Read efik MME ŊKE 15 Bible Online

MME ŊKE 15 - efik bible

MME ŊKE 15

¹SUŊ-SUŊ ibɔrɔ akabare ifiopesit efep: edi uyat ikɔ edemere iyaresit.

²Edeme enyene-ibuot owo anam ifiɔk ɔfɔn: edi inua mbon ndisime aŋwaŋa ebiɔ.

³Enyin Jehovah edu ke kpukpru ebiet, ese mme idiɔk owo ye nti.

⁴Suŋ-suŋ edeme edi eto uwem: edi ukwaŋ-ŋkpɔ ke esit owo edi se ibuŋde spirit.

⁵Ndisime owo asua item ete esiemɔ: edi owo eke onimde ibuot ke esuade enɔ enye ɔwɔrɔ ɔniɔŋ.

⁶Ekese inyene edu ke ufɔk eti owo: edi mbuŋwum idiɔk owo edi afanikɔŋ.

⁷Mkpɔk-inua mbon eti ibuot esuan ifiɔk: edi esit mbon ndisime inamke ntre.

⁸Jehovah abat uwa mme idiɔk owo ke mbubiam: edi akam mbon eti ido enem enye esit.

⁹Jehovah abat usuŋ idiɔk owo ke mbubiam: edi enye ama owo eke etienede edinen ido.

¹⁰Ɔkpɔsɔŋ ufen enyene owo eke awahade ɔkpɔŋ usuŋ: owo eke asuade ntunɔ eyekpa.

¹¹Hell ye nsobo ena ke iso Jehovah: ŋwaŋwa ediso esit nditɔ owo?

¹²Ɔsɔŋ enyin imaŋa owo eke asuade ɔnɔ enye: enye ikaha ɔtɔ mbon eti ibuot.

¹³Esit idara anam iso eye: edi mfuhɔ obuŋ spirit owo.

¹⁴Esit asian owo oyom ifiɔk: edi inua mme ndisime eyedia ndisime.

¹⁵Kpukpru usen owo ukut edediɔk: edi inemesit edi usɔrɔ kpukpru ini.

¹⁶Ekpri ŋkpɔ ke uteŋe Jehovah ɔfɔn akan ediwak inyene ye afanikɔŋ ke esit.

¹⁷Ikɔŋ eke owo adiade ke ebiet eke ima odude, ɔfɔn akan edisehe unam ye usua ke esit.

¹⁸Owo iyaresit edemere utɔk: edi owo eke misɔpke iyaresit omum eŋwan.

¹⁹Usuŋ ifem ebiet ɔkɔ ŋkukim: edi ediɔŋ usuŋ mbon edinen ido.

²⁰Enyene-ibuot eyen adat ete esit: edi ndisime owo ese eka esie ke ndek.

²¹Ndisime ido adat owo unana ibuot esit: edi owo asian eneŋere asaŋa.

²²Unana item esin uduak okpu: edi ke mbon item ewakde, mmɔ esɔŋɔ eda.

²³Owo enyene inemesit ke ibɔrɔ inua esie: ndien ikɔ ke ekem ini nsifɔn ntem?

²⁴Usuŋ uwem ana ke enyɔŋ ɔnɔ ɔniɔŋ, man enye akabare ɔkpɔŋ hell ke idak.

²⁵Jehovah eyedibere ufɔk mbon iseri efep: edi eyeneŋere adaŋa ŋwan akpa.

²⁶Jehovah abat idiɔk uduak ke mbubiam: edi edinen ikɔ edi edisana.

²⁷Adia idiɔk udori ɔtuhɔ ufɔk esie: edi owo eke asuade enɔ enye eyedu uwem.

²⁸Esit eti owo otim ekere ndibɔrɔ: edi inua mme idiɔk owo aŋwaŋa mme idiɔk ikɔ.

²⁹Jehovah ada nsan-nsan ye mme idiɔk owo: edi okop akam nti owo.

³⁰Uŋwana enyin anam esit adara: eti etop anam ɔkpɔ enyene ndia.

³¹Utɔŋ eke okopde nduari uwem oduŋ ke otu mbon eti ibuot.

³²Owo eke esinde item ese uwem esiemɔ ke ndek: edi owo eke okopde ke esuade enɔ enye, enyene eti ibuot.

³³Uteŋe Jehovah edi item mbufiɔk: nsukidem onyuŋ ebem ubɔŋ iso-