk, ɔmɔsɔhi enyiŋ mmɔ efep ke nsinsi-nsinsi.

⁶Ama edi mme asua, emema ŋwure (mmɔ) ke nsinsi. Afo omonyuŋ osobo obio (mmɔ); owo itihi aba mmɔ.

⁷Edi Jehovah eyebigi ke nsinsi; enye omonim ebekpo esie, ete ikpe ikpe.

⁸Ndien edi enye edikpe ererimbot ke eti ido; edikpe mme obio nte enende.

⁹Ndien Jehovah eyedi ebiet ubɔhɔ mmɔ eke owo etukde, ebiet ubɔhɔ ke ini nnaneyin.

¹⁰Ndien mmɔ eke efiɔkde enyiŋ fo eyebuɔt idem mmɔ ye afo; koro afo, Jehovah, mukpɔŋke mmɔ eke eyomde fi.

¹¹Mbufo ekwɔ enɔ Jehovah emi oduŋde ke Zion: etaŋa ese esie ke otu mme idut.

¹²Koro enye etide mmɔ ke ini enye obupde ikɔ iyip: enye ifreke eseme mbon ukut.

¹³Tua mi mbɔm, O Jehovah; se ukut mi eke otode ke mme asua mi, afo emi emende mi ke inua-otop mkpa efep:

¹⁴man ntaŋa ofuri itoro fo ke inua-otop adiaha Zion: nyedara erinyaŋa fo.

¹⁵Mme idut emesuhɔre ke obube emi mmɔ enamde, afia emi mmɔ edipde omomum mmɔ ukot Emefiɔk Jehovah:

¹⁶enye ekpe ikpe; utom ubɔk idiɔk owo esike owo ke idem esie. Higgaion. Selah.

¹⁷Mme idiɔk owo eyefiak edem eduk ke hell, kpukpru mme idut

¹⁸eke efrede Abasi. Koro midifreke eyen ubene ke nsinsi: idorienyin mbon ukut iditakke ke nsinsi.

¹⁹Daha ke enyɔŋ, O Jehovah; kuyak owo akan: nam mme idut edi ikpe ke iso fo.

²⁰O Jehovah, nam mmɔ edige: nam mme idut efiɔk ete ke mmimɔ idi owo. [Selah.]