Read efik ŊWED MME PSALM 94 Bible Online

ŊWED MME PSALM 94 - efik bible

ŊWED MME PSALM 94

¹ABASI usiene, Jehovah; Abasi usiene, Yama!

²Ebierikpe ererimbot, menere idem fo, nɔ mbon-iseri usiene.

³O Jehovah, adaŋa didie ke mme idiɔk owo, adaŋa didie ke mme idiɔk owo edidara?

⁴Adaŋa didie ke kpukpru mme anam-idiɔk ediŋwaŋa enyuŋ etiŋ mkpɔsɔŋ ikɔ, edinyuŋ ebure mbure?

⁵Mmɔ enuak ikɔt fo, O Jehovah, enyuŋ etuk udeme fo.

⁶Ewot ebe-akpa ye esen owo, enyuŋ ewot nditɔ-akpa.

⁷Ndien mmɔ edɔhɔ ete, Jehovah idikwe, Abasi Jacob idinyuŋ ifiɔkke.

⁸Mbufo, mbio ndutun ke otu mbio-obio, enim ibuot: ndien mbufo mbon ndisime, ini ewe ke mbufo ediwɔrɔ ɔniɔŋ?

⁹Nte anditɔ utɔŋ idikopke? Nte andibot enyin idikwe ŋkpɔ?

¹⁰Nte Enye emi ɔnɔde mme idut ufen iditunɔke, Enye emi ekpepde owo ifiɔk?

¹¹Jehovah ɔmɔfiɔk ekikere owo, ete ke mmɔ edi ikpikpu.

¹²Ɔfɔfɔn ɔnɔ owo eke afo, Jehovah, ɔnɔde enye ufen, onyuŋ adade mbet fo eteme enye;

¹³man afo ɔnɔ enye ifure ke ini idiɔk, tutu mmɔ etibi obube enɔ mme idiɔk owo.

¹⁴Koro Jehovah mididuɔkke ikɔt esiemɔ, midinyuŋ ikpɔŋke udeme esie.

¹⁵Koro ikpe eyefiak ke se inende, ndien kpukpru mbon esit kiet eyebine enye.

¹⁶Anie editiene mi aŋwana ye mme idiɔk owo? Anie edida ye ami aŋwana ye mme anam oburobut?

¹⁷Ke Jehovah mikpanyaŋake mi, osuk esisit ukpɔŋ mi okpoduŋ ke ndobo.

¹⁸Ke ndɔhɔde nte, Ukot mi ɔfiɔnɔre: ima fo, O Jehovah, omum mi akama.

¹⁹Ke uwak ekikere emi odude mi ke esit ndɔŋesit fo enem mi esit.

²⁰Nte afo edisaŋa ŋkpɔ ye ebekpo idiɔk ido, emi obotde ibak ke ewuhɔ?

²¹Mmɔ ewuk ewuhɔ ebaŋa ukpɔŋ edinen owo, enyuŋ enam ikpe otip iyip emi miduehe isop.

²²Edi Jehovah edi ebiet ukpeme mi; Abasi mi onyuŋ edi akwa itiat ubɔhɔ mi.

²³Ndien enye eyenam ukwaŋ-ŋkpɔ mmɔ afiak etiene mmɔ, onyuŋ osibe mmɔ efep ke idiɔk ido mmɔ; Jehovah Abasi nnyin eyesibe mmɔ efep.