Read efik MME ŊKE 13 Bible Online

MME ŊKE 13 - efik bible

MME ŊKE 13

¹EYEN eti ibuot okop item ete esie: edi ɔsɔŋ-enyin ikopke nduari.

²Owo eyedia ufɔn eke otode ke mfri inua esie: edi ukpɔŋ mbon abiaŋa, eyedia afai.

³Owo eke ekpemede inua esie onim uwem esiemɔ: ama edi owo eke aŋwaŋarede inua esie, nsobo edi esie.

⁴Itɔŋ ɔdɔŋ owo ifu, ndien ŋkpɔ iduhe: edi ukpɔŋ owo nsɔpubɔk eyesehe.

⁵Eti owo eyesua nsunsu ikɔ: edi idiɔk owo anam mbukpo ye oburobut ido.

⁶Eti ido eyenim owo eke usuŋ esie ɔfɔnde ama: edi idiɔk ido efebede anam-idiɔk ɔduɔk.

⁷Enyene owo eke ɔdɔhɔde, ete, ke imɔ imenyene ŋkpɔ, ndien baba ŋkpɔ kiet iduhe: enyene eke ɔdɔhɔde, ete, ke imɔ imebuene ndien inyene awak.

⁸Inyene owo edi ufak uwem owo: edi eyen ubuene ikopke nduari.

⁹Uŋwana eti owo adara: edi utuenikaŋ mme idiɔk owo eyenime.

¹⁰Edi iseri ikpɔŋ esin utɔk: edi mmɔ eke ekopde item enyene ibuot.

¹¹Inyene eke otode ke ndebe eyekabare ekpri: edi owo eke ɔkɔde ke ubɔk eyetɔt.

¹²Idori-enyin eke anamde ubigi esin esit ɔdɔŋɔ; edi ndibɔ se eyomde edi eto uwem.

¹³Owo eke esede ikɔ (Abasi) ke ndek eyebiat idem esie: edi owo eke efehede mbet eyetie ke emem.

¹⁴Item enyene-ibuot owo edi idim uwem, man owo ɔwɔŋɔre ɔkpɔŋ afia mkpa.

¹⁵Eti ikike ɔnɔ owo ufɔn: edi usuŋ mbon abiaŋa ɔsɔsɔŋ.

¹⁶Kpukpru ɔniɔŋ owo eyenam ŋkpɔ ke ifiɔk: edi ndisime owo ayarare ebiɔ.

¹⁷Idiɔk isuŋ-utom eyeduɔ ke ukut: edi usuŋ akpanikɔ edi nsɔŋidem.

¹⁸Ubuene ye but enam owo eke esinde item: edi eyekpono owo eke onimde ibuot ke esuade enɔ enye.

¹⁹Owo ndikut se idɔŋde enye enem enye esit, edi mbon ndisime esua ndikpɔŋ idiɔk.

²⁰Owo eke asaŋade ye mme enyene-ibuot eyenyene ibuot: edi nsaŋa mbon ndisime eyediɔŋ ɔdiɔk.

²¹Idiɔk eyebine mme anam-idiɔk: edi eyeda ufɔn enɔ nti owo ke ŋkpɔ eyen utom.

²²Eti owo ada akpa ɔnɔ nditɔ-nditɔ: inyene idiɔk owo onyuŋ ana ɔnɔ eti owo.

²³Adandaŋ eyen ubuene ɔfɔn ediwak udia: edi enyene owo eke atakde, koro edinen ikpe miduhe.

²⁴Osuk eto esie asua eyen esie: edi ama eyen abak ɔtunɔ eyen.

²⁵Eti owo adia ŋkpɔ ɔyuhɔ: edi idibi mme idiɔk owo ana ukpɔk.