Read efik MME ŊKE 12 Bible Online

MME ŊKE 12 - efik bible

MME ŊKE 12

¹AMA item ama ifiɔk: edi asua nduari ebiet unam.

²Eti owo eyekut mfɔn eke otode Jehovah: edi enye eyenam ikɔ obiom owo idiɔk uduak.

³Owo idisɔŋɔke ida ke idiɔk ido; edi oruŋ nti owo idisehekede.

⁴Enyene-ido aŋwan edi anyanya ebe esie: edi oburobut aŋwan etie nte nyap ke ɔkpɔ esie.

⁵Se nti owo ekerede enenen: se mme idiɔk owo eduakde edi abiaŋa.

⁶Uyo mme idiɔk owo edi ndedibe mbet iyip: edi inua mbon edinen ido eyenyaŋa mmɔ.

⁷Ekabare mme idiɔk owo ekubi, ndien mmɔ etak: edi ufɔk nti owo eyesɔŋɔ ada.

⁸Adaŋa nte owo asiande, ke eda etoro enye: edi eyesuene owo eke akwaŋade ke esit.

⁹Ɔfɔn ye owo eke esede enye ke ndek, ndien enyenede ofin, akan owo eke okokde idem esie, anana udia.

¹⁰Eti owo ekere uwem unam esie: edi mbɔm mme idiɔk owo edi mfiomo.

¹¹Owo eke ɔdiɔŋde isɔŋ esie eyeyuhɔ udia: edi mbet otime-otime owo anana ibuot.

¹²Idiɔk owo oyom mukanda mme idiɔk-ŋkpɔ: edi oruŋ nti owo onwum.

¹³Afia idiɔk owo odu ke ndudue inua esie: edi eti owo eyebɔhɔ nnanenyin.

¹⁴Owo eyeyuhɔ ufɔn eke otode ke mfri inua: ndien enye eyenɔ owo ŋkpɔ eyen-utom ubɔk esie.

¹⁵Usuŋ ndisime owo enen enye ke enyin: edi owo eke okopde item enyene ibuot.

¹⁶Ndisime ayarare iyaresit esie ini kiet: edi owo eke ofukde ŋkpɔ but edi ɔniɔŋ.

¹⁷Owo eke ɔdɔhɔde akpanikɔ etiŋ se inende: edi ntiense nsu obuk abiaŋa.

¹⁸Enyene mmɔ eke ekeŋde inua nte ofut okimde: edi edeme mbon eti ibuot ɔkɔk unan.

¹⁹Inua akpanikɔ eyesɔŋɔ ada ke nsinsi: edi edeme nsu, ke nyip-enyin.

²⁰Abiaŋa odu ke esit mmɔ eke eduakde idiɔk: edi idaresit odu ye mmɔ eke ekpede emem.

²¹Baba ufen idisimke eti owo: edi mme idiɔk owo, eyeyuhɔ idiɔk.

²²Jehovah ese mkpɔk-inua nsu ke mbubiam: edi mme anam akpan-ikɔ enem enye esit.

²³Owo ɔniɔŋ odip ifiɔk: edi esit mbon ndisime eyekwɔrɔ ebiɔ.

²⁴Ubɔk mbon nsɔp ubɔk eyekara: edi ɔnuɔn ubɔk eyetomo utomo.

²⁵Mfuhɔ ke esit owo eyenuk enye ɔduɔ: edi eti ikɔ eyedat enye.

²⁶Eti owo eteme ufan esie usuŋ: edi usuŋ mme idiɔk owo esin mmɔ ediyo.

²⁷Nuɔn idifɔpke unam utop esiemɔ: edi owo nsɔpubɔk edi ata ŋkpɔuto owo.

²⁸Uwem odu ke usuŋ edinen ido: ndien mkpa iduhe baba ke ɔkpɔ-usuŋ: